¹ Daud amulu mushura ma kada min alif wa min miya, ma kulu reis ² Daud kelim le kulu jamaa ta Israel, “iza huwo kewe le itakum, wa iza kan de ja min Yahwah Allah Tanina, kede nina rasulu murasulat fi kulu jiha le akuana ta nina al Fadulu fi manatig ta Israel, wa le kahana wa Lawiin al humon fi Mudun bitomon. Kede wori le humon ashan bi ja sawa ma nina. ³ Kede nina jibu tabud ta Allah ta nina wara le nufus tanina, leanu nina ma rija huwo fi Ayam ta Ahad ta Shaul. ⁴ Kulu jamaa tefagu ashan bi Amulu hajat de, leana kulu shaab kan bada ainu kewes le humon. ⁵ Biga Daud limu kulu Israel ma baad, min bahar shihor fi masir le madkal ta Hamath, ashan bi jibu tabud ta Allah min kiriath yearim. ⁶ Daud wa kulu Israel tala le baalah, al yau, kiriath yearim, al tabi le Yahuza, ashan bi tala min hinak tabud ta Allah, ali nadi be Isim Yahwa, al geni fok Arish ta Cherubin ⁷ Biga humon kutu tabud ta Allah fi Arabiya jedid. Humon tala huwo bara min bet ta Abinadabs. Uzzah wa ahio yau bi sogu Arabiya de. ⁸ Daud wa kulu Israel kan bi Ihtefil gidam Allah be Kulu farah bitomon. Humon kan bi guna be Azifiin wa adan, Rabab, dufuf, wa Abuak. ⁹ Asna humon ja le munhadir ta kidon, uzzah midu ida bito bara ashan bi Amsuku tabud, leanu bagarat de ligo taasir. ¹⁰ Biga gadab ta Yahwah hezil diid uzzah, wa Yahwah katulu huwo leanu uzzah midu ida bifou le tabud. Huwo mutu hinak gidam ta Allah. ¹¹ Daud kan zalan ashan Yahwa kan hajimu uzzah. Mahal de semi Farez uzzah lahadi yom de. ¹² Daud kafu min Allah yom dak. Huwo kelim, “kef ana bi jibu tabud ta Allah fi bet le ana?” ¹³ Ashan kida Daud kan ma hawilu tabud de le medina ta Daud, lakin kutu huwo gerib fi bet ta obed-adom al Hitti. ¹⁴ Tabud ta Allah Fadalu fi obed Adom ihtiyajat ta usura fi bet bitou le muda talata Shuhur biga Yahwa Bariku bet bitou wa kulu al huwo indu.