¹ Bad hajat del, zaman zel ta melik Ahasuerus nazal. huwo fakar an Vashti wa haja al hiya amulu. Huwo fakar an karar al huwo talau didi huwo. ² Bad dak shabab al bi khadimu le melik kelimu, "Kede amulu teftis le banat azra be niyaba ta melik. ³ Kede melik ainu dubad fi wilyat kulu ta momlaka tou, ashan bi limu banat azra al jemilin fi mahal wahid fi kasra ta harim fi mahal gowi ta Susa. Kede kutu humon fi tehet musulia ta Hagai, dabid ta melik, al mosul ta nasawin, wa kede huwo wodi riha le humon. ⁴ Kede biniya suker al melik der tala melka fi khana ta Vashti." Irshad de kutu melik tala farhan, wa huwo nafizu. ⁵ Fi Yahudi tani fi mahal gowi ta Susa al isim tou Mordecai weled ta Jair weled ta Shimei weled ta Kish, al min usura ta Benjamin. ⁶ Shalu humon min Urselim le doula tani ma Jehoiachin melik ta Judah, al melik Nabuchadnezzar ta Babylonia shalu. ⁷ Huwo kan bi ainu Hadassah, al huwo Esther, biniya ta khal tou, leanu hiya ma indu abu wele uma. Bit de jemil wa kan zahir mahbub. Mordecai shalu hiya ze biniya tou. ⁸ Zaman alinu awamir wa karar ta melik, jabu nasawin kutar al sukerin fi Susa. Kutu humon tehet musulia ta Hegai. Shalu Esther kaman le kasra ta melik wa tehet musulia ta Hegai, kebir ta nasawin. ⁹ Biniya ajibu huwo, wa gabilu hiya. Tuwali huwo wodi le hiya riha wa akil . Huwo wodi banat le hiya sabah al khudam min kasra ta melik, wa huwo rahalu hiya ma banat al khudam de le mahal al khas fi oda(bet) ta nasawin. ¹⁰ Esther ma wori usura tou le ai zol, Mordecai amiru hiya . ashan ma bi wori. ¹¹ Mordecai daiman bi douru fi gidam saha ta bet al nasawin de bi geni fogo, ashan arufu hala ta Esther, wa haja al bi amulu le hiya. ¹² Zaman fursa ja le ai biniya ashan bi ruwa le Melik Ahesuerua- be asab gawanin ta nasawin, ai biniya bi timu itnasar shahar ta jamala, sita shahar be zed mura, wa sita be riha- ¹³ Kan biniya suker ruwa le melik, ai haja al hiya deru bi wodi le hiya min oda ta nasawin, le hiya ashan bi shilu le kasra. ¹⁴ Fi misa hiya bi ruwa juwa, wa fi sabah hiya bi raja le oda nimra itnin ta nasawin, wa fi raaya (musulia) ta Shaasgaz, dabid ta melik, al mosul ta mahzia. Hiya ma bi rija le melik tani ila kan ajibu huwo wa nadi hiya tanimara. ¹⁵ Hasa zaman wokit ta Esther ja(bit ta Abihail, khal ta Mordecai, al shalu hiya ze bit tou) ashan bi ruwa le melik, hiya ma asalu ai haja lakin haja Hegai dabid ta melik, al mosul ta nasawin, fekir. Hasa Esher ligo gubul ta kulu al shafu huwo. ¹⁶ Shalu Esther le Melik Ahasuerus fi bet melik fi shahar nimra ashara, al huwo shahar ta Tebeth, fi sena nimra saba ta hukum tou. ¹⁷ Melik hibu Esther aktar min nasawin al tanin wa hiya ligo gubul gidam huwo, aktar min azra al tanin. Bad kida huwo kutu taj fi ras tou wa kutu hiya ashan bikun melka bidal Vashti. ¹⁸ Melik nazimu hafula kebir le dubad wa khudan tou kulu, "Hafula ta Esther," wa huwo wodi ihasa min daraib le wilayat. Huwo wodi hadayat asab kwes tou. ¹⁹ Hasa zaman jamau azra de sawa tanimara, Mordecai kan bi geni fi bab hoz. ²⁰ Esther lisa ma wori le ai zol an usura tou au shab tou, ze Mordecai wori le hiya. Hiya istemir ashan bi tabi irshad ta Mordecai, ze hiya amulu zaman huwo raba hiya. ²¹ Fi ayam dak, ze Mordecai bi geni fi bab hoz ta Melik, itnin min dubad ta melik, Bigathana wa Teresh, al bi harisu bab, tala zalanin wa fakar ashan augu Melik Ahasuerus. ²² Zaman kalam de wori le Mordecai, huwo wori le Melka Esther, wa Esther wori le Melik fi isim ta Mordecai. ²³ Hagigu taharir de wa sabad, wa rijal al itnin del haligu fi shenek. Kalam de katibu fi kitab ta akbar al ayam fi gidam ta melik.