¹ A kili gi, tǝ ta gashi washi tǝ shii a zhǝrgi tantan tǝ tli kos. Tǝ mbudkǝn namboŋ tǝ boɗi nghǝ yatl Rodusa tǝ Batara. ² A kili gi ɗan tǝ ta tu zhǝrgi tǝ dlari Ponisiya ³ Ɗaŋ mǝta yel yatl kǝ kubrus məta gati a nabti mə boɗi Suriya məsən shishi taya, laɓ won ɖaŋ zhərges wo dlər ghai. ⁴ Məta tu məəri dəŋ ɗa ɗan mə tsən nəghə mbudkən watsamai ciim shi. Dan məəri daŋ nə yunghar nghən tə zhibti var tə wul Bulus tu tə dlir Urushalima hŋ. ⁵ Tə mbudkən jwaatn məta ciken tə righən wopm. Ɗeɓaɗ wasəŋ tə gudi wasəŋ tə məri wasəŋ tə ta laabshi hal kar yatl. She mə zumni a ɓil zha mə kara Cogn mə ɓəlmi tə dləŋsə wopm. ⁶ She mə ta ndai giɓ zhirgi zha mə sumi dən. She tə suushi dəŋ ɗaŋ. ⁷ Ɗaŋ mə ɓan righən wopi di Taya mə ta tulidi Talamayas. Ɗani ghən nda mə ta wurə mi tə zarsə wopm, mə tsətn cim shi nə ghə ɓuɗkən namboŋ. ⁸ Ɗaŋ ləɓ ta tlai mə ta tli Kaisariya. Mə ndai dən gya Filibus, murghə ŋyalarghən vik Cogn, gyo ɗaŋ a ta yi a giɓkə waatsəmai, mə ta ngaalai cimtə. ⁹ Mures ci tə məre guɗi wuɓsə mən konngən nghən ngə jaan. ¹⁰ Ɗaŋ mə ngaalai ɗan nə ghə nga mɓudkən murghə shinnge cognwon ɗaŋ səəm wos tu Agabus mən Yahudiya. ¹¹ A maan ɓasmi a mbi woŋmis kə Bulus. Tə yaan nghənnda a naaɗ yaasəŋ tə taas wos ghai, "A wultu ngətn yo ɗaŋ zhipti var kon, yi cik, tu Yahudawa ɗaŋ ci giɓ Urshalima tə naad muryo ɗaŋ yir woŋ mishi, tə vərtə gya gyo ɗaŋ ta yisən Cogn hŋ." ¹² Ɗaŋ mə wum ngərshi gya gin, myaan tə zarsə yo ɗaŋ mya tsətn ɗa ləɓi mə kara Bulus tə tlə Urshalima hŋ. ¹³ She Bulus a sushii ɗa tu, "Ni ghən kigha fighəne, ngwaarghən tə tsalghən raa? Maa mbərmi nə naɗkən ngərwos hŋ, beɗ ma əŋ yaan ma məshi Urshalima nə səm ngə Daadən Yesu." ¹⁴ Ɗaŋ Bulus suu morghən hŋ, mə ta gaatəkas tu, Daadən wo filawos." ¹⁵ Ɗaŋ dzanyi gya yin tə laatsəi mə ta nyom taraŋ wopi mə tli Urshalima. ¹⁶ Məridən gya gon tə laaɓmiɗi, tə dlamdi Kaisariya tə ta ler murwondi ɗaŋ səm wos tu manason, ɗaŋ a dlamdi Kuburutus dotsə məri dən, gyo ɗaŋ maa tsətn ni cimtə. ¹⁷ Ɗaŋ mə ta tuli Urshalima zarsə wopm tə kaɓmi tə polghən. ¹⁸ Ɗaŋ ləb ta tlai gya Bulus tə ta tlii a Yakubu, kaɓ tə mən varaŋsə yatl tə ta yi ɗa ɗaan. ¹⁹ Ɗaŋ a wurə shi a fuushi namboŋ-namboŋ ngətn yo ɗaŋ Cogn fi a giɓkə mənyo ɗaŋ taayisən Cogn hŋ. ²⁰ Ɗaŋ tə wum cik, tə luu Cogn, te wultə tu, "Yeli, yesatn, Yahudawa zaŋgu wuri ghən ta caa raa waasəŋəi gha ye. Ta kaɓi kaɓ tu ta naai nə zarsə mbuni. ²¹ Taa fuuki tu, kya kuɓar Yahudawa ɗaŋ cigha tsətn ngən a giɓ zarsə yo ɗaŋ ta yisəŋ Cogn hŋ tu tə gaa laɓ Musai, kya fuushi tu tə sərə məri waa səŋ hŋ, dur yo tu tə laaɓ ngətn ngə gəri waasəŋ hŋ. ²² Ni ghən a ndaara mə fe? Shaŋ-Shaŋ ta wumi tu ka