¹ Fi zaman dak Yashu nadi Raubiniin, wa Jadiin, wa nus ta Manassa. ² Huwo kelim le umon, ''Itakum amulu ayi haja al Mosa kadam ta Yahwah kelim le itakum. Itakum tii sout tai fi ayi haja al ana kelim le itakum. ³ Itakum ma sibu akuwana takum ayamat de kulu, lahadi yom ta aleela, wa iatakum temimu shuku al Yahwah wesi le itakum. ⁴ Hasa Yahwah wedi raha le akuwana takum, ze ma huwo waidu umon. Ashan rija takum le kiam takum fi ard al itakum weriso, al Mosa kadam ta Yahwah wedi le itakum fi tani ta Urdon. ⁵ Bes kede itakum kun harisin ashan bi hafiso wasya wa ganoon al Mosa kadam ta Yahwah weri le itakum, kede itakum hibu Allah, wa kede duoru fi sikat tuo, kede hafiso wasaya tuo, wa kede lesegu fugu huwo wa bi abudu huwo ma geliba taki wa nefsa taki kulu.'' ⁶ Yashu bariku umon wa sibu umon rija le kiam tumon. ⁷ Le nus ta bab ta Manassa mosa wedi le umon miras fi Bashan, wa le nus al tani Yashu wedi miras tumon jambu akuwana tumon fi ard safa garib ta Urdon. Yashu rasulu umon le kiam tumon huwo bariku umon ⁸ wa kelim le umon, ''Rija takum le kiam takum be gurush ketir, wa mawashi ketir, wa be dahab wa fidda, be nihas wa hadid, wa be gumashat ketir. Gesimu takum ganaim ta adu takum de ma akuwana takum.'' ⁹ Iyal ta Raubin, iyal ta Jad, wa nus gebila ta Manassa rija bet, umon sibu shaab Israel fi Shiluwa, al fi beled ta Kanaan. Umon tala bi ruwa le Jalaad, le beled tumon, al umon be nufus tumon weriso, be taa ta wesiya ta Yahwah, be iden ta Mosa. ¹⁰ Wekit umon wusulo fi Urdon fi ard Kanaan, Nas Raubin wa Jaddin wa nus ta gebila ta Manassa abinu mazbah Azim. ¹¹ Shaab Isreal asuma an kalam de wa kelim, ''Ayinu! nas Raubin, wa Jad wa nus ta Manassa abinu mazbah fi gidam ta ard Kanaan grib ma Urdom, fi safa al tabi le shaab Israel.'' ¹² Zaman shaab Israel asuma, kulu mujtama ta shaab Israel limu sawa fi Shilu ashan bi shakila ma umon. ¹³ Yala shaab Israel rasulu nas le Raubiniin, wa Jaddin, wa nus gebila ta Manassa, fi ard Jalaad. Umon kaman rasulu Fanihas jena ta Aliazar al kahin, ¹⁴ wa ashara ruwasa, wahid min kulu usra ta Israel, wa kulu wahid min umon kan ras ta usra fi Israel. ¹⁵ Umon ja le shaab ta Raubin, Jad, wa nus gebila ta Manassa, fi ard Jalaad, wa umon wunuso le umon: ¹⁶ ''Kulu jama ta Yahwah wunuso kida, ''De kiana ta shunu de al itakum amulu did Ilah ta Israel, itakum rija wara min duoria wara Yahwah be abinu takum mazbah le badun takum fi yom de itakum merid did Yahwah? ¹⁷ Hal katiya ta Fagur besit le anina? Wa lisa anina ma nedifu nefus ta nina min fugu. Ashan katiya de darba ta Yahwah ja le jamma ta Israel. ¹⁸ Hal itakum lazim kede tala min sika ta Yahwah fi yom de? Kan itakum kaman merid did Yahwah aleela, bukura huwo bikun zalan min jamma ta Israel kulu. ¹⁹ Kan ard al itakum werisu itnajas, yala kede itakum mururu le ard al fugu maskan ta Yahwah wa shilu le itakum miras fi nus ta anina. Bes kede iatkum ma itmerid did Yahwah, wele kede itakum merid did anina be abinu takum mazbah le badun takum bidal mazbah ta Yahwah Ilah ta nina. ²⁰ De ma yao Akahan iyal ta Zarih amulu kiana gidam ta Yahwah fi haja ta haram? Gadab ma nezil le shaab Israel kulu? Rajil de ma mutu barau be sher tu.'' ²¹ Yala gebila ta Raubin, Jad, wa Nus ta Manassa juabu le ruwasa ta abuab tab Israel: ²² Ilah al azim, Allah, Yahwah! de al azim, Allah, Yahwah! Huwo arufu, wa sibu Israel be nefus tumon arufu! Kan kande be tamarud aw be kiana le Yahwah, mata kalisu anina fi yom de ashan itakum ²³ be abinu le itakum mazbah wa bi rija badun takum min ruwa wara ta Yahwah. Kan anina abinu mazbah de ashan bi gedimu fugu muhragat, aw tagdima, aw zebiha salama, kede Yahwah dafa le anina. ²⁴ Anina amulu min kuf anu badin iyal takum bi kelim le iayl ta anina, 'Itakum malu ma Yahwah, Ilah ta Israel? ²⁵ Lanu Yahwah Kutu Urdon hudud bainu aninama itakum. Itakum nas ta Raubin wa nas ta Jad, italum ma indu ayi haja ma Yahwah.' Ashan iyal takum kede ma ja wegifu iyal ta anina min abudu Yahwah. ²⁶ Ashan kida anina kelim, 'Kede anina abinu mazbah, ma ta muhragat wele le ayi zabaieh, ²⁷ lakin ashan bikun shahid bainu anina wa itakum, wa bainu jiel ta anina baat anina, wa anina bi amulu kidma ta Yahwah gidam tuo, be muhragat ta anina wa zabaieh ta anina ma zebiha ta salama, ashan iyal takum ma kelim le iyal tanina fi mustakbal, ''Itakum ma indu nisba fi Yahwah.'' ²⁸ Ashan kida anina kelim, 'Kan bi ruwa wunuso le anina wa le iyal ta anina fi mustakbal, anina bi kelim, ''Ayinu takum! de shabah ta mazbah ta Yahwah, al aba ta anina abinun, ma le muhragat, ma le zabaieh, lakin ze shahid bainu anina wa itakum.'' ²⁹ Kede kun bait min anina indu anina be itmarad did Yahwa, wa aleela anina bi rija min ruwa wara Yahwah be abinu mazbah le muhragat, le tegdima, aw le zebiha, barau min mazbah ta Yahwah Ilah ta anina de gidam maskan ta tuo.''' ³⁰ Wekit Fenihas al kahin ma ruwasa ta shaab, al umon ruwasa ta abuab ta Israel al kan ma huwo, asuma kelimat al shaab ta Raubin, wa Jad, wa Nus ta Manassa kelim, kan kues gidam uyon tumon. ³¹ Fanihas jena ta Aliazar al kahin kelim le shaab ta Raubin, Jad, wa Nus ta Manassa, ''Aleela anina arufu inu Yahwah fi nus ta anina, lanu itakum ma amulu kiana huwo. Hasa itakum angizu shaab Israel min iden ta Yahwah.'' ³² Yala Fenihas jena ta Aliazar al kahin, wa ruwasa de rija min Raubiniin, wa Jaddin, min ard Jalaad, wara le ard Kanaan, le shaab Israel, wa jibu ma umon kelima le umon. ³³ Tagrir tumon kan kues gidam ta Israel. shaab Israel bariku Allah wa umon ma wunuso tani an harib did Raubiniin wa Jaddin, ashan bi demiro ard al umon bi geni fugu. ³⁴ Raubiniin wa Jaddin kutu isim ta mazbahde ''Shahid,''lanu umon kelim, ''De shahid bainu anina inu Yahwah huwo Allah.''