¹ Kelima ta Yahwa ja le ana tani, gal, ² ''Ita gasit sunu, inta al ayenu misaal an ard ta Israel wa gal, 'Abuhat akulu enab, wa sunun ta iyal biga tegil'? ³ Ze ma ana hai__de yau elan ta Rabuna Yahwa__hagiga tan ma bi kun fi hinak tani munasaba le inta ashan bi istakdim misaal de fi Israel. ⁴ Kun guwi kulu haya de tai__haya ta abu kaman ze haya ta jena, humon tabe le ana! nefs al bi amulu kataya yau al bi mutu! ⁵ Sunu yau bi kelimu ann zol al kwes wa al bi amulu adala wa kwes__ ⁶ kan huwo ma akulu fogo jebel aw ma arufa fok uyuun tou le asnam ta bet ta Israel, wa huwo ma karabu mara ta jiraan tou, wele ja gerib le mara fi sharr ta dowora ta heya, hal huwo zol kwes? ⁷ Sunu yau bi kelimu ann zol al ma asuru aye zol, wa huwo rija wara le zol al huwo shilu dein minu haja al huwo kutu ze amini le dein, wa huwo ma seregu lakin huwo wodi akil tou le jaa'n wa kati ariyan ma gumash, hal huwo zol kwes? ⁸ Sunu yau bi kelimu ann zol al ma bi hasibu rebeh ketir fi gurush al huwo deinu wa huwo ma shilu rebeh ketir le haja al huwo bi beyuu? Bi wonusu inu huwo bi amulu adala wa bi asisu amana bein ta nas. ⁹ Kan zol de doworu fi qawaniin tai wa hafisu awamir ashan bi bi kun amin, yalla waad le zol al kwes yau ze de: Huwo be hagiga bi ish!__de elan ta Rabuna Yahwa. ¹⁰ Lakin kan huwo indu jena al bi kubo dom wa kan aye min hajat del al zekiru, (Hata kan abu tou ma amulu aye min hajat del). ¹¹ Huwo akulu fok jubal wa karabu mara ta jeran tou, sunu yau bi klimu ann huwo? ¹² Zol de bi asuru al meskin wa al muhtaj, wa huwo bi amsuku wa seregu, wa huwo ma rija waadu, wa huwo arufa fok uyuun tou le asnam wa amulu hajat batal, ¹³ wa huwo deinu gurush ma rebeh ketir wa amulu rebeh ketir fi haja al huwo bi biu, hal zol bi ish? Hagiga tan huwo ma bi ish Huwo be hagiga bi mutu wa dom tou bi kun fogo huwo leanu huwo amulu amulu hajat al kulu ma kwes. ¹⁴ Lakin kun guwi! iza kan fi zol al weledu jen, wa jena tou ayenu kulu kataya al abu tou amulu, wa fekiri huwo ayenu humon, huw ma amulu aye haja. ¹⁵ Jena dak ma akulu fok jubal, wa huwo ma arufa uyuun tou le asnam ta bet ta Israel, wa huwo ma karabu mara ta jeran tou, sunu tay bi kelimu ann huwo? ¹⁶ Jen dak ma asuru aye wahid, aw amsuku waad, aw ashilu hajat al seregu, lakin wodi akil tou le al jaan wa kati ariyan ma gumash. ¹⁷ Jena dak ma asuru aye wahid aw shilu maslah fok kalis aw amulu rebeh ketir ta dein, lakin huwo amulu awamir wa doworu hasab qawaniin tai; jena de ma bi mutu ashan katiya ta abu: Huwo be hagiga bi ish! ¹⁸ Abu tou, min ma huwo asuru tanin be zuluum wa seegu aku tou, wa amulu haja al ma kwes fi nus ta nas tou__kun guwi, huwo bi mutu fi katiya tou. ¹⁹ Lakin int kelim, 'Malu jena ma indu katiya ta abu tou?' Leanu jena bi amulu adala wa al birr wa bi hafisu kulu qawanin tai; huwo bi amulu. Huwo bi ish be hagiga! ²⁰ al bi amulu katiya, huwo yau al bi mutu. Jena ma bi ashilu kataya ta abu, wa abu ma bi shilu kataya ta jena. Al birr ta zol al bi amulu adil bi le nefsa tou, wa al sharr ta al sharir bi fogo nefsa tou. ²¹ Lakin kan al sharir gelibu min kulu kataya tou al huwo amulu, wa hafisu kulu qawanin tai wa amulu adala wa birr, yalla huwo bi hagiga bi ish ma bi mutu. ²² Kulu mukhalafat tou ma bi zekiru tani fogo huwo. Huwo bi ish biwasat birr al huwo bi marisu. ²³ Hal ana bi frah azim fi mutu ta sharir__de yau elan ta Rabuna Yahwa__wa ma fi rija tou al beid min sika ashan huwo bi ish? ²⁴ Lakin kan al zol al barr gelibu bara min birr wa amulu katiya wa marisu fagarat ze kulu fagarat al zol al sharir amulu, yalla biga huwo bi ish? Kulu birr al hwuo amulu ma bi zekiru zalamn al huwo khunu ana. Fa huwo bi mutu fi kataya al huwo amulu. ²⁵ Lakin ita kelim, Sika ta Rabuna ma adil! Asuma, bet ta Israel! Hal sikat tai ma adil? Hal ma sikat taki yau ma adil? ²⁶ Zaman al kan inan al barr gelibu min birr tou, wa amulu kataya wa mutu ashan katiya de, yalla huwo mutu fi katiya al huwo amulu. ²⁷ Lakin kan rajil al sharir gelibu bara min sharr tou al huwo amulu wa amulu adala wa birr, yalla huwo bi hafisu haya tou. ²⁸ Leanu huwo ayenu wa gelibu bara min kulu mukhalafat al huwo amulu. be hagiga huwo bi ish wa huwo ma bi mutu. ²⁹ Lakin bet ta Israel kelim, 'sika ta Rabuna ma adeil,! Kef sika tai ma adeil, bet ta Israel? sika taki yau ma adeil, ³⁰ Ashan keda ana bi hukumu kulu zol fi nus takum hasab sikat tou bet ta Israel__de elan ta Rabuna Yahwa. Tub wa rgelibu bara min kulu sikat taki ta mukhalafat ashan inta ma bi waga be katiy. ³¹ Jada bara min nefsa taki kulu al mukalafat al ita amulu; amulu le nefsa taki gelba jedid wa roho jedid. Lei inta bi mutu, bet ta Israel? ³² Leanu ana ma farahan fi mutu ta zol al mutu__de yau elan ta Rabuna Yahwa__fa tub wa ish!''