¹ Wokit melik Daud biga ajuus wa kebir fi sena, humon kati huwo be bataniyat, lakin lisa kan ma bi tala dafi. ² Kadamin bito kelim le huwo, “kede nina fetisu biniya azra le sidi tanina melik. Ashan bi ja sandu melik wa bi sidi tanina melik. Ashan bi ja sandu melik wa kutu bala le huwo kede ja num fi kura bito ashan sidi ta nina melik bi tala dafi.” ³ Biga humon fetisu biniya giyafa fi juwa hudud ta Israel kulu. Humon ligo Abishaj al min shonami wa jibu le melik ⁴ Biniya de kan giyafa kalis. Huwo saud melik wa kutu bala kalis le huwo, lakin melik ma num ma huwo. ⁵ Fi zaman dak, adoniya jena ta hajis biga bi arfau jisim bito, wa bi kelim, “Ana bi ja tala melik” huwo bada jahisu le nefsa dababat wan as al bi sugu husan wa kamsin rujal ashan bi jere gidam bito. ⁶ Abu bito ma kore kore ma huwo, gali “le inta amulu de wolw dak?” Adoniya kan Kaman zol giyafa, weledu huwo fi dahar ta Abshalom. ⁷ Huwo wonusu ma Yuab jena ta sorowiya wa ma Abiyasar al kalin. Humon ruwa wara bito Adoniya wa saudu huwo. ⁸ Lakin saduk al kalin, Benaiah jena ta Yahwa yada, nebi Nathan, shemi, Rei wa rujal ta Daaud al gowin ma ruwa wara ta Adoniya. ⁹ Adoniya gedimu ganamayat, bagarat wa iyal bagara fi hijer shiton, Jambu ena ta Rojel. Huwo nadi akwana bito kulu, iyal ta melik, wa kulu rujal ta Yahuza, kadamin ta melik. ¹⁰ Lakin huwo ma nadi nebi Nathan, Benaiah, rujal al gowin, wole siliman aku bito. ¹¹ Nathan gum kelim le Betsheba uma ta Siliman, gali “inta ma asuma gali Adoniya jena ta Hajis biga Melik, wa Daud sidi ta nina ma arufu? ¹² Ashan kida kede ana wori le inta, ashan inta bi agder alagu haya taki wa ta siliman jena taki ¹³ Ruwa le melik Daud; kelim le huwo, sidi tai al melik Musu inta kan halifu gidam kadamin taki, gali, “nesiya siliman bi tala melik baad ana, wa huwo bi geni fi kursi tai?” le biga Adoniya yau bi tala melik?” ¹⁴ Fi zaman inta bi wonusu ma melik, ana bi ja dakalu wara taki wa akidu kalam taki.” ¹⁵ Biga Betsheba dakalu le melik fi juwa melik kana jus kalis, wa Abishai al shononi kan bi saud melik. ¹⁶ Betsheba dengir tehet be ihtiram gidam ta Melik. Melik bada kelim, “niya taki der sunu?” ¹⁷ Huwo kelim le huwo, “sidi tai inta halifu le kadamin taki be Yahwa Allah taki, gali Nesiya Siliman jena taki bi tala melik baad ana, wa huwo bi geni fi kursi tai. ¹⁸ Hasa, aynu, Adoniya biga melik, wa inta sidi tai melik, ma arufu. ¹⁹ Huwo gedimu bagarat ketir, iyal bagarat wa krufat, wa huwo nadi kulu iyal ta melik, Abiyasar al kahin, Yuab kaid ta Jesh, lakin huwo ma nadi Siliman kadam taki. ²⁰ Wa inta, ya sidi al melik, uyun ta Israel kulu bi aynu le inta, wa bi istena ashan kede inta wori le humon munu yau bi geni fi kursi baad inta? Sidi al melik. ²¹ Au Kaman bi ja hasil, kan sidi al melik kalas num tehet ma abuhat bito, ana ma Siliman jena tai bi idu nina ze migirimin” ²² Zaman huwo lisa bi wonusu ma melik, nebi Nathan dakalu juwa. ²³ Kadam de wori le melik, “nebi Nathan fi hini,” Wokit huwo dakalu juwa gidam ta melik, huwo dengir tehet be wusa bito fi wata gidam ta melik. ²⁴ Nathan kelim, “sidi tai al melik, si inta kelim, “Adoniya bi tala melik baad ana, wa huwo bi geni fi kursi tai? ²⁵ Ashan huwo nezil tehet nela wa gedimu zebiha adad kebir min bagarat, iyal bagarat wa krufat. Huwo nadi iyal ta melik kulu, kaid ta jesh, wa Abiyasar al kahin. Humon bi akulu wa bi asurubu gidam bito, wa bi kelimu, “melik Adoniya kede hai! ²⁶ Lakin le inta, kadam taki, sadur al kahin, Benaiah jena ta Yahoyada, wa kadam taki siliman, huwo ma nadi ²⁷ Sei sidi al melik amulu zede wa ma wori le nina, kadam taki, al bi geni fi kursi baad huwo?” ²⁸ Biga melik Daud juwabu gali, “nadi Betsheba wara le ana.” Huwo rija gidam melik wa wogif gidam melik. ²⁹ Melik bada halifu gali, “ze Yahwa fi hai, al talau nefsa tai bara min kulu mashakil, ³⁰ Ze ma ana halifu le inta be Yahwa, Allah ta Israel, gali, “Siliman jena taki yau bi tala melik baad ana, wa huwo yau bi geni fi kursi tai fi mahal tai; ana bi amulu de alela” ³¹ Biga Betsheba dengir tehet wa kutu wusa fi wata wa huwo beinu ihtiram le nihaya!” ³² Melik Daud kelim, “nadi le ana saduk al kahin, nebi Nathan wa Benaiah jena ta Yahoyada.” Humon biga ja gidam ta Melik ³³ Melik kelim le humon, “shilu ma intakum kadamin ta sidu takum, wa kede Silimon jena tai arkab fi husan tai shilu takum huwo fi Gihon tehet hinak. ³⁴ Kede saduk al kahin wa Nathan al nebi masau huwo melik ta Israel kulu wa afuku takun buruji wa kelim takum, “kede melik Siliman hai! ³⁵ Biga intakum bi douru wara bito, wa huwo bi ja geni fi kursi tai; ashan huwo yau bi kun melik fi mahal tai. Ana hazilu huwo bi kun hakim fi kulu Israel wa Yahuza” ³⁶ Benaiah jena ta Yahoyada juwabu melik, gali, “kede kun! Ked Yahwa, Allah ta sidi al melik, Sabitu. ³⁷ Ze ma Yahwa kan fi ma sidi tai al melik, kede huwo Kaman kun ma Siliman, wa kede kutu kursi bito kuwes kalis min kursi ta sidi tai al melik.” ³⁸ Biga saduk al kahin, nebi Nathan, Benaiah jena ta Yahoyada, ma kulu dubat wan as ta din humon nezil tehet wa kutu Silimon fok husan ta melik Daud; shilu huwo fi Gihon. ³⁹ Saduk al kahin silu gurun fogo zet min juwa kema wa masan Silimon. Wa humon afuku buruji, wa shaab kulu kelim, “kede melik Siliman hai!? ⁴⁰ Min hinak nas kulu ja be wara bito, wan as kulu bi alabu wa bi afuku sufarat wa mokosutin be farah shedid, lahadi wata hizu be sot tomon. ⁴¹ Adoniya ma kulu diyuf bito asuma zaman humon kalasu min akulu. Wokit Yuab asuma sot ta buruji, huwo kelim, “le fi waja ras fi medina?” ⁴² Wokit lsa huwo bi wonusu, Yonasan jena ta abiyasar al kahin bada ja, adoniya kelim, “taal, inta zol kuwes bi jibu kabara kuwes.” ⁴³ Yonasan juwabu wa kelim le Adoniya, “sidi ta nina melik Daud kutu Silimon melik. ⁴⁴ Wa rasa ma huwo sadur al kahin, nebi Nathan, benaiah jena ta Yahoyada, wa dubat ma kulu nas ta din. Humon kutu Silimon arkab fi husan ta melik. ⁴⁵ Saduk al kahin wa nebi Nathan masau huwo melik fi Gihon, wa humon jain min hinak farhanin, de yau sabab al intakum bi asuma waja ras fi medina hinak de sot al intakum bi asuma de. ⁴⁶ Kaman, Siliman bi geni fi kursi ta mamlaka, ⁴⁷ Ziyada min kida, kadamin ta melik ja ashan bi bariku sidi ta nina melik Daud, gali “kede Alla taki kutu Isim ta Siliman ashen min isim taki, wa kutu kursi bito ashen min kursi taki; melik gum dengir tehet fi serir. ⁴⁸ Kaman melik kelim, “Mubarak Yahwa, Allah ta Israel al wodi zol geni fi kursi tai alela, wa ena tai lisa bi ainu. ⁴⁹ Diyuf ta Adoniya kulu kan kafu. Humon gum fok wa ai zol ruwa be sika bito. ⁵⁰ Adoniya kan bi kafu min Siliman huwo gum wa ruwa amsuku gurun ta mazbah. ⁵¹ Biga wori le Siliman, gali, “Aynu, Adoniya bi kafu min melik Siliman, lahadi huwo bi amsuku gowi fi gurun ta mazbah, gali, “kede melik Siliman halifu le ana awel gali huwo ma bi katulu kadam bito be sef. ⁵² Siliman kelim, “kan huwo beninu nefsa bito zol kuwes, shaar bito ma bi waga fi wata, lakin kan ligo batal fi huwo, huwo bi mutu.” ⁵³ Biga melik Siliman rasulu nas, ruwa jibu Adoniya min mazbah hinak. Huwo jaw a dengir tehet le melik Siliman, wa Siliman kelim le huwo, “Ruwa fi bet taki.”