¹ Ayinu, Rabuna Yahwah bi ruwa shilu asaya wa musada tuo min Yahuza wa Urshelim: kulu daam ta rekif wa daam ta moyo, ² rujal al uzama wa rujal ta harib, gadi wa nebi, wa de al bi marisu kujur wa shek, ³ rais ta kamsin wa mawatin, zol al bi arshidu nas, wa zol al indu mahara, ta sala hajat. ⁴ Ana bi kutu shabab ketir ze mugedimin tumon, wa al suker yao bi hakimu umon. ⁵ Nas bi ligu taab, ayi min tani, wa kulu zol biligu taab min jeran tuo; jena suker bi shitimu zol kebir, wa al mustawa tuo tihit bi wedi tahadi le de al mustawa tuo fuk. ⁶ Rajil bi amsuku aku tuo fi bet ta abu tuo wa bi kelim, 'Inta indu gumah; kede inta kun hakim ta nina, wa kede mashakil de kulu kun fi iden taki.' ⁷ Fi yom dak de huwo bi kure wa kelim, 'Ana bi kun shafi; Ana ma indu rekif wele gumash. Intakum ma bi kutu ana hakim ta shaab.'' ⁸ Lanu Urshelim dugu kura, wa Yahuza waga, ashan kalam wa amail tumon did Yahwah, bi zalanu uyon ta mejid tuo. ⁹ Ayiinu ta usat tumon bi shahidu did umon; wa umon bi kabaru an katiya tumon ze Sodoma; umon ma bi dusu. Wululu le umon! Lanu umon kamilu sher le badun tumon. ¹⁰ Weri takum le zol al bar bi kun kues, lanu umon bi akulu samar ta shukul tumon. ¹¹ Wululu le sherir! bi kun batal ma huwo, lanu jaza ta iden tuo bi amulu le huwo. ¹² Shaab tai iyal yao bi zolomu umon, wa nuswan bi hakimu umon. Shaab nas al bi gedimu intakum wuduru intakum wa shawishu tijah ta sika takum. ¹³ Yahwah wegif fuk le mukasama; huwo bi wegif ashan bi kasimu shaab. ¹⁴ Yahwah bi ja be hukum did shiuk ta shaab tuo wa mugedimin tumon: ''Intakum akulu min jinena; intakum nakamu min miskin le biut takum. ¹⁵ Malu intakum bi assuru shaab tai wa bi atanu usat ta masakin?'' De yao elaan ta Yahwah ta junud. ¹⁶ Yahwah wunuso kalam de lanu banat ta Sahiun mutkebirin, umon bi durur be ragabta tumon fuk, wa bi amulu harakat be uyon tumon, bi duru be harakat tab kura, bi tala suot min duriya ta kura tumon. ¹⁷ Ashan kida Rabuna bi haligu ras ta banat ta Sahiun abu sala, wa Yahwah bi zahiru fadiya tumon. ¹⁸ Fi yom dak de Yahwah bi tala zinna ta jamala tumon, mukawharat, wa dafair ta ras tumon, ¹⁹ halakat tumon, wa bkibeshat, ma tarhat tumon, ²⁰ ta kati ras, wa silsilat tumon, wa rihat tumon, wa ahraz. ²¹ Huwo bi shilu kawatim wa mukawharat ta anafa, ²² wa gumashat ta Aid , wa Ardia, wa shantat ta ida; ²³ mirayat ta ida, wa manadil ta gutun, wa gitaat ta ras wa, wa gumash al umon bi lifu badn baiu. ²⁴ Bidal rihat al giyafa bi kun afana; wa bida gash, habilbidal shar al munazam kues, shukul kaab; wa bidal gumash al tamam, gumash ta huzun; wa bidal jamala aragu be nar. ²⁵ Rujal takum bi katulu be sef, wa rujal takum al guwin be katulu fi harib. ²⁶ Abuwab ta Urshelim bi kun haznan wa bi kure; wa huwo bi kun barau bi geni fi turab.