¹ Bulus, Silwanus, wa Timusawus le kenisa ta Tasalunikein fi Allah al ab wa Rabana Yesua al Messih. Kele naima wa salam geni ma itakum. ² Inna daimen gi wedi shukuran le Allah le ajili itakum kulu, ze ma inna gi zekiru itakum fi salawat ta nina. ³ Inna gi zekiru bidun wuguf shukul ta iman takum gidam Allah wa abu ta nina, taab ta muhaba, wa subur ta sigha le mustagbal fi Rabana ta nina Yesua al Messih. ⁴ Akuana al hibu ma Allah, inna aruf uwu iktar itakum, ⁵ Laanu Injil ta inna ma ja le itakum ma kalam bes, lakin be gowa, fi Roho al kudus, wa be takid kebir. Be nefsu teriga, kele itakum bardu aruf inna kan yatu shikil ta nas fi nus takum le ajil itakum. ⁶ Itakum biga gi shilu missal ta nina wa Rabana, ze ma itakum akudu kelima de fi suubat shedid be farah min Roho al kudus. ⁷ ze netija, itakum biga missal le kulu nas al fi Makadunia wa Akaeiya al amin. ⁸ Ashan min itakum kalam ta Rabuna tala bra, ma bes fi Makadunia wa Akaeiya. Lakin, iman takum fi Allah wusulu bara fi ayi makan. Ze netija, inna ma muhtajin ashan bi kelim ayi haja. ⁹ Ashan umun be nefus tumun weri be yatu teriga inna dakalu fi nus takum. Umun bi weri kef itakum rija le Allah min abudu asnam ashan bi kadimu Allah al hayi wa al hagiga. ¹⁰ Umun kelim gali itakum gi istenna Jena tuo al gi ja min sama, al uwu goumu min amwat. De yau Yesua, al hariru nina min gadab al gi ja.