¹ ۱۔ پس اگر کجھ تسلّی مسیح وِچ تے محبت اِچ اطمینان تے روُح دی شراکت تے رَحم دِلی تے درد مندی ہِے۔ ² ۲۔ تاں میڈی ایہہ خوشی پوری کرو کہ ہِک دِل راہو۔ ہکو جئی محبت رکھو۔ ہِک جان تھی ونجو۔ ہِک ای خیال رکھو۔ ³ ۳۔ تفِرقے تے فضول دے فخر دے پاروُں کجھ نہ کرو بلکہ فروتنی نال ہِک ڈوجھے کوُ اپنے توں چنگا سمجھو۔ ⁴ ۴۔ ہر ہِک اپنے ای حال تے نئیں بلکہ ڈوجھیاں دے حال تے وی نظر رکھے۔ ⁵ ۵۔ اوہو جیہا مزاج رکھو جیہو جیہا یسوع دا وی ہا۔ ⁶ ۶۔ اوُں نے اگرچہ خدا دی صورت تے ہا خدا دے برابر تھیون کوُ اپنے قبضے اِچ رکھن دی شئے نہ سمجھیا۔ ⁷ ۷۔ بلکہ اپنے آپ کوُ خالی کر ڈِتے اَتے خادم دی صورت اختیار کیتی تے انساناں جیہا بن گیا۔ ⁸ ۸۔ اَتے انسانی شکل اِچ ظاہر تھی کے اپنے آپ کوُ نیواں کر ڈِتے اَتے اِتھوں تائیں فرمانبردار ریہا کہ موت بلکہ صلیبی موت چڑھ گیا۔ ⁹ ۹۔ اِیں کیتے خدا نے وی اوُں کوُ بہوُں سربلند کیتے اَتے اوُں کوُ اوہ ناں بخشے جیہڑا ساریاں ناواں توں اعلیٰ ہِے۔ ¹⁰ ۱۰۔ تاں جو یسوع دے ناں تے ہر ہِک گوڈا جھُک ونجے۔ بھاویں آسمان دے راہون آلیاں دا ہوئے تے بھاوین زمین دے راہون آلیاں دا۔ بھاویں اُنہاں دا جیہڑے زمین دے تھلے ہِن۔ ¹¹ ۱۱۔ اَتے خدا باپ دے جلال کیتے ہر ہِک زبان اقرار کرے کہ یسوع مسیح خداوند ہِے۔ ¹² ۱۲۔ پس اے میڈے عزیزو! جیویں تُساں ہمیشہ توں فرمانبردادی کریندے آئے ہیوے اوُں وے ای ہُن وی نہ صرف میڈی حاضری اِچ بلکہ اِیں توں وی بہوُں زیادہ میڈی غیر حاضری اِچ ڈردے تے کمبدے ہوئے اپنی نجات دے کم کیتے ونجو۔ ¹³ ۱۳۔ کیونکہ جو تُہاڈے وِچ نیت تے عمل ڈوُہاں کوُ اپنے نیک ارادے کوُ پورا کرن کیتے پیدا کریندے اوہ خدا ہِے۔ ¹⁴ ۱۴۔ سارے کم شکایت تے تکرار دے بغیر کیتا کرو۔ ¹⁵ ۱۵۔ تاں جو تُساں بےعیب تے بھولے تھی کے ٹیڑھے تے گناہگار لوگاں وِچ خدا دے ایہو جئے پُتر بنو جِنہاں وِچ کوئی نُقص نہ ہوئے (جِنہاں دے وِچ تُساں دُنیا وِچ ڈیویاں دی کار ڈکھائی ڈیندے راہو۔ ¹⁶ ۱۶۔ اَتے زندگی دا کلام پیش کریندے راہو) تاں جو مسیح دے ڈِیں میکوُ فخر تھیوے کہ میڈا محنت کرنا بےفائدہ نہ تھیا اَتے نہ میڈی محنت بےکار گئی۔ ¹⁷ ۱۷۔ اَتے اگر میکوُ تپہاڈے ایمان دی قربانی تے خدمت دے نال اپنا خون وی ڈیونا پووے تاں وی میں خوش ہاں اَتے تُساں ساریاں دے نال خوشی کریندا ہاں۔ ¹⁸ ۱۸۔ تُساں وی ایویں ای خوش تھیوو اَتے میڈے نال خوشی کرو۔ ¹⁹ ۱۹۔ میکوُ خداوند یسوع وِچ اُمید ہِے کہ تیمتھیس کوُ تُہاڈے کول جلدی بھیج ڈیساں تاں جو تُہاڈے حال دا پتا لا کے میڈی وی تسلّی تھی ونجے۔ ²⁰ ۲۰۔ کیونکہ کوُئی وی ایہو جیہا ہم خیال میڈے کول نئیں جیہڑا صاف دِلی نال تُہاڈے کیتے فکرمند ہووے۔ ²¹ ۲۱۔ سارے اپنی اپنی گالہیں دی فکر اِچ ہِن نہ کہ یسوع مسیح دی۔ ²² ۲۲۔ پر تُساں اوُندی مضبوطی توں واقف ہیوے کہ جیویں پُتر پیو دی خدمت کریندا ہِے اوُں وے ای اوُں نے میڈے نال خوشخبری پھیلاون اِچ خدمت کیتی۔ ²³ ۲۳۔ پس میں اُمید کریندا ہاں کہ جڈاں میکوُ اپنے حال دے انجام دا پتا لگ ویسی تاں اوُں کوُ فوراً بھیج ڈیساں۔ ²⁴ ۲۴۔ اَتے میکوُ خداوند تے بھروسا ہِے کہ میں آپ وی جلدی آساں۔ ²⁵ ۲۵۔ پر میں اپِفُردِتُس کوُ تُہاڈے کول گھلنا ضروری سمجھے۔ اوہ میڈا بھرا تے ہم خدمت تے ہم سپاہ تے تُہاڈا قاصد تے میڈی ضرورتاں کوُ پوری کرن کیتے خادم ہِے۔ ²⁶ ۲۶۔ کیونکہ اوہ تُہاکوُ ساریاں کوُ ملنا چاہندے اَتے اِیں کیتے اوہ بہوُں بےقرار راہندے کہ تُساں اوُندی بیماری دا وی حال سُنیا ہا۔ ²⁷ ۲۷۔ اَے سچ ہِے کہ اوہ بیماری توں مَرن کوُ ہا پر خدا نے اوُندے تے رَحم کیتے اَتے صرف اوُندے ای نئیں بلکہ میڈے تے وی تاں جو میکوُ غم تے غم نہ تھیوے۔ ²⁸ ۲۸۔ اِیں کیتے میکوُ اوُں کو گھلن دا بہوُں زیادہ خیال تھئے کہ تُساں وی اوُندی ملاقات توں وِل خوش تھی ونجو اَتے میڈا وی غم گھٹ ونجے۔ ²⁹ ۲۹۔ پس تُساں اوُندے نال بہوُں خوشی دے نال ملائے اَتے ایہو جئے بندیاں دی عزّت کیتا کرو۔ ³⁰ ۳۰۔ ا،یں کیتے کہ اوہ مسیح دے کم دے کیتے مَرن دے قریب تھی گیا ہا اَتے اوُں نے اپنی جان لا ڈِتی تاکہ جیہڑی کمی تُہاڈی طرفوں میڈی خدمت اِچ تھئی اوُں کوُ پورا کرے۔