¹ ۱۔اَیں واسطے اَے میڈے پیارے بھراؤ! جِنہاں دا میں آرزومند ہاں جو میڈی خوشی تے تاج ہیوے۔ اِے پیاریو! خداوند اِچ ایویں ای قائم راہو۔ ² ۲۔ میں یُوودیہ کوُ وی نصیحت کریندا ہاں تے سُنتخے کوُ وی کہ اوہ خداوند اِچ ہِک دِل راہون۔ ³ ۳۔ اَتے اَے سچّے ہم خدمت! تیڈے اَگے وی درخواست کریندا ہاں کہ تُوں اُنہاں تریہمتاں دی مدد کر کیونکہ اُنہاں نے میڈے نال خوشخبری پھیلاون اِچ کلیمینس تے میڈے اُنہاں باقی ہم خدمت آلیاں سمیت محنت کیتی جِنہاں دے ناں کتابِ حیات اِچ لکھے ہِن۔ ⁴ ۴۔ خداوند اِچ ہر ویلے خوش راہو۔ وَل آدھا ہاں کہ خوش راہو۔ ⁵ ۵۔ تُہاڈی نرم مزاجی سارے بندیاں تے ظاہر تھیوے۔خداوند نیڑے ہِے۔ ⁶ ۶۔ کئیں گالھ دی فکر نہ کرو بلکہ ہر ہِک گالھ اِچ تُہاڈیاں درخواستاں دُعا تے مِنّت دے وسیلے توں شکرگزاری دے نال خدا دے سامنے پیش کیتیاں ونجن۔ ⁷ ۷۔ تاں خدا دا اطمینان جیہڑا سمجھ توں بالکل باہر ہِے تُہاڈے دِلاں تے خیالاں کوُ مسیح یسوع اِچ محفوظ رکھیسی۔ ⁸ ۸۔ مطلب ایہہ ہِے ہِے بھراؤ! جیہڑیاں گالہیں سچ ہِن اَتے جیہڑیاں گالہیں شرافت دیاں ہِن اَتے جیہڑیاں گالہیں واجب ہِن اَتے جیہڑیاں گالہیں پاک ہِن اَتے جیہڑیاں گالہیں پسند دیاں ہِن اَتے جیہڑیاں گالہیں خوشنما ہِن مطلب ہِے کہ جو نیکی تے تعریف دیاں گالہیں ہِن اُنہاں تے غور کیتا کرو۔ ⁹ ۹۔ جیہڑیاں گالہیں تُساں میڈے کولوں سکھیاں تے حاصل کیتیاں تے سُنیاں ہِن اَتے میڈے وِچ ڈیکھیاں ہِن اُنہاں تے عمل کیتا کرو تاں خدا جو اطمینان دا چشمہ ہِے تُہاڈے نال راہسی۔ ¹⁰ ۱۰۔ میں خداوند اِچ بہوُں خوش ہاں کہ ہُن اتنے عرصے دے بعد تُہاڈا خیال میڈے کیتے وَل سر سبز تھی گئے۔ بےشک پہلے وی تُہاکوُ اِیں دا خیال ہا پر موقع نئیں ملیا۔ ¹¹ ۱۱۔ ایہہ نئیں کہ میں محتاجی دے لحاظ نال آدھا ہاں کیونکہ میں ایہہ سِکھے کہ جیہڑی وی حالت اِچ میں ہاں اوُندے تے ای راضی راہواں۔ ¹² ۱۲۔ میں گھٹنا ہوونا وی جان دا ہاں اَتے ودھنا وی جان دا ہاں۔ ہر ہِک گالھ تے ساریاں حالتاں اِچ میں رج ونجنا تے بھُکا راہونا تے ودھنا گھٹنا وی سِکھیا ہِے۔ ¹³ ۱۳۔ جیہڑا میکوُ طاقت بخشدے اوُندے وِچ میں سارا کجھ کر سگدا ہاں۔ ¹⁴ ۱۴۔ تاں وی تُساں چنگا کیتے جو میڈی مصیبت اِچ شامل تھئے۔ ¹⁵ ۱۵۔ اَتے اَے فِلپّیو! تُساں آپ وی جان دے ہیوے کہ خوشخبری دے شروع اِچ جیہڑے ویلے میں مِکدُنیہ توں ٹُریا ہامی تاں تُہاڈے علاوہ کئیں وی کلیسیا نے گھنن ڈیون دے معاملے وِچ میڈی مدد نہ کیتی۔ ¹⁶ ۱۶۔ چنانچہ تھسلنیکے وِچ وی میڈی ضرورتاں کوُ پوریاں کرن کیتے تُساں ہِک واری نئیں بلکہ ڈوُ واری کجھ گھلیا ہا۔ ¹⁷ ۱۷۔ ایہہ نئیں کہ میں انعام چاہندا ہاں بلکہ ایہو جیہا پھل چاہندا ہاں جیہڑا تُہاڈے حساب اِچ زیادہ تھی ونجے۔ ¹⁸ ۱۸۔ میڈے کول سارا کجھ ہِے بلکہ بہوُں زیادہ ہِے۔ تُہاڈی طرفوں گھلیاں ہویاں شئیاں اِپَفرُدِتُس دے ہتھ توں گھن کے میں خوش تھی گیا ہاں۔ اوہ خوشبو تے مقبول تھیون آلی قربانی ہِن جو خدا کوُ پسندیدہ ہِے ۔ ¹⁹ ۱۹۔ میڈا خدا اپنی دولت دے موافق جلال نال مسیح یسوع اِچ تُہاڈی ہر ہِک ضرورت کوُ پورا کریسی۔ ²⁰ ۲۰۔ ساڈے خدا تے باپ دی ہمیشہ تائیں تمجید تھیندی راہوے۔ آمین۔ ²¹ ۲۱۔ ہر ہِک مُقدس کوُ جیہڑا مسیح یسوع اِچ ہِے سلام آکھو۔ جیہڑے بھرا میڈے نال ہِن تُہاکوُ سلام آدھِن۔ ²² ۲۲۔ سارے مُقّدس خاص کر قیصر دے گھر آلے تُہاکوُ سلام آدھِن۔ ²³ ۲۳۔ خداوند یسوع مسیح دا فضل تُہاڈی روح دے نال راہوے۔