¹ Bulus, rasul- ma min nas wele bewasat insaan, lakin Bewasat Yesua al Messih wa Allah al ab al guomu uwu mini mutu ² wa kulu akwana al ma ana, le Kanais ta Galatia: ³ Naima le itakum wa salam min Allah Abu ta nina wa Yesua al Messih, ⁴ al wedi nefsa tuo min ajil kataya ta nina ashan be hariru nina min alam al sherir de, be hasab meshiya ta Allah wa abu ta nina, ⁵ kede mejid rija le uwu lel abed al abidin. Amin. ⁶ Ana bi istagrab itakum bi rija wara guwam min de al nadi itakum be naima ta Messih. Ana mustagarab itakum bi geyiru le Injil tani al barau. ⁷ Ana ma be wunuso inu fi Injil tani barau, lakin fi nas tanin al deru sibu itakum waga wa deru geiru Injil ta Messih. ⁸ Lakin hata luo kan inna aw Malaika min Sama yau beshiru le itakum kalam tani barau min al inna beshiru, kede uwu kun muluwun. ⁹ Ze ma inna wunuso gubal kida, hasa tani ana bi wunuso, ``Kan fi zol beshiru le itakum Injil tani min al itakum asuma, kede uwu kun muluwun.`` ¹⁰ Hal ana hasa gi fetisu gubul min insan wele Allah? Hal ana gi fetisu rida ta insan? Kan ana lisa bi hawil ardi insan, Ana ma kadam ta Messih. ¹¹ Ashan Ana der kele itakum aruf, ya Akuana, Inu Injil al Ana beshiru de ma ta insan. ¹² Ana ma ligu Injil min ayi zol, wele Ana alimu ma alimu. Lakin, de kan be ruoya ta Yesua al Messih le Ana. ¹³ Itakum asuma an Haya tai kan kef fi Yhuodia, kef Ana kan gi itahidu Kenisa ta Allah futu ganoon wa Ana kan bi hawil demiru. ¹⁴ Ana kan gidam kalis min dufat tai, aktar min nas ta belet tai. de yau teriga al kan Ana undu gira kebir le tagalid ta abuhat tai. ¹⁵ Lakin zaman Allah, al kasisu Ana min batna umua tai, wa al nadi Ana be naima tuo, ¹⁶ rudu ashan bizahiru jena tuo fugu Ana, ashan Ana bi beshiru uwu fi nus ta umam, Ana ma shilu mushura min dom aw laham. ¹⁷ Ana ma ruwa le Urshelim le delin al biga rusul gubal Ana. Lakin Ana ruwa le Arabia wa bat kida Ana rija le Damashk. ¹⁸ Wa bat talata senna Ana ruwa lakadi fi Urshelim ashan ruwa itaaraf le Safa wa Ana geni ma uwu kamistashr yom. ¹⁹ Lakin ma ayinu rusul delin ile Yagub bes, aku ta Rabana. ²⁰ Haja al Ana bi katibu le itakum, Ana bi akidu le itakum gidam ta Allah ibu Ana ma gi kabasu. ²¹ bat kida Ana ruwa le bilad ta Suriya wa Kilikia. ²² Ana sheksian ma maruf le Kanais ta Yahudia al fi al Messih. ²³ Umun bes asuma gi wunuso, ``Zol al kan gi itahidu inna hasa biga bi beshiru Iman al uwu hawil demiru. ²⁴ Umun mejidu Allah ma kalam tai.