¹ Wokit kulu shokol al kan Solomona geni amulu fi bed Yahwah biga kalasu, Solomona jebu fogo hajat al kan Daud abu tou kutu le hadaf de, fogo fida, dahab wa kulu hafasat–huwo kutu hajat del fi mahal mali ta bed ta Rabuna. ² Wa Solomona limu shiuk ta Israel, kulu ras ta gebila, wa qiadin ta husura ta shab ta Israel fi Jerusalem ashan bi jebu tabut ta ahad ta Yahwah min medina ta Daud Zion. ³ Kulu rujal ta Israel limu fi gidam ta meliik fi eqtifal al hasil fi shahar nimura saba. ⁴ Kulu shiuk ta Israel ja wa lawiin shilu tabut. ⁵ Humon jebu tabut, qeima-al-ijtima wa kulu hafashad al muqadas al kan fi juwa qeima . kuhana al kan min gebila ta Lawi jebu hajat del. ⁶ Melik Solomona wa kulu nas ta Israel limu sawa gidam tabut, gidam zebiha ta koruf wa tour ketir al ma bi idu. ⁷ Kuhana jebu tabu ta ahad ta Yahwah wa kutu fi mahal tou fi juwa , fi dakil ouda ta bed , fi mahal al kudus futu kulu, tehet jina ta korabin. ⁸ Korabin ferteku jina tou fogo mahal al fogo tabut, wa humon kati tabut be aminda al arfau be humon. ⁹ Amida del kan tuwal lahadi nihaya tou kan gi beinu min mahal al kudus fi ouda al be juwa lakin ma gi beinu min bara. Lisa fi hinak lahadi alela. ¹⁰ Kan mafi haja fi juwa tabut de ile itnin hajer ta woshia al Musa kutu fi Horeb wokit Yahwah amulu ahad ma shab ta Israel zaman al humon tala min Masir. ¹¹ Hasil inu Kuhana tala min mahal al kudus. Kulu kuhana al kan moujut kan nedifu nufus toumon le Yahwah , ma nezamu nufus toumon hasab tegsim ta mojmu. ¹² Bardo kuhana al kkan murenimin , humon kulu ma Asaph, Heman, Jeduthun, wa awulat wa akwana toumon. Humon libisu jalalib tamam wa kan gi alabu lawun hamun wa rababun wogif fi tijah ta Sherik ta Mozba. Ma humon kan fi 120 kuhana al gi afuku torombeta. ¹³ Ja zaman al biga nas al gi afuku torombeta wan as ta guna biga amulu muzika sawa, amulu kulu sout wahid ashan bi guna guna ta majidu wa shukuru Yahwah. Humon arfa asuat toumon be torombeta wa Sinach be bagi a’alat tannin de, wa humon majidu Yahwah. Humon guna, “Leanu Huwo kwes lena wa ahad tou al amin bi geni ilel abat.” Bad de bed ta Yahwah kan mala ma shihab. ¹⁴ Kuhana kan ma akder wogif ashan bi kadimu ashan shihab, leanu mejid ta Yahwah kan mala bet tou.