¹ Kede ana guna le mahbub tai al kues, guna ta mahbub tai an jinena tuo. Mahbub tai indu jinena fi jebel al indu kusuba. ² Huwo nedifi nedifu huwo, tala hujar bara, wa zara fugu shelera karma al tamam. Huwo abinu buruj fi nus ta jinena, kaman huwo abinu fugu masar. Huwo istenna ashsn kede weled innap, lakin bes weledu innap ta gaba. ³ Hasa intakum sukan ta Urshelim wa rijal ta Yahuza, kede intakum hakimu baiu Ana ma karma tai. ⁴ Shunu al kan mumkin bi amulu le karma tai de aktar min kida, al ana ma amulu le huwo? Wekit ana ja ayinu kan weledu innap, malu huwo weledu innap ta gaba? ⁵ Hasa ana bi weri le intakum ana bi amulu shunu le karma tai de: Ana bi agila hush tuo, Ana bi gilibu le mahal al ganamayat bi akulu fugu, Ana bi kasuru hetta tuo, wa bi dusu falata. ⁶ Ana bi jibu karaba fugu, ma bi nedifu wele bi gata gatu tarf tuo. Lakin shuk wa hsaak yao bi gum fugu. Wa ana bi wedi awamir le sihab kede ma nezil muturu fugu. ⁷ Ashan jinena ta Yahwah ta junud de bet ta Israel, wa Yahuza yao zara al bi farihu huwo; huwo istenna adala, lakin kan katulu; le bir, lakin kan fi kuer le musada. ⁸ Wululu le delin al limu bet le bet, mahal zara le mahal zara, lahadi mafi juwa al fadulu wa intakum baru yao fadulu fi beled! ⁹ Yahwah ta junud kelim le ana, biut ketir bikun faddi, biut kubarin wa giyafin, mafi fugu sukan. ¹⁰ Lanu ashara faddan ta karma bes bi jibu Bath wahid, wa wahid huomar ta buzur bi jibu effa wahid. ¹¹ Wululu le delin al bi gum dsaba bediri ashan bi ashrab merisa, delin al bi asharb be bilel lahadi merisa bi sakran umon. ¹² Umon indu adongo wa rababa, wa duf wa nai, wa kumr fi terebeza ta akil tumon, lakin umon ma bi akrimu haja al Yahwah amulu wele bi ihtaram shukul ta iden tuo. ¹³ Ashan kida shaab tai shilu fi sebi be adam marifa; mugedimin tumon ruwa jianin, wa nas tumon al marufin ma indu haja al umon bi ashrab. ¹⁴ Ashan kida hawiya fatta niya tuo wa fatta kasma tuo kebir; yala shukul baha tumon wa jumhur tumon, wa mugedimin tumon, wa delin al murtahin mon umon, nezil fi hawiya. ¹⁵ Rajil bi asuru nezilu mustawa tuo tihit, wa insan bi kun mutawadi; uyon ta nas al mutkebirin bi nezilu tihit. ¹⁶ Yahwah ta junud bi arafau fi adala tuo, wa Allah al Kudus barau bi weri nefsa tuo kudus be bir tuo. ¹⁷ Yala kurfan bi akulu ze umon fe mahal akulu tumon, wa fi ayi mahal al bi wedi umon fugu, wa kurfan al sukerin bi akulu ze ajanib. ¹⁸ Wululu le delin al bi juru sher be hubal al ma kues. ¹⁹ Wululu le delin al bi kelim, ''Kede Allah istajil, kede huwo ishtakal guwam, ashan anina bi ayinu bi hsail; wa kede kutat ta de al Kudus ta Israel barau hasil, ashan anina bi arufu umon.'' ²⁰ Wululu le delin al bi nadi haja al sher kues, wa al kues sher; al bi mesilu duluma nur, wa nur duluma; al bi mesilu haja al mur hilu, wa al hilu mur! ²¹ Wululu le delin al hukama fi ina tumon, wa bi iftekir be mafaham tumon. ²² Wululu le delin al umon abtal fi ashurubu merisa, wa umon indu kibira fi lakbatu merisa al guwi; ²³ delin al bi beriru sherir be kalam ta rushuwa, wa bi shilu hag ta beri! ²⁴ Ashan kida ze ma lisan ta nar bi akulu gesh, wa gesh al yabis bi waga tihit fi lehib, kaman juzur tumon bi affin. wa zuhur tumon bi afugu ze gubar. De bi hasil ashan umon aba ganoon ta Yahwah Rab al junud, wa ashan umon alisu kelima ta kudus ta Israel. ²⁵ Ashan kida zalan ta Yahwah walau did shaab tuo. Huwo mid iden tuo did umon wa wedi le umon iggab. Lahadi jibal kafu, wa jusas tumon biga ze wasaka fi zawaya ta sikat. Fi kulu de, zalan tuo ma rija lakin iden tuo lisa bi midu. ²⁶ Huwo bi arfa alam le umam min bait, wa bi afugu sufara le delin al fi akir wata. Ayinu, umon bi ja guwam. ²⁷ Mafi zol bi taban wele dugu kura min umon; mafi zol bi tala nasaan wele num. Wele gashat tumon bi fiku, wele hubal ta gizimat tumon bi gata. ²⁸ Laharbat tumon seninu wa kulu daga tumon lifu jahis; kurenat ta hasin tumon ze hadid, wa kurenat at arabat tumon ta harib ze habub. ²⁹ Kure tumon ze assed; umon bi kure ze iyal ta assed. Umon bi gubudu haiwan ta gaba wa bi juru bait, mafi zol al bi angizu. ³⁰ Fi yom dak umon bi kure le haiwan ta gaba ze bahar bi kure. Kan ayi zol ayinu beled de, huwo bi ayinu duluma wa taab; hata nur bi kun duluma be sihab.