¹ De haja al Rabuna Yahwah zahiru le ana. Ayinu, Huwo bi amulu jarad fi giam ta gesh, wa ayinu, de bat hasat al awel ta melik. ² Kan umon kalasu akulu kudar ta wata, yala Ana kelim, ''Rabuna Yahwah, arjuk kede inta samihu; Yagub bi naja kef? Lanu huwo suker kalis.'' ³ Yahwah andam be kalam de. ''Ma bi hasil,'' Huwo kelim. ⁴ De kalam al Rabuna Yahwah zahiru le ana: Ayinu, Rabuna Yahwah bi nadi nar ashan bi hukumu. Aragu mahal zara, wa moyo ketir tihit wata al kan bi abula wata kaman. ⁵ Lakin Ana kelim, ''Rabuna Yahwah, rjuk wegifu; Lahadi miten Yagub bi naja? Lanu huwo suker kalis.'' ⁶ Yahwah andam be kusus ta kalam de, ''De kaman ma bi hasil,'' Rabuna Yahwah yao kelim. ⁷ De haja al huwo zahiru le ana: Ayinu, Rabuna wegif be taraf ta hetta, be kartush fi iden tuo. ⁸ Yahwah kelim le ana, ''Amos, inta bi ayinu shunu?'' Ana kelim, ''Kartush'' Yala Rabuna kelim, ''Ayinu, Ana bi kutu kartush fi nus ta shaab tai Israel. Ana tani ma bi arham umon. ⁹ Murtafaat ta Is-hak bi demiro, wa bi karabu mahalat ta Israel al mukadas, wa Ana bi gum did bet ta Yarubaam be sef.'' ¹⁰ Yala Amasiya, al kahind, rasulu risala le Yarobaam, melik ta Israel: ''Amos amulu fittna le inta fi nus ta Israel . Wata de ma bi ageder ithamal kalamat tuo de kulu. ¹¹ Ashan de yao kalam al Amos kelim, 'Yarobaam bi mutu be sef, wa be kulu takid Israel bi ruwa fi sebi min beled tuo.'' ¹² Amasiya kelim le Amos, '' Ayinu takum, ruwa takum, jere takum wara le beled ta Yahuza, wa akulu esh wa itnaba hinak. ¹³ Lakin mata itnaba tanio mara hini fi Bet Il, lanu de makdas ta melik wa bet al muluki.'' ¹⁴ Yala Amos kelim le Amasiya, ''Ana ma nebi wele weled ta nebi. Ana rajil ta bahaim, wa bi ayi8nu wara ginen ta ashjar tin. ¹⁵ Lakin Yahwah shilu ana min ayinu wara ganamayat wa kelim le ana, 'Ruwa wa itnaba le shaab tai Israel.' ¹⁶ Hasa asuma takum kalam ta Yahwah. Intakum kelim, 'Mata itnaba did Israel, wa mata wunuso did bet ta Is-hak.' ¹⁷ Ashan kida de kalam al Yahwah bi kelim, 'Matra taki bi kun zania fi medina; awlad taki wa banat taki bi katulu umom be sef; beled takum bi gisu wa bi gesimu; intakum bi mutu fi wata al nijis, wa be kulu takid Israel bi shilu fi sebi min beled tuo.'''