¹ Wa kan zaman yahwah gi shilu eliyah le sama be wasat hawa shedid. Eliya ruwa ma eliya min gilgal. ² Eliya kelimn le eliyash min fadlak, geni hini ashan yahwah rasulu ana le betal eliyasha juwabu, yahwah hai wa inta hai, ana ma bi sibu inta. Biga humon ruwa le bietel, ³ Abna ta anbiya al kan fi bietel jaa le eliyasha wa kelim le huwo, hal inta arufu enu yahwah bi shilu haya said taki min inta alella? Eliyah juwabu, naam ana arufu lakin ma keli inta wonusu aan haja de ⁴ Eliyah kelim le huwo, Elisha min fadlak, intezir hini ashan yahwah rasulu ana le ariha. Biga Elisha juwabu, ze yahwah hai wa inta hai, ana ma bi sibu inta biga humon ruwa le ariha. ⁵ Biga abna ta anbiya al kan fi ariha jaa le Elisha wa kelim le huwo, hal inta arufu inu yahwah bi shilu haya ta said taki alella? Elisha juwabu, naam ana arufu, lakin ma keli inta wonusu aan haja de ⁶ Biga eliya kelim le huwo min fadlak intezir hini ashan yahwah rasulu ana le urdon. Elisha juwabu yahwah hai wa inta hai, ana ma bi sibu inta, biga humon al itniin ruwa sawa. ⁷ Wa khamsin min abna ta anbiyaa wogifu gedam humon bi masafa wa humon al itniin deel wogifu fi taraf nahri al urdon ⁸ Eliyah shilu taraf jelebiya tou wa robutu huwo, wa dugu bahar magita de, bahar gesimu le itniin atraf wa humon al itniin deel douru fi mahal al nashif ⁹ Wa baad humon gata bahar, eliyah kelim le elisha, talabu min ana haja ashan an bi amulu le inta gubal ma shilu ana min inta. Elisha juwabu, min fadlak keli roho al inta indu de jaa le ana itniin marat ¹⁰ Eliyah juwabu, inta asalu haja al saab shedid lakin, iza inta ainu shilu min inta haja de be hasiil le inta lakin iza kan inta ma ainu ana, ma bi hasiil." ¹¹ Ze humon lisa gi douru, faaja arabiya min nar wa hasiin min nar zahiir, wa gesimu itniin nas deel min baad tomon, eliyah ruwa bi hawa le sama ¹² Eliisha kan gi ainu wa huwo kore shedid, abu tai, abu tai arabat ta israel wa nas al gi arkab hasiin, huwo ma ainu eliyah tani mara, wa huwo amsuku gumash tou wa seretu humon le itniin. ¹³ Huwo shilu gumash ta eliyah al kan waga min huwo wa huwo rijaa wara wa wogif ti taraf nahri urdon ¹⁴ Huwo dugu bahar gumash ta eliyah de wa huwo kelim, wenu yahwah, allah ta eliyah? Zaman huwo dugu moyo de, moyo gesimu le itniin atraf wa elisha gata le taraf al tani. ¹⁵ Zaman abina ta anbiya al min ariha ainu huwo gedam tomon, humon kelim, roho ta eliyah nezil le elisha biga humon ashan bi gabilu huwo wa humon dengiri gedam huwo ¹⁶ Humon kelim le huwo, asuma hasa, min biena khudam taki fii khamsin rujal al gowiin. Keli humon ruwa, nina bi asalu wa fetishu said taki, yemkin roho ta yahwah shilu wa jada huwo fii jebel aw fii wodi tani, elisha juwabu, laa ma keli intu rasulu." ¹⁷ Lakin zaman humon hanisu shedid fadiya amulu elisha wa huwo kelim, keli intum rasulu humon, biga humon rasulu khamsin rajil wa humon fetishu le mudat talata yom, lakin humon ma ligo huwo ¹⁸ Humon rijaa le elisha wa huwo kan gi geni fi ariha wa huwo kelim le humon, ana kan ma kelim le intum gal keli intum ma ruwa?" ¹⁹ Ruja ta medina kelim le elisha, asuma, nina gi asalu inta, hala ta medina kwes ze ma inta gi ainu, lakin moyo de batal wa turab ma kwes ²⁰ Elisha juwabu, jebu takum le ana sahan wa wodi melih fogo wa humon jebu le huwo. ²¹ Elisha ruwa le ana ta moyo wa kubu melil de fogo, wa huwo kelim, yahwah kelim, ana aliju moyo de min hasa le gedam ma bi kun fii mutu aw ardi al ma gi antij ²² Biga moyo kan tala kwes lahadi yom ta hasa. Bi wasat kelim al elisha kan kelim. ²³ Biga elisha ruwa min hinak le bietel wa ze huwo kan gi douru fi sika shabab sukeir kan jaa min medina wa gi hagiru huwo, humon le huwo tala fok ya abu salaa, tala fok ya abu salaa ²⁴ Elisha ainu wara tou wa huwo ainu humon, huwo nadi yahwah ashan bi laanu humon biga itniin duob tala min gaba awugu itniin wa arbein min shabab de ²⁵ Biga elisha ruwa hinak le jebel karmel wa min hinak huwo rejaa le samaria.