¹ F i yom dak Melik Ahasuerus wodi mumtalakat ta Haman le Melka Esther, adu ta Yahudiin, wa Mordecai bada khadimu gidam melik, Esther kelim(haki) le melik Mordecai geribu kef. ² Melik shalu katim touu, al kan huwo rajau min Haman, wa wodi le Morecai. Esther kutu Mordecai ashan bi kun mosul fi vila ta Haman. ³ Bad dak Esther wonusu tanimara le melik. Hiya naim wosu tehet wa kore ze hiya bi asalu huwo ashan bi kutu nihaya le kuta al shar ta Haman al agagite, le khuta al huwo fekiru did Yahudiin. ⁴ Bad dak melik arfa dahab tou ta sulta le Esther, hiya gam wa wagaf gidam melik. ⁵ Hiya kelimu, Iza kan huwo ajibu Melik, wa iza kan ana ajibu ena ta melik, kan hajat del kwes gidam melik, wa ana kwes fi ena tou, kede katibu karar ashan bi sahibu juwabad al katibu be Haman weled ta Hammedatha al Agagite, Juwabad al huwo katibu ashan bi demiru Yahudiin al fi Abrasia(wilaya) ta melik. ⁶ Fa kef ana bi istahmal ashan bi ainu karisa bi waga fi ras nas tai? Ana bi istahmal kef ashan sufu demar ta Usra(nas) tai?" ⁷ Melik Ahasuerus kelimu le Melka Esther wa Le Mordecai al yahudi, "Ainu, Ana wodi le Esther bet ta Haman, wa humon haligu(kanagu) huwo fi shenek, leanu huwo kn bi rua ashan hajimu Yahudiin. ⁸ Katibu karar tani le Yahudiin fi isim ta melik wa khatimu be khatim ta melik. Fa le karar al kalas katibu fi isim ta melik wa khatimu be khatim ta melik ma bi sahibu." ⁹ Bad dak nadi ulama ta melik fi zaman dak, fi shahar nimra talata, al huwo shahar ta Sivan, fi yom talata wa ishirin bita shahar. Katibu karar al fogo kulu hajat(kalam) al Mordecai kan bi khudu be kusus bita Yahudiin. Katibu le wula ta wilayat, wula wa dubad ta wilayat al fi India le Cush, 127 wilayat, le ai wilaya katibu be hasab kitaba tomon, wa Yahudiin hasab kitaba wa rutan tomon. ¹⁰ Mordeci katibu fi isim ta Melik Ahasuerus wa khatimu be khatim ta melik. Huwo rasulu juwabat de be nas al bi shilu juwabat al bi sugu hasin al seri al istamilu fi khadamat ta reis, husan zakar al hadis ta melik. ¹¹ Melik wodi izin le Yahudiin al gaidin fi ai medina ashan bi limu fi mahal wahid wa wogif ashan bi hami haya tomon: ashan bi yabad, katulu, wa ashan bi demiri jesh min ai nas au wilayat al hajimu humon, iyal wa nusuwan fogo, au bi shilu mumtalakat tomon. ¹² De bi bada fi kulu wilayat ta melik Ahasuerus, fi yom talatasar ta shahar nimra itnasar, al huwo shahar ta Adar. ¹³ Sura ta karar de bi talau ze ganun wa bi kutu bara le nas kulu. Yahudiin bi kun jahiz fi yom dak ashan bi augu(shakilu) adu tomon. ¹⁴ Yala nas al bi shilu juwabad del sugu hasin ta melik al istakdimu fi khidma ta rais. Humon ruwa bidun daya zaman. Karar ta reis kaman talau min kasra al fi Susa. ¹⁵ Bad dak Mordecai sibu melik libisu libsa ta muluk zahari wa abiad, be taj al dahab wa habil gumas al ahmar ta gumas naim, wa medina ta Susa Sarak wa itmata(farhanin). ¹⁶ Yahudiin indum saada wa farah, wa ihtiram. ¹⁷ Fi kulu wilaya wa fi kulu medina, fi ai makan al karar ta melik wosulu, fi saada wa farah bein Yahudiin, iid wa ijazah. Kutar min beina noo ta nas ta ard de biga Yahudiin, leanu kof ta Yahudiin waga fi ras tomon(leanu humon biga kaifin minYahudin).