maan. ²³ Nə durghə gi fi ngərwon ɗaŋ mə fughə a fi ɗaŋ ni: Mi tə zarse wuɓsə ɗaŋ taa ngaas puus. ²⁴ Tlii tə mənii a naa tə dzəkkəŋ cim shi, a yaal ɗaashi duryo tu tə wutl gaam waasəŋəi. Tə cik kən konu wo yisəŋəi tu ngərshi gyaa gin ɗaŋ tə kon a gaamatn nə mberni. Ta yisəŋei tu kinə murghə laaɓkən ɓorki. ²⁵ Beɗ tə gi zarsə gya gi ɗaŋ tə caa raa waaseŋəi ghai, mə ndər mə tlyaaɗ shi mən ɗeɓaɗ mə ɗər mə fuushi tə nyolar gamawasəŋəi tə vərghən ngətn ngə waar, tə voraŋ, tə ngətn yo ɗaŋ aa məshi, tə mbəllə. ²⁶ Ɗaŋ ləɓ tlai Bulus mbi mən dənes, a caa shi tə naai tə ndzikkən ɗeɓaɗ waasəŋ, tə tlii vin laadi Yahudawa a fuushi dzaŋ ngə ndzikkənes, ngənnda tə vər ngətn yo ɗaŋ ca yi nə ko gyo waasəŋ. ²⁷ Ɗaŋ dzaŋ ngə ɓuɗkən waaɗtsəmai wo ɓani, Yahudawa won tə dlaamɗi Asiya, tə yel Bulus vin laadi Yahudawa tə ca zarsə ghai tə ngaɓti. ²⁸ Cigha dlaarghən vii, tu, "Mən Israila somən mi ɗa. Gin nə muryo ɗaŋ ca giɗ zarsə ko teɗo tu tə fi kusəŋsə ngatn yo ɗaŋ zarsə caa suu hŋ, tə ɗəəlghən vii a ləɓi gin. Beɗ tə cik a ləər Helinawa ɗi giɓ vin laadi Yahudawa, ləɓ ndzikkənes naai tə mbəllə." ²⁹ Gi ata ca tə ta yel Tarofimas mən Afisai tə ta yi tə Bulus ɗa giɓ yatli, tə ta yeli kutu Bulus lərte ɗi vin laadi Yahudawa. ³⁰ Yatles ta vuui zarsə tə ta man ngaɓ Bulushii tə nyolarti ɓədləŋ ngə vin laadi Yahudawa wos, she kyaaɗ tə yeti ɓileshi. ³¹ Ɗaŋ ca su tə ɗuti ghənndi she ves ta tuli a dəllə mənvar mən manndə tu Urshalima aa vuui. ³² Kyaɗ she a nyom mən manndə wos tə shii a dlək zarshes. Ɗaŋ zarshes tə ta yel mənvar mən manndes tə zarsəwos tə ga voɗkən Bulushi. ³³ Mənvar mən manndes ta tləŋ naaɗti tə maraŋgusa mbətləŋ. A ceɗ tə tu kinə nu, ni ghən kə fə. ³⁴ Gya gon ɗa dlək zarshes cigha dlaarghən vii gya gon tə kon gi gya gon tə kon tsən. Ɗaŋ mənvar mən manndə ɗaŋ a yisəŋ ngətn yo ɗaŋ ca kon hŋ nə dlarghən vi wasəŋ, ata ca shi tu tə ləər Bulus ɗi dii dləŋ mən manndə. ³⁵ Ɗaŋ tə tuli ɗa ɓədləŋes mən manndes tə ta mbi Bulushi nə durghə vuughən zarsə. ³⁶ Ɗaŋ zarshes tə ta laabshi ɗi kaar ca dlarghən vi ci wultu, "Ɗuunti!" ³⁷ Ɗaŋ a naa mel tə ndalar ti ɗa giɓ diidləŋes Bulus ata wul mənvar mən manndes, tu "Ka kaaɓi mə wul vii tə kyaana?" Mənvar mən manndes a wultə tu kya wul Helenanciya? ³⁸ Kyan ghən ki Bamasare, ɗaŋ kəta caa zarsə shi sherghən raa, kəta nyom zarsə zaŋgu wuɓsə kə tləər naamtsəi hŋaan? ³⁹ Bulus wultu, minə mən Ibraniyawa yatl kə Tarsus ɗaŋ yi Kilikiya. Minə ngaaghə dəllə yatles. Mə ceɗkə, a vərəm dəll mə wul vii tə mənes. ⁴⁰ Ɗaŋ mənvar mən manndes ta vərtə dəll Bulus dlər ɗa ɓədləŋes a mɓi taas gaami tu tə mwaali. Ɗaŋ tə ta mwaali kyalak, Bulus a wul shi vii tə Ibraniyanci.