¹ Ana amolo ahad ma ena tai; kef ana bi aino be neya le azra? ² Lean nesib tai bi kon shuno min Allah al fok, wa meras tai min al Gadir al alli? ³ Ana kan bi fekir ino musiba de le nas ashrar, wa karisa le nas al bi amolo katia. ⁴ Hal Allah ma bi aino sikat tai wa idu khatawat tai? ⁵ Kan ana doro be kideb, kan kura tai jere fi gash, ⁶ Kede wozino ana fi mizan al Allah bi arofo kamal tai. ⁷ Kan khatawat tai tala min sika, kan geliba tai ruwa wara ena tai, kan fi katia fi iden tai, ⁸ biga kede ana zara, wa kede zol tan akulu, wa kede zira tai agilao bara. ⁹ Kan geliba tai kabasu ma mara, kan ana wogif wa isten fi bab ta jeran tai ashan mara tou, ¹⁰ yala kede adroso (atano) mara tai le zol tani, wa kede nas tanin num ma heya. ¹¹ Ashan de jerima al kebir; hagiga tou, de jerima bi akibo ma gadi. ¹² Leano de nar al bi akulu ze ta Abaddon (jahanam), wa bi haragu hasad tai lahadi juzor. ¹³ Kan ana aliso shakwa ta kadam tai al raji aw mara fi zaman al humon bi wonuso ma ana, ¹⁴ ana bi amolo shuno kan Allah gum ashan bi hakimo ana? Ana bi juwabo huwo kef? ¹⁵ Allah al kutu ana fi rihim ma yao kutu humon kana? Musu huwo yao al wahid kutu enna kulu fi rihim? ¹⁶ Kan ana abuso nas al masakin ashan bi ligo al fi neya tumon, aw kan ana kutu armal kore fi huzon shedid, ¹⁷ aw kan ana aba shriko aytam fi akul tai, ¹⁸ lakin min zaman al weledo ana, lahadi fi shababia tai yetim de raba ma ana ze abu tou, wa ana kan arshedo uma tou, al armala. ¹⁹ Kan ana aino ai zol bi mutu be sabab gumash ta sekete mafi, aw kan ana aino zol muhtaj ma indo gumash; ²⁰ kan geliba tou ma bariko ana ashan gumash al dadi huwo ligo min suf ta koruf tai, ²¹ kan ana arfa ida le aytam ashan ana arufo ino sheiokh al fi bab ta medina bi dafi le ana, izen kede ita hokimo ana! ²² Kan ana amolo hajat de, izen kede iden tai tala min ketif tai, wa kede iden tai kasuro min mifsal tou. ²³ Leano ana bi kafo damar ta Allah; ashan jalala tou, ana ma agder amolo hajat de. ²⁴ Kan ana kutu raja tai fi dahab, wa ana kelimo le dahab, 'Ana bi teki le ita,' ²⁵ Kan ana nurtah ashan sarwa tai ketir, leano ana limo mumtalakat ketir be wasat iden tai, izen hokimo ana! ²⁶ Kan ana aino shemis bi wala, aw gamara bi daoro fi nor tou, ²⁷ wa kan geliba tai dugu be sir, sibo kasuma tai gabilo iden tai wa abido humon, ²⁸ de kaman jerima bi akibo be mahkama, leano ana aliso Allah al fok al kul. ^{29 30} Kan ana tala farhan fi damar ta ai zol al bi akrah ana aw amolo mubruk le nefsa tai fi zaman karisa kati huwo, kede ita hukumo ana! ³⁰ Hagiga, ana ma rudu kasuma tai ashan bi amolo katia wa laano haya tou. ³¹ Kan nas al fi khema tai nihai ma wonuso, 'De muno al ma akulu akil ta Ayob?' ³² (hata ajnabi ma num fi midan ta medina, ashan ana daiman bi fata abuwab tai le musafirin), wa kan ana ma amolo, kede ita hukumo ana! ³³ Kan ana ze bagi nas, dusu katia tai wa hafizo fi nefsa tai ³⁴ (ashan ana kafu min nas al ketir, ashan ana kafu nas ma bi ihtarim ana, de sibo ana askut wa aba tala bara), kede ita hukumo ana! ³⁵ Ah, ana bi itmana zol kede asuma ana! Aino, de amdda tai; kede al Gadir juwabo ana! Kan fi zol ado tai kede huwo katib shakwa tou! ³⁶ Be jed ana bi arufa fi ketifa tai; ana bi kutu ze taj. ³⁷ Ana bi wori le huwo hisab ta khatawat tai; zo amir al indo siga ana ja gidam tou. ³⁸ Kan de hagiga ana serego ard, turab tou geni ze zol bi kore wa ishteki ana, ³⁹ kan ana akulo hasad tou bedon ma ana dafa aw sibo sedo tou fagido haya tou, ⁴⁰ kede shok gum bedal gemeh wa gesh bedal shair." Kelimat ta Ayob kalaso hini.