¹ Uwo kan al saba sahar bat al nas ta Israil rija wara le mudun tomon, zaman umon limu sawa ze wahid zol fi Arselim. ² Jeshua welet ta Jozadak wa kauwana tao al kahana, wa Zerubbbabel welet ta Shealtiel, wa akuwana tao gamu fok wa abinu al altari ta Allah ta Israil le gedim tekdimat mahruk ze uwo yau moktub fi al ganun ta Musa al rajul ta Allah. ³ Biga umon asisu al altari fok hamilat tao, lianu kof kan fogo umon ashan al nas ta al art. Umon gedimu tekdimat mahruk le Yahuah fi sabah wa missa. ⁴ Umon kaman ihtefis al Iktifal ta Sakan ze uwo yau moktub wa gedimu tekdimat mahruk yom bat yom alahasab le al karar, ayi wajib yomi fogo yom tao. ⁵ Alahasabmotlub, inak kan tekdimat mahruk yomiyan wa sahariyan marawahid wa tekdimat le kulu al iktifalat kutu ta Yahuah, sawa ma kulu al tekdimat hurirada. ⁶ Umon bada le gedim tekdimat mahruk le Yahuah fi al awel yom ta al sahar saba, hatalau al haikal kan lisa ma abinu. ⁷ Kida umon wodi fida le al umal ta hujar wa nasfunun, wa umon wodi akil, mosrub, wa zet le al nas ta Sidon wa Tyre, kida umon biga bi jibu aksab cedar be bahar min Lubnan le Yappa, ze kalifu le umon be Cyrus, melik ta Faris. ⁸ Biga fi al sahar itniin ta al itniin senawat bat umon ja le al bet ta Allah fi Arselim, Zerubbabel welet ta Shealtiel, Jeshua welet ta Jozadak, al kahana al tanin, al Lawien, wa delin al ja min abodia wara le Arselim bada al sokol. Umon wodi al Lawien isirin senawat fi umur wa kubar le ragibu al sokol ta al bet ta Yahuah. ⁹ Jeshua wa awulat tao wa akuwanu, wa Kadmiel wa awulat tao, al kan ajial ta Hodaviah), wa al awulat ta Henadad wa awulat tomon wa akuwana-kulu min umon kan Lawien-damu sawa fi rigaba ta delin sakalin fogo bet ta Allah. ¹⁰ Al banayin kutu asas le al bet ta Yahuah. De biga sibu al kahana agder le wogif be gumasat tomon ma turumbetat, wa al Lawien, awulat ta Asaph, le sabihu Yahuah ma cymbals, bes ze ida ta Daud, melik ta Israil kan amiru. ¹¹ Umon gana ma tesbih wa tasukurat le Yahuah, ''Huwo yau kuwes! Ahat amana tao le Israil bigeni lelabad.'' Kulu al nas kore bara ma suraqh sedid ta farah fi tesbih ta Yahuah ashan al asas haikal kalas biga kutu. ¹² Lakin ketir ta al kahana, Lawien, wa rais judud, delin al kan kubar wa kan ayinu al awel bet, zaman asas bet de kan kutu gidam uyuun tomon, kore shedid. Lakin ketir nas kan sarikin be farah ma moksut wa sort bahja. ¹³ Ze netija, nas kan ma gder le ferigu al farah wa sort bahja min al sort ta nas bi kore, leanu al nas kan bi kore fok ma farah azim, wa al sort kan asmau min beyit sedid.