¹ Ɗaŋ vughǝnes ta mbuɗni, Bulus ta ciim meeri den wos tǝ tlaa shi moɗ, she gǝm shi waasǝŋǝi tlii Makidoniya. ² Kili yo ɗaŋ atlii yaatl gya gii yi tlta shi moɗ kaɓ boɗi yaatl kǝ Helinawa. ³ Ɗaŋ a tsǝtn ɗaɗani nǝghǝ lǝpm mayi she Yahudawa tǝ ta naɗ vii a gamashi ɗaŋ ata yigha tlǝghǝn Suriya ata sutǝ ɗi Makidoniya ⁴ Gya Sobatarus kuni Burus ɗan ci Biriya: Gayus Derbe, Timoti tǝ Aristakus tǝ Sakundus kaɓ waasǝŋ ɗan ci Tasolinika tǝ Tikikis tǝ Trofinus ɗaŋ tǝ laatsǝ ɗi Asiya. ⁵ Yi tu beɗ zarsǝ caa laatsǝi Taruwasa ci ɓasmi ɓuɓkǝn. ⁶ Ɗaŋ tǝ nda gha zhirgi tǝ dlaari Filibi tǝ mbuɗkǝn ɗuun ɗaŋ Yistiyaia hŋ. Tǝ mbuɗkǝn nandam mǝ ta yelshi ɗa Taruwasa: ɗa ɗan mǝ mbuɗ wattsǝmai ⁷ Dzaŋ namboŋ kǝ mbuɗkǝn wattsǝmai mǝ ta jwaammi wopii mǝ ta kaɓ ɗuun tǝ mǝn caaghǝn raa ɗaŋ Bulus tu shi. Ɗaŋ ci ɓashi wulghen vii hal kaviɗ kǝ var ghǝnndi ɗaŋ lǝɓ wo tlaa wo tlii. ⁸ Ɗaŋ tǝ ta yi ɗa Suumes pitila ta yi ɗaɗan monnda ⁹ Ɗaŋ tǝ tayi ɗa ɗan kuni won sǝm wos tu Aftikos ata yigha tsǝtngǝn mel tǝ mboi viini ndai kuci shoŋ shoŋ. Kunes ta ndaaɗii ɗi yaatl mǝshii ɗa suumi kǝ mayi ɗaŋ Bulus ta gǝri gha wulghkǝn vii ghayi. ¹⁰ Beɗ tǝ gii Bulus shishi ɗi ngaɓtii rumtsǝg ɗa yaatli wul shi tu, "Vuun hŋ, ci gwaam, cigha sǝǝghǝn. Aa mǝs hŋ." ¹¹ Ɗa kaari tǝ sushi tǝ tai ɗa suumes tǝ ta tsaal dugn tǝ cii, cigha wulghǝn vii hal lǝɓ ta yaalii annda a gaa shi. ¹² Ɗaŋ tǝ lǝǝr kunes ɗi ɗaŋ aa fuɗi ata polshi ghai nǝ naa vik lyai hŋ. ¹³ Tǝ ta laatsǝi a ken tǝ mbi Bulushi a zhirgi zha tǝ dlaarii Asos lǝɓ yo ɗaŋ caa suu tǝ mbi beɗ tǝ gii a ta suu gos tǝ rii tǝ yaasǝŋ. ¹⁴ Ɗaŋ ata tlǝ tu mi Assos mǝ ta mbi tii ɗa zhirgi zhes mǝ tlii Mitilitus. ¹⁵ Ɗaŋ me ta dlari dlari tǝ mbuɗkǝn namboŋ te yaatl Kiyos. Mǝ ta tlii Militus. ¹⁶ Bulus ta ndai a zhirgi laatsei ken Afisa nǝ durghǝ tu wo ngaa laa Asiya hŋ. Ca vaa tǝ tǝ tlii Urshelima nǝ dzaŋ Pentekos ǝŋ yaa kǝǝmi ghǝnndi. ¹⁷ Ɗaŋ ci viin laadi Militus a shin mǝn varaŋsǝ mǝn laaɓkǝn ɗan ci Afisa tǝ man. ¹⁸ Ɗaŋ tǝ tuliɗi ɓastǝ a wul shi tu, ki tǝ yisǝŋngǝn tu dzaŋgii ɗaŋ mǝ caa yaasǝŋ ɗi Asiya ɗaŋ mya tsǝtn tǝ kyaani. ¹⁹ Tǝ naɗkǝn vii yo ɗaŋ Yahudawa tǝ fi mya mbuu Daadǝn tǝ mbutarghǝn raa. ²⁰ Ki tǝ yisǝŋnǝn ngetn ɗaŋ nǝ ngetn nge mbuni hŋ tǝ giɗkǝn yo ɗaŋ mya giɗ zarsǝ ghai tǝ tlǝghǝn dǝn-dǝn. ²¹ Mya fuu Yahudawa tǝ Helinawa buruk aa gaa kusuŋsǝ ngǝtn waanii aa caa raa gha Daadǝn Yesu ²² Ɗaŋngǝni mya man Urshelima zhipti var kǝ ndzǝkkǝni a wulum tu ciɓ mǝ tlii, maa yisǝŋ ngǝtn yo daŋ wo tum ɗa ɗani hŋ. ²³ She ngǝtn yo ɗaŋ zhipti var ya zhiɗǝm ngai tu ko yaatli gyo tu, maraŋgusa tǝ buŋngǝni ci ɓasǝm ɓuɓkǝn. ²⁴ Beɗ tǝ gii mǝ mbi tsǝtngǝnetn nǝ ngǝtnwon hŋ yaan ma ɓan laaghǝ zhiɗkǝn ɗaŋ Daadǝn Yesu verem ɗi tǝ zhiɗkǝn vik wusni mbuni kǝ Cogn. ²⁵ Ɗaŋngǝni yel, ɗeɓaɗ waan mǝn yo ɗaŋ mya ŋal mǝ fuushi guŋndu Cognvon ta yel yiratn ɗa hŋ. ²⁶ Nǝ durghǝ gii myaa fuuki yaawon tu taasatn aa tǝǝn ngǝtngǝ voraŋ gon hŋ. ²⁷ Durghǝ yo ma nyaŋngas ki fuughǝn ngǝtn yo ɗaŋ Cognvon ca suu hŋ. ²⁸ Durghǝ gii yaalǝn nǝ gama waan tǝ dɗeɓaɗ mǝn laaɓkǝn yo ɗaŋ zhipti var a vǝr ki aa yaal shi ɗa. Ɗaghǝnɗa nǝ lyaaghǝn zarsǝ viin laadi kǝ Cogn gyo ɗaŋ a ɗiiɓ tǝ voraŋ wos. ²⁹ Maa yisǝŋǝi tu ǝŋ mya gaa ki waanii kusuŋsǝ shewai ta nda a dlei waan, ta basaŋ gutule shii. ³⁰ Maa yisǝŋǝi a giɓi waan mǝnmonci gyagon taa man sughǝɗ raa waanii durghǝ yo tu ta basaŋ mǝǝri dǝnes ɗa kaar. ³¹ Nǝ durghǝ gii gaan yir,ɓitalǝnki tu voni mayi ma nyaŋnngas ki fuughǝn tǝ zhelǝm dzaŋ tǝ kaviɗ. ³² Ɗaŋngǝni mya gaa ki a taas Cogn tǝ gyaal wos, gyo ɗaŋ citǝ vartǝ ghǝ luughǝni waan tǝ vǝrghǝn waan duul tǝ gyagyo ɗaŋ cinǝ ghǝ tsǝtngǝn Cogn ³³ Maa fi kashi azurfa tǝ zinariya tǝ lǝŋsǝ gon waan hŋ. ³⁴ Kyaani ngǝtn waan kaa yisǝŋǝi tu mǝ fi laa tǝ taasatn. Mǝ ŋal ngetnge taasatn tǝ kǝ zarsatn ɗaŋ mi cimshi. ³⁵ A ko nii mǝ naa ki mǝnii nǝ ngǝtnngǝ kuɓken ɗaŋ ka som gya naa kuyi nǝ laa tǝ gyo ɗaŋ kǝ ɓital vik Daadǝn Yesu, vii yo ɗaŋ yaan gamas a kon. Verghen moɓ kaɓkǝn shiɗshiɗi. ³⁶ Ɗa kaari ɗaŋ a wul vi gii cig a zubni tǝ gamvoraŋ a kara Cogn cimshi. ³⁷ Ɗebaɗ waasǝŋ tǝ ngwaar nyaŋ nyaŋ tǝ maghaɗ tǝ. ³⁸ Tǝ wum raa ghǝ jii nǝ ngǝtn yo ɗaŋ ata wul shi tu, ta man yel yir wos ɗa hŋ.She tǝ ɓǝɗ tǝ ɗa zhirges.