¹ Ana ayinu Rabuna bi wegif jambu mazbah, wa huwo wunuso, ''Drubu ras ta habudat ashan asasat tuo bi hizu . Kasuru umon le hita hita fi ras tumon kulu, wa ana bi katulu akir tumon be sef. Mafi wahid min umon bi tefes; wele wahid min umin bi jere. ² Hata kan umon hafura fi hawiya, hinak iden tai bi shilu umon. Hata kan umon nutu fuk le sama, min hinak ana bi nezilu umon tihit. ³ Hata kan umon dosu fi ras Karmal, Ana bi fetishu umon wa shilu umon. Hata kan umon dusu min gidam tai fi nus ta bahar, min hinak Ana bi wedi awamir le debiba bi adi umon. ⁴ Hata kan shilu umon fi sebi, be adu tumon gidam tumon, hinak Ana bi wedi awamir le sef, wa bi katulu umon. Ana bi kutu uyon tai fugu umon le amulu kaab ma kues.'' ⁵ Rabuna Yahwah ta Junud bi lemesu wata wa bi sih; kulu delin al bi geni fugu bi kure; uwu kulu bi gum fuk ze bahar, wa bi mala tani ze bahar ta Masir. ⁶ De huwo yao abinu katwat tuo fi samawat, wa asisu wata sihab tuo fuk ard. Huwo bi nadi moyo ta bahar, wa bi kubu umon bara fi wata, Yahwah isim tuo. ⁷ ''Hal intakum ma ze shaab ta Kush le ana, ya shaab Israel - de yao elaan ta Yahwah - hal Ana yao ma tala Israel bara min beled ta Masir, wa Falastiniin min Kafatur, wa Aramiin min Gir? ⁸ Ayinu takum, uyon ta Rabuna Yahwah fi mamlaka ta katiya, wa Ana bi demiro min ard, ele bes bet ta Yagub yao Ana ma bi demiro ta kulu kulu - de elaan ta Yahwah. ⁹ Ayinu takum, Ana bi wedi awamir , wa Ana bi gurbalu bet ta Israel min nus ta duoal kuliu, ze zol al bi gurbalu geme fi gurbal, ashan hata wele hujar al sukerin bi waga tihit fi wata. ¹⁰ Kulu kuta ta shaab tai bi mutu be sef, delin al wunuso, 'Karisa ma bi ja le anina.' ¹¹ Fi yom dak Ana bi arfa kaima ta Dauod al waga, wa bi gufulu hufurat tuo. Ana bi arfa karabu tuo, wa biga abinu ze fi ayamat al gedim, ¹² Ashan umon bi werisu bagi ta Adom, wa kulu umam al bi nadi ma isim tai - de elaan ta Yahwah- huwo bi amulu de. ¹³ Ayinu takum, ayamat bi ja - de elaan ta Yahwah - wekit al zol al bi kuruju bi asuru inab, wa tajir ta inab bi gilibu de al bi kuruju buzur. Jubal bi naga kumur, wa kulu murtafaat bi dufugu uwu. ¹⁴ Ana bi rija shaab tai wara min sebi. Umon bi abinu mudon al karabu wa nas bi geni fugu, umon bi zarau karama wa bi ashurubu min kumur tumon, wa umon bi amulu jinenat wa bi akulu simar tuo. ¹⁵ Ana bi zara umon fi wata tumon, wa ma bi agilau umon tani mara min wata al Ana wedi le umon,'' Yahwah Allah taki bi kelim.