¹ Wa Kaman tani mara zalan ta Yahwa waga did Israel, huwo hariku Daud did Humon wa kelim, “Amshi, hasibu adad ta Israel wa Yahuza” ² Melik kelim le Yuab kaid ta Jesh, al kan fi ma humon, “Amshi lifu fi kulu gabail ta Israel, min dan lahadi Beersheba, wa rujal al jahiz le harb. ³ Yuab kelim le melik, “kede Yahwa Allah taki zidu adad ta shaab miya marat, wa kede ena ta sidu tai al melik aynu bi hasil. Lakin le sidu al melik deir kida?” ⁴ Kan kalam ta melik nihaya did Yuab wa jesh tala bara min gidam ta melik ashan humon bi hasibu adad ta shaab ta Israel. ⁵ Humon lifu fi ordon wa ruwa geni gerib ma Aroer, fi wadi junub ta medina. Wa Kaman humon safir wa mururu min nus ta jad lahadi Yazir. ⁶ Humon ja fi jelaad wa lahadi fi wata ta tahtim. Hodshi, wa lahadi Dan yaan wa lifu fi sidon kulu. ⁷ Humon wosulu fi muaskar ta sur wa fi kulu beled ta nas Hawin wa ta nas Canaanin. Wa humon tala bara lahadi fi najaf fi yahuza wa Beersheba ⁸ Wokit humon douru fi kulu mahalat del, humon gum rija wara Orshelim fi nihaya ta tisa shuhur wa Ishirin ayam. ⁹ Yuab gum wori adad ta nas al bi agder harib le melik kan fi Israel 800,000 rujal negitinn al bi agder dugu sef, wan as ta Yahuza adad tomon kan kulu 500,000 rajil. ¹⁰ Geliba ta Daud bada dugu baad ma huwo hasibu adad ta nas del. Huwo kelim le Yahwa, “ana amulu katiya kebir kalis ashan ana amulu zede. Hasa, Yahwa, kede inta shilu katiya ta kadam taki bara, ashan ana amulu be shokol belid,” ¹¹ Wokit Daud gum sabah min num, kalam ta Yahwa ja le nebi jad, muragib ta Daud kelim, ¹² Ruwa wori le Daud: “De yau Yahwa kelim: Ana bi wodi le inta talata hajat. Hazilu wahid min fogo” ¹³ Jad ruwa wa kelim ma Daud, “Sei talata sena jiyan bi ja fi wata takum? Wole inta bi jere talata shahar min adu taki wa humon bi ja wara taki? Wole bi kun fi talata ayam waba fi wata taki? Hasa kede inta akudu karar yatu juwab ana bi rija le huwo al rasulu ana? ¹⁴ Daud gum kelim, “Ana fi mush kila kebir kede nina woga fi idan ta Yahwa aker min idan ta zol, ashan rahma bito kebir kalis. ¹⁵ Biga Yahwa rasulu waba le Israel min sabah lahadi fi zaman al huwo yau kutu, wa sebein nas mutu min dan lahadi Beersheba. ¹⁶ Wokit malika kutu idan bito ashan bi demiru orshelim, yahwa gum geriru fikira bito ashan kusarat al bi hasil, wa huwo kelim le malaika al kan bi demiru nas del, “kifaya, juru idan taki wara” zaman dak kan malaika to Yahwa bi wogif fi tahuna degig ta aruna ta Yabusi. ¹⁷ Daud bada wonusu ma Yahwa wokit huwo aynu malaika hujumu shaab, huwo kelina, “Ana yau amulu katiya, wa ana amulu be galat. Lakin korufat del, humon amulu sunu? Kede idan taki adibu ana ma nas bet ta abu tai. ¹⁸ Min hinak Jad ja le Daud fi yom dak wa kelim, “Ruwa fok wa Abinu mazbah le Yahwa fi tahuna degig ta Aruna ta Yabusi hinak. ¹⁹ Daud gum ruwa fok ze Jad kelim le huwo ze talimat ta Yahwa. ²⁰ Aruna aynu bara melik jai ma kadamin bito. Aruna gum tala bara wa dengir tehet fi wata be wusa le melik. ²¹ Aruna kelim, “kelim, le sidi tai melik bi ja le ana, be kadamin bito?” Daud juwabu, “ashan bi biyu tahuna degig taki de, ashan ana bi agder abinu mazbah le Yahwa, ashan kede shilu waba de bara min shaab” ²² Aruna kelim le Daud, “shilu ze taki, sidi tai melik amulu be haja al kuwes inta aynu fi safa taki aynu, bagara ta zebiha al bi haragu de, wa hajer tahuna wa tor al bi ishtakal de bi haragu kulu. ²³ Kulu hajat del, ya melik tai, ana Aruna bi wodi le inta.” Biga huwo kelim le Melik, “kede Yahwa Allah taki rudu inta” ²⁴ Melik kelim le Aruna, “la ana lazim bi biju be gurush. Ana ma bi agder gedimu haja ta majani zebiha le Yahwa” biga Daud gum biyu tahuna degig de ma tor de kulu be kimsin shakel ta fida. ²⁵ Daud abina mazbah le Yahwa hinak wa gedimu fogo zebihat al bi haragu wa zebihat ta limu kuwes. Biga Yahwa juwabu salawat al arfau be sabab ta wata, wa waba al kan bi ja le Israel