¹ Wa bad arbatashar senna Ana ruwa le Urshelim tani mara ma Barnab, Ana shilu Titus ma Ana swa. ² Ana ruwa ashan rouya wa weri le umun Injil al Ana beshiru fi nus ta umam. Ana wunuao be teriga kas le delin al bibainu muhimin, asahn bi akidu idnu Ana ma kan bi jere- aw Ana jere kasara. ³ Lakin hata weleTitus, al ka ma Ana al kan Igrigi, asuru uwu ashan bikun mutahar. ⁴ Akuwana al kadabin umun dakalu be sir ashan bejesisu huriya ta nian fi al Messih Yesua. Umun indu niya ashan bi amulu inna abeed, ⁵ lakin inna ma Asuma le umun wele lahza, ashan hagiga ta Injil bi fadulu ma itakum. ⁶ Lakin delin al bi amulu badun tumun muhimin ( ma muhim le Ana umun kan shunu, Allah ma bi weri tefriga) - delin , al Ana kelim umun bi bainu muhim umun ma gi zidu le Ana ayi haja. ⁷ Bel aksi, Ana biga mushkul be beshiru Injil le delin al ma mutaharin, bes ze ma Buturus kaman mushkul be Injil le delin al mutaharin. ⁸ Ashn Allah al ishtakal fi buturus be risal le delin al mutaharin, kaman ishtakal fugu Ana le umam. ⁹ Zaman Yagub, Safa, wa Yuhanna, al kan arufu umun ze delin al bi abinu kenisa, fahimu naima al wedi le Ana, umun wedi eda al yemin ta sherika le Ana wa Barnaba. Umun amulu kida ashan inna biruwa le Umam, wa umun biruwa le delin al mutaharin. ¹⁰ Umun asalu min inna bes ashan bizekiru nas al masakin, haja al Ana bi ihtam ashan bi amulu. ¹¹ lkin zaman Safa(buturus) ja le Antakiya, Ana aridu uwu fi gidam tuo ashan kan indu loum. ¹² Lanu gubal ma fi nas ja min Yagub, Safa ( Buturus) kan gi akulu ma Umamin. Lakin zaman Rujal de ja uwu wugifu wa ruwa baid min Umamin. Lanu uwu kan bi kafu min delin al deru tuhur de. ¹³ Bardu bagi Yahudin dum le temsilia de. Hata Barnaba kabasu be temsilia tumun de. ¹⁴ Lakin zaman Ana ayinu inu uslub tumun kan ma gi ruwa wara hagiga ta Injil , ana kelim le Safa (Buturus) fi gidam tumun kulu, Kan Itta Yahudi lakin gi ish ze Umami ma ze Yahudi, kef itta bi asuru umamin ashan bi ish ze itta. ¹⁵ Inna be nefus ta nina yahudin be melad ma Umamin al kuta; ¹⁶ wa lisa inna arufu inu mafi zol bi bariru be amal ta ganoon lakin bewasat iman fi Yesua al Messih asahn bi beriru inna bewasat iman fi Yesua ma be amal ta ganoon. Ashan mfi gisim bi agder bariru be amal ta ganoon. ¹⁷ Lakin luo, inna ze ma gi fetishu tebrir fi Al Messih, inna zatu ligu inna kuta, hal al Messih bi shajau katiya? Tabaan la! ¹⁸ Ashan kan Ana bi demiru hajat al Ana abinu, Ana gi weri inu Ana be nefsa tai zol ta kasuru ganoon. ¹⁹ Ashan bewasat ganoon Ana mutu le ganoon, ashan Ana bi hai le Allah. ²⁰ Selibu Ana ma al Messih. De ma Ana yau bega gi ish, Lakin al Messih Aish jua Ana. Haya al hasa Ana gi ish fugu gisim de Ana ish bi iman fi Jena ta Allah, al hibu Ana wa wedi nefsatuo min ajil Ana. ²¹ Ana ma bi sibu naima ta Allah be safa tani, ashan luo shukul bir biligu be ganoon, manau al Messih mutu kusara.