¹ ۱۔ ایویں تھیا کہ جڈاں یسوع نے ایہہ گالہیں ختم کیتاں تے اوہ گلیل تھوں نکل کے دریائے یردن تھوں اَگے یہودیہ دے علاقے وچ آیا۔ ² ۲۔ اَتے ہِک وڈی بِھیڑ نے اوندا پِچھا کیتا اَتے اوُں نے اُنہاں کوُ اُتھاں چنگا کیتا۔ ³ ۳۔ اَتے فریسی آئے تے اوُں کوُ آزماون کیتے اوندے کول آئے تے آکھن لگے کہ کوئی بندہ شرعی وجہ تھوں اپنی ذال کو کئیں وجہ تھوں طلاق ڈے سگدے؟ ⁴ ۴۔ اوُں نے جواب اِچ اُنہاں کوُں آکھیا کیا تُساں نے نئیں پڑھے کہ جئیں نےاُنہاں کوُ بنائے اوُں نے شروع ای تھوں اُنہاں کوُ مَرد تے عورت بنا کے آکھے۔ ⁵ ۵۔ ایں دے پاروں مرد پیو تے ماں کولوں اَنج تھی کے اپنی ذال نال راہسی اَتے اوہ ڈوُہیں ہِک جسم تھی سن؟۔ ⁶ ۶۔ پس اوہ ڈوُ نئیں بلکہ ہِک جسم ہِن۔ ایں کیتے جئیں کوُ خدا نے جوڑیا ہِے اوُں کوُ بندہ الگ نہ کرے۔ ⁷ ۷۔ اُنہاں نے اوُں کوُ آکھیا کہ وَل موسیٰ نے کیوں حکم ڈِتا ہا کہ طلاق نامہ ڈے کے چھوڑ ڈِتا ونجے؟۔ ⁸ ۸۔ اوُں نے اُنہاں کوُ آکھیا موسیٰ نے تاں تُہاڈی سخت دلی دے پاروُں تُہاکوُں اپنی ذال کوُ اَنج کرن دی اجازت ڈِتی ہائی پر شروع کولوں ایویں نہ ہا۔ ⁹ ۹۔ اَتے میں تُہاکوُں آدھا ہاں کہ جیہڑا کوئی اپنی ذال کوُ حرامکاری دے علاوہ کوُئی بئی وجہ تھوں چھوڑ ڈیندے اَتے ڈوجھی نال ویاہ کریندے تاں اوہ زنا کریندے اَتے جو کوئی اوُں چھوڑی ہوئی نال ویاہ کریندے اوہ وی زِنا کریندے۔ ¹⁰ ۱۰۔ چیلیاں نے یسوع کو آکھیا کہ اگر مَرد دا ذال دے نال ایہو جیا حال ہِے تاں ویاہ نہ کر نا ای چنگا ہِے۔ ¹¹ ۱۱۔ اوُں نے اُنہاں کوُ آکھیا سارے اِیں گالھ کوُ قبول نہ کریسن پر صرف اوُہو جِنہاں کوُ ایہہ قدرت ڈِتی گئی ہِے۔ ¹² ۱۲۔ کیومکہ کجھ ہیجڑے ایہو جئے ہِن جیہڑے اپنی ماں دے ڈِھڈ وِچوں ای ایویں جمے ہِن اَتے بعض ہیجڑے ایہو جئے ہِن جِنہاں نے آسمان دی بادشاہی کیتے اپنے آپ کوُ ہیجڑا بنائے۔ جو قبول کریندے اوہ قبول کرے۔ ¹³ ۱۳۔ اوُں ویلے کجھ لوگ بالاں کوُ اوُں دے کول گھِن آئے تاں جو اوہ اُنہاں تھے ہتھ رکھ کے اُنہاں کوُ دعا ڈیوے پر چلیاں نے اُنہاں کو جِھڑکیا۔ ¹⁴ ۱۴۔ پر یسوع نے آکھا بالاں کوُ میڈے کول آون ڈیوو اِنہاں کوُ نہ ہٹکو کیوں جو آسمان دی بادشاہی ایہو جیہاں دی ہِے۔ ¹⁵ ۱۵۔ اَتے اوُں نے انہاں تے ہتھ رکھے اُتھوں لگا گیا۔ ¹⁶ ۱۶۔ وَل ہِک بندے نے یسوع دے کول آ کے اوُں کوُ آکھیا میں کیہڑی نیکی کراں کہ ہمیشہ زندگی میکوُ مل ونجے؟ ۔ ¹⁷ ۱۷۔ یسوع نے اوُں کوُ آکھیا توُں میڈے کولوں کیوں نیکی دے بارے پُچھدا ہئیں؟ نیک تاں ہِکو ای ہِے لیکن اگر تُوں ہمیشہ دی زندگی چاہندا ہئیں تاں حکماں تے عمل کر۔ ¹⁸ ۱۸۔ اوُں نے اوُں کوُں آکھیا کیہڑے حکماں تے؟ یسوع نے آکھیا قتل نہ کر۔زنا نہ کر۔چوری نہ کر۔کوڑی گواہی نہ ڈے۔ ¹⁹ ۱۹۔ اپنے پیو دی تے ماں دی عزت کر اَتے اپنے گواہنڈی نال اپنے وانگوں محبت رکھ۔ ²⁰ ۲۰۔اوُں جوان نے اوُں کوُ آکھیا میں اِنہاں ساریاں حکماں تے عمل کر چکا ہاں تے ہُن میڈے وِچ کیہڑی شئے دی کمی ہِے؟ ²¹ ۲۱۔ یسوع نے اوُں کوُ آکھیا اَتے اگر تُوں کامل تھیونا چاہندیں تاں ونج اپنا سارا کجھ ویچ کے غریباں وِچ وَنڈ چھوڑ۔ تے تیکوُں آسمان تے خزانہ مِلسی وَل آ کے میڈے میڈے پچھوں ٹُر پَو۔ ²² ۲۲۔ پر اوہ جوان ایہہ گالھ سُن کے بہوں ڈُکھی تھی کے لگا گیا کیوں جو وڈا مالدار ہا۔ ²³ ۲۳۔ یسوع نے اپنے چیلیاں کوں آکھیا میں تُہاکوُںسچ آدھا ہاں کہ امیر بندے دا خدا دی بادشاہی وِچ داخل تھیونا بہوں اوکھا ہِے۔ ²⁴ ۲۴۔ میں وَل تُہاکوُں آدھا ہاں کہ اُٹھ دا سوئی دےکھپے وِچوں وڑنا ایں تھوں زیادہ سوکھا ہِے کہ امیر بندہ خدا دی بادشاہی دے وچ لنگھ ونجے۔ ²⁵ ۲۵۔ جڈاں چیلیاں نے اے سُنیا تاں بہوں حیران تھئے اَتے آکھن لگے کہ وَل کون نجات پا سگدے؟۔ ²⁶ ۲۶۔ یسوع نے اُنہاں دے پاسے ڈِٹھا تے آکھیا بندے کیتے ایہہ اوکھا ہِے پر خدا دے کیتے ہر شے سوکھی ہِے۔ ²⁷ ۲۷۔ ول پطرس نے جواب دے وچ اوُں کوُ آکھیا ڈیکھ اَساں تاں ہر شئے چھوڑ کے تیڈے پچھوں ٹُر پئے ہئیں۔ ساکوُ کیا مِلسی؟ ²⁸ ۲۸۔ یسوع نے اُنہاں کوُں آکھے میں تُہاکوُں سچ آہدھا ہاں کہ جیہڑے ویلے ابن آدم نویں پیدایش اِچ اپنے جلال دے تخت تے باہسی تاں تُساں وی جو میڈے پچھوں ٹُر پئے ہیوے بارہ تختاں تے بیہہ کے اسرائیل دے بارہ قبیلیاں دا انصاف کریسو ۔ ²⁹ ۲۹۔ جئیں کئیں نے اپنا گھراں یا بھیناں یا پیو یا ماں یا بالاں یا زمیناں کو میڈے ناں دی خاطر چھوڑ ڈِتے اوُں کوُ سو گُنا مِلسی اَتے ہمیشہ دی زندگی دا وارث ہوسی۔ ³⁰ ۳۰۔ لیکن بہوں سارے اول آخر تھی ویسن اَتے آخر اول۔