¹ Hasa Ayob, ana bi asalo ita, asuma kilimat tai; asuma le kalamat tai kulu. ² Aino hasa, ana fata kasuma tai; liosan tai sonuso. ³ Kilimat tai lata min geliba al adil; lisan tai bi wonuso marafa al nedif. ⁴ Ruhu ta Allah yao kalagu ana; nefes ta al Gadir wodi le ana haya. ⁵ Kan ita bi agder, juwabo ana; jahizo kilimat taki bi nizam gidam tai wa wogif fok. ⁶ Aino, ana ze ita fi gidam ta Allah; salao ana kaman min tin. ⁷ Aino, kede shikil tai ma sibo ita kafo; wala iden tai kede ma kun tegil fi ita. ⁸ Ana asuma wanasa taki, wa de kilimat al ita wonuso, ⁹ ' ana nedif wa bedon zanib; ana berii, wa mafi katia fogo ana. ¹⁰ Aino, Allah ligo fursa ashan bi hajimo ana; huwo kutu addu tou. ¹¹ Huwo kutu kura tai fi rubat; huwo bi ragibo kulu khatawat tai.' ¹² Aino, fi de ita galtan- ana bi juwabo ita, leano Allah huwo akber min insan. ¹³ Malo ita bi juru habil ma huwo? huwo ma lazim bi ashrah le nin ai haja al huwo amolo. ¹⁴ Lean Allah bi wonuso mara, maratain, hata kan insan ma lahizo. ¹⁵ Fi hilim, fi ruya ta lel, kan insan num shedid, kan huwo num fi serir- ¹⁶ Biga Allah bi fata adanat ta nas, wa sibo humon kafo be tahdidat tou, ¹⁷ ashan bi ankizo insan min katia, wa shelo kibria min huwo. ¹⁸ Allah bi ankizo haya ta insan min hawia, haya tou ashan ma bi mutu. ¹⁹ Insan bi akibo kaman be waja al bi kuto huwo num fi serir tou, be azab fi udam tou, ²⁰ ashan huwo bi akrah akil, wa jisim tou bi akrah malazat. ²¹ Jesad tou bi tala deif be amrad lahadi ma bi aino, udam tou, al kan ma bi zahir, bi zahir. ²² Hagiga, nefsa tou bi kun gerib min hawia, haya tou min mutu ²³ Lakin kan fi malika al bi hin le huwo, min bain alif malika, bi wori le insan haja al sah le huwo, ²⁴ bi kun kerim ma huwo wa kelimo le Allah, 'Ankizo zol de min ino huwo bi nenzil fi hawia; ana ligo fidia le huwo.' ²⁵ Biga jesim tou bi tala jedid ze ta jena; rija ze zaman huwo kan shabab. ²⁶ Huwo bi seli le Allah, wa Allah bi kun kuwis ma huwo, hata huwo bi aino wosa ta Allah be farah. Allah bi wodi le zol de najah tou. ²⁷ Biga zol de bi guna gidam ta nas tanin wa kelimo, 'Ana amolo katia wa tala min hagiga, lakin ma akibu ana be katia tai. ²⁸ Allah ankizo nefsa tai ashan ma bi waga fi hawia; haya tai bi istemir aino nur.' ²⁹ Aino, Allah bi amolo hajat de kulu le insan, maratain, ³⁰ hata talata marat, ashan huwo bi wala ma nur ta haya. ³¹ Kutu bala, Ayob, wa asuma le ana; kede ita askut wa ana yao bi wonuso. ³² Kan ita der wonuso ai haja , juwabo ana; wonuso, ashan ana bi der asbit ino ita indo hag. ³³ Kan ma zede, izen asuma le ana; askut, wa ana bi deriso ita hikma."