¹ Baad mutu ta ahab, moab itmarad deed Israel, ² Ahaziya kan waga min shubak ta auda tou al fok fi samariya-wa augu howo, biga howo rasulu marasulta wa kelim le homon, ruwa takum asaalu baal-zebub allah ta egron, iza ka nana bi kun kwes min ayan de(augu de), ³ Lakin malaika ta yahwah kelim le eliya al tishbiti, gum ruwa gabilu marasulat ta melik ta samariya, wa asalu homon, de ashan mafi allah fi Israel ashan keda intum bi ruwa asalu baal-zebub, allah ta egron, ⁴ Ashan kida yahwah kelim, intum ma bi gum min serir al inta fogo de lakin inta gi ruwa mutu wa eliya ruwa, ⁵ Zaman marasulat deel rijaa le ahaziya, howo kelim le homon, leh inym rijaa wara? ⁶ Humon kelim le howo, fii zol jaa wa gabilu nina wa huwo kelim, rijaa takum wara le melik al rasulu intum, wa kelim takum le howo, yahwah kelim kida, inta rasulu nas ashan bi asalu baal-zebub allah ta egron, ashan mafi allah fi Israel, ashan kida inta ma bi gum min serir al inta num fogo de, lakin inta gi hagiga mi mutu, ⁷ Ahziya kelim le marasulat de, zol al jaa le intum wa gabilu intum wa kelim kalam le intum de, shikil tou kan keif? ⁸ Humon juwabu, huwo libisu jallabiya al amulu min shaar wa robutu gash min jiled fi sulba tou, biga melik juwabu, de eliyah al tishbiti, ⁹ Biga al melik rasulu ghaed maa khamsin asakeir le eliyah ghaed de ruwa le eliyah fi ras jebel mahal al huwo gi geni fogo. Ghaed de wonusu le eliya, inta ya rajil allah, melik kelim gal nezil tehet, ¹⁰ eliyah juwab wa kelim le ghaed de, iza ana rujal allah keli nar ta allah nezil min sama wa haragu inta wa khamsin nas deel. Wa nar jaa min sama wa haragu huwo ma khamsin nas tou de. ¹¹ Melik ahaziya kaman rasulu le eliyah gahed tani ma khamsin asakeir taniin, wa ghaed de kaman kelim le eliyah, inta ya rajul allah, melik kelim, keli inta nezil tehet bi sura ¹² Eliyah juwab wa kelim le humon, iza ana rajil allah, keli mar ta allah nezil min sama wa haragu inta wa khamsin nas taki deel, wa tani mara nar jaa min sama wa haragu huwo ma khamsin nas tou de ¹³ Lisa kaman melik rasul mujumua nimra talata min khamsin maghatelein or muharibeen, ghaed de arkab fok le jebel wa huwo degiri tehet ma rukuba gedam ta eliya wa asalu huwo wa kelim, inta rajil allah, ana gi asalu inta, ashan haya tai wa haya ta khamsin khadamin taki de keli haya nina kun endu ghima fi ena taki ¹⁴ Wa hagiga nar jaa min sama wa haragu itniiin mujumua al awel de ghaed wa asakeir tomon lakin keli hasa haya tai ligu ghima fi ena taki. ¹⁵ Malaika ta yahwah kelim le eliyah, ruwa ma huwo wa keli inta ma kafu min huwo. Biga eliya gum wa ruwa ma huwo le melik ¹⁶ Zaman eliyah wosulu huwo kelim le melik ahaziya, de yau kalam al yahwah kelim, inta rasulu marasulat ashan bi ruwa asalu baal-zebub, allah ta egron ashan mafi allah fi israel al inta bi asalu irshad min huwo ashan kida, inta ma bi gum min serir al inta fogo de, lakin inta bi mutu." ¹⁷ Biga melik ahaziya mutu hasab kalam ta yahwah al huwo kelim le eliyah yehoram bada hakimu bidal huwo, fi sena al taani le yehoram jena ta yehoshaphat melik ta yahudiya, ashan ahaziya kan ma indu jena, ¹⁸ Ze mashakil taniin ta ahaziya hal kan ma katibu fii kitab ta akhbar al ayam ta muluk ta israel.