¹ Yahushafat raghad maa Judud tuo wa dufunu howo maa homon fi medina ta Daud; Yehuram, jen tuo, biga melik fi mahal ta Abu tuo. ² Yehuram indu Akuwana, Abna ta Yahushafat: Azariya, Yehiael, Zakariya, Azariyahu, Mikhael, wa Shafatiya. deel kulu kan iyal ta Yahushafat, melik ta Israel. ³ Abuhat tomon wodi le homon hadaya ketier ta fedda, Dahab, wa hajat taniin al ghali, wa kaman mudun al gowi ta Yahuza, lakin howo wodi Mamlaka le Yehuram. ⁴ Wa zaman Yehuram saetar alla mamlaka ta Abu tuo wa sabitu asas tuo zi melik, howo katulu Akuwana tuo bi seif, wa kaman ghaada ta Israel taniin . ⁵ Aumur ta Yehuram kan Itniin -wa teletiin sina zaman howo bada hukum, wa howo hukumu le mudat tamaniya sina fi Ureshelim. ⁶ Howo douwru fi turuk ta muluk ta Israel, zi Beit ta Ahab kan amulu, ashan howo shilu Biniya ta Ahab mara tuo, wa howo kan amulu haja al shar fi ena ta Yahwah. ⁷ Lakin Yahwah kan ma deeru demiruBeit ta Daud, ashan itefagiya al kan howo amulu maa Daud; waad de inu howo daiman bi wodi haya le howo wa le Iyal tuo ⁸ Wa fi ayam ta hukum ta Yehuram, Edom aba ashan bi kun tehet saetara ta Yahuza, wa homon Ikhtar melik le nefsa tomon. ⁹ Biga Yehuram ruwa maa ghaada tuo wa markibat tuo kulu. wa jesh ta Edom jaa billel howo gum wa ghaada ta merkibat tuo harib maa Edomeen. ¹⁰ Wa Edom itmarad min saetara ta Yahuza lahadi al aan. wa Libna kaman fi nefsu al wokit aba ashan bi kun tehet saetara tuo, ashan Yehuram sibu Yahwah, Allah ta Judud tuo. ¹¹ Wa ziyada inu, Yehuram kaman abeinu amakin al Aali fi jebal ta Yahuza wa howo wodi sukkan ta Ureshelim gi iesh zi zaniyeen, wa howo ghud Yahuza le woduru. ¹² Risala jaa min Nebie Eliya le Yehuram. gi kelim, "De yahu haja al Yahwah kelim, Allah ta Daud, Abu taki, Kelim: Ashan inta ma douwuru fi terik ta Yahushafat, Abu taki, wala fi turuk ta Aasa, melik ta Yahuza, ¹³ Lakin inta douwuru fi turuk ta muluk ta Israel, wa inta wodi Yahuza wa sukkan ta Ureshelim gi iesh zi Zaniyeen, zi Beit ta Ahab kan amulu-wa ashan inta kaman katulu Akuwana taki fi Beit ta Abu takum, homon kan rujal al ahsiin min inta- ¹⁴ Yahu, Yahwah bi dugu shaab taki, Iyal taki, Nusuwan taki, wa mumtalakat taki kulu bi darba al tegeil. ¹⁵ Inta zatu bi kun indu amrad ketier maa ayan ta batna, lahadi ayan de bi tala musuran taki bara, wa bi istemiir yom baadi yom." ¹⁶ Yahwah biga zalaan shedid min Yehuram ruhu ta phalastineen wa al Aarab al kanjearan ta Kusheen ¹⁷ Homon hajimu Yahuza, dugu homon, wa shilu kulu amlak al kan ligu fi Beit ta al melik. Homon kaman shilu Awlad tuo wa Nusuwan tuo. ma sibu le jena ella Yehuahaz, asqhar weled tuo. ¹⁸ Baad hajat de kulu, Yahwah dugu howo maa ayan fi batna tuo al ma indu dawa( Illaj). ¹⁹ Wa fi zaman al munasib, fi akhier ta sinatiin (Itniin sina) Musuran tuo tala bara bi sabab ta ayan tuo de, wa howo mutu bi marad al khatier. shaab tuo ma wala le howo nar le tekrem tuo zi al homon amulu le Judud tuo. ²⁰ Howo bada hukum zaman Aumur tuo kan Itniin- wa teletiin sina; howo hukumu Ureshelim le mudat tamaniya sina, wa zaman howo mutu mafi zol amulu huzun tuo. Dufunu howo fi Medina ta Daud, wa ma fi .maghabier al meleki