¹ ۱۔ مسیح یسوع دے بندیاں پولس تے تیمتھیس دی طرفوں اُنہاں ساریاں پاک بندیاں دے ناں جیہڑے یسوع مسیح وِچ نگہبان تے خادماں سمیت۔ ² ۲۔ ساڈے باپ خدا خدا تے خداوند یسوع مسیح دی طرفوں تُہاکوُ فضل تے سلامتی ملدی راہوے۔ ³ ۳۔ میں جڈاں کِڈائیں تُہاکوُ یاد کریندا ہاں تے اپنے رَب دا شکر کریندا ہاں۔ ⁴ ۴۔ تے اپنی ہر ہِک دعا وِچ بہوں خوشی دے نال تُہاڈے ساریاں کیتے دعا کریندا ہاں۔ ⁵ ۵۔ کیوں جو تُساں پہلے ڈِیں کولوں گھِن کے اَج تائیں مسیح دی خوشخبری پھیلاون اِچ شامل تھئے ہیوے۔ ⁶ ۶۔ میکوُ اِیں گالھ دا یقین ہِے کہ جئیں نے تُہاڈے اندروُں ایہو جیا نیک کم شروع کیتا ہِے اوہ مسیح یسوع دے ڈِیں تیکر کریندا راہسی۔ ⁷ ۷۔ چنانچہ ایہہ واجب ہِے کہ میں تُہاکوُ ساریاں دے پاروں ایویں ای خیال کراں کیوں جو تُساں میڈے دِل وِچ راہندے ہیوے اَتے میڈی قید تے خوشخبری دی جواب دہی تے اِچ تُساں سارے میڈے نال فضل اِچ شریک ہیوے۔ ⁸ ۸۔ رَب میڈا گواہ ہِے کہ میں کیوں مسیح یسوع دی الفت کر کے تُساں ساریاں دا مشتاق ہاں۔ ⁹ ۹۔ اَتے ایہہ دعا کریندا ہاں کہ تُہاڈی محبت علم تے ہر طرح دی تمیز دے نال بہوں زیادہ تھیندی ونجے۔ ¹⁰ ۱۰۔ تاں جو چنگیاں گالہیں کوُ پسند کر سگو اَتے مسیح دے ڈِیں تائیں صاف دِل راہو تے تھُڈا نا کھاؤ۔ ¹¹ ۱۱۔ اَتے راستبازی دے پھل تھوں جو یسوع مسیح دے پاروُں ہِن بھرے راہو تاں جو خدا دا جلال ظاہر تھیوے اَتے اوُں دی ستائش تھیندی راہوے۔ ¹² ۱۲۔اَتے اَے بھراو میں چاہندا ہاں کہ تُساں جان گھِنو کہ جو میڈے تے گذرے اوُں دے نال خوشخبری ودھدی راہی ہِے۔ ¹³ ۱۳۔ اِتھوں تائیں کہ قیصری سپاہیاں دی ساری پلٹن اَتے باقی سارے لوگاں وِچ مشہور تھی گیا کہ میں مسیح دی خاطر قید وِچ ہاِں۔ ¹⁴ ۱۴۔ اَتے جیہرے خداوند اِِچ بھرا ہِن اُنہاں وِچوں کجھ میڈے قید تھیون دے پاروُں دلیر تے بے خوف تھی کے خدا دا کلام سُناون دی بہوں جرات کریندِن۔ ¹⁵ ۱۵۔ کجھ ایہہ جئے وی ہِن جیہڑے بہوں حسد تے جھیڈاں کرن دی وجہ دے پاروں مسیح دی مُنادی (پرچار) کریندے ہِن تے کجھ نیک نیت نال۔ ¹⁶ ۱۶۔ ہِک تاں محبت دے پاروُں ایہہ جان کے مسیح دی مُنادی کریندِن کہ میں خوشخبری پھیلاون دا خدا کوُ جواب ڈیساں اَتے ایں کیتے مقرر کیتا گیا ہاں۔ ¹⁷ ۱۷۔ پر ڈوجھے جھیڑے دی وجہ تھوں مُنادی کریندِن ناں کہ صاف تے چنگے دِل تھوں بلکہ اِیں خیال تھوں کہ میڈی قید اِچ میڈے کیتے مسیبت پیدا کرن۔ ¹⁸ ۱۸۔ پس کیا تھئے؟ صرف ایہہ کہ ہر طرح دے نال مسیح دی مُنادی تھیندی ہِے بھاویں بہانے نال تھیوے تے بھاویں سچائی نال اَتے ایندے تھوں میں بہوں خوش ہاں اَتے خوش راہساں وی۔ ¹⁹ ۱۹۔ کیوں جو جان دا ہاں کہ تُہاڈی دعا تے یسوع مسیح دے روح دے انعم نال اِیندا انجام میڈی نجات ہوسی۔ ²⁰ ۲۰۔ چنانچہ میڈے دَل دی آرزو تے اُمید ایہو ہِے کہ میں کئی گالھ وِچ وی شرمندہ نہ تھیواں بلکہ میڈی بہوں دلیری دے پاروُں جیویں مسیح دی تعظیم میڈے بدن دے پاروُں ہمیشہ تھیندی راہی ہِے اوُں وے ای ہُن وی ہوسی بھاویں میں زندہ راہواں یا مَرونجاں۔ ²¹ ۲۱۔ کیوں جو زندہ راہونا میڈے کیتے مسیح ہِے اَتے مَرنا نفع۔ ²² ۲۲۔ لیکن اگر میڈا جسم اِچ زندہ راہونا ہی میڈے کم کیتے چنگا ہِے تاں میں نئیں جان دا کہ کیں کوُ پسند کراں۔ ²³ ۲۳۔ میں ڈوحاں پاسے پھسیا ہویا ہاں۔ میڈا جی تاں چاہندا ہِے کہ اِتھوں روانہ تھی کے مسیح دے کول ونج راہواں کیونکہ ایہہ بہوں ہی چنگا ہِے۔ ²⁴ ۲۴۔ پر جسم اِچ راہونا تُہاڈی کیتے زیادہ ضروری ہِے۔ ²⁵ ۲۵۔ اَتے چونکہ ایِندا یقین ہِے اِیں کیتے میں جان دا ہاں کہ زندہ راہساں بلکہ تُہاڈے ساریاں دے نال راہساں تاں جو تُساں ایمان وِچ ودھدے ونجو اَتے اوُندے وِچ خوش راہو۔ ²⁶ ۲۶۔ اَتے جیہڑا تُہاکوُ میڈے تے فخر ہِے اوہ وَل میڈا تُہاڈے کول آون تھوں مسیح یسوع اِچ بہوں دیادہ تھی ویسی۔ ²⁷ ۲۷۔ صرف ایہہ کرو کہ تُہاڈا چال چلن مسیح دی خوشخبری دے موافق راہوے تاں جو بھاویں میں آواں اَتے تُہاکوُ ڈیکھاں بھاویں نہ آواں تُہادا حال سُناں کہ تُساں ہِک روُح وِچ قائم ہیوے اَتے انجیل دے ایمان کیتے ہِِک جان تھی کے بہوں زیادہ کوشش کریندے ہیوے۔ ²⁸ ۲۸۔ اَتے کئیں گالھ وِچ مخالفاں تھوں خوف نئیں کھاندے۔ ایہہ اُنہاں کیتے ہلاک تھیون دا صاف نشان ہِے لیکن تُہاڈی نجات دا اَتے ایہہ خدا دی طرفوں ہِے۔ ²⁹ ۲۹۔ کیونکہ مسیح دی خاطر تُہاڈے تے ایہہ فضل تھیئے کہ نہ صرف اُندے تے ایمان گھِن آؤ بلکہ اُندی خاطر تکلیفاں وی برداشت کرو۔ ³⁰ ۳۰۔ اَتے تُساں اوُں وے ای محنت کریندے راہو جیویں میکوُ کریندیاں ہویاں ڈِٹھا ہا اَتے ہُن وہ سُن دے ہیوے کہ میں اوُں وے ہی کریندا ہاں۔