1
۱۔ہَن ایویں تھیا کہ لوگاں دی ہک وڈی بھیڑ خدا دا کلام سُنن کیتے یسوع تے ڈھاندی پئی ہائی۔اوہ گینسرت دی جھیل دے کنڈے تے کھڑا تھی گیا۔
2
۲۔اوُں نے جھیل دے کنڈے تے ڈو کشتیاں کوُ ڈٹھا۔جتھاں مچھیرے کشتیاں تھوں اُتر کے اپنے جال صاف کریندے پئے ہَن۔
3
۳۔اُنہاں کشتیاں وِچوں یسوع ہک کشتی تے ونج بیٹھا جیہڑی شمعون پطرس دی ہائی یسوع نے اوُں کوُ آکھیا کہ کشتی کوُ کنڈے تھوں تھوڑا دور پانی اِچ گھِن ونج وَل اوہ کشتی وِچ بیٹھ کے لوگاں کوُ تعلیم ڈیون لگ پئے۔
4
۴۔جیہڑے ویلے اوہ کلام سُنا چُکے تاں اوُں نے شمعون کوُ آکھیا اپنی کشتی کوُ ڈوُنگے پانی وِچ گھِن ونج اَتے مچھیاں پکڑن کیتے جال سَٹو۔
5
۵۔شمعون نے جواب اِچ آکھیا۔"اے اُستاد اَساں ساری رات محنت کیتی ہے پَر کجھ وی ہتھ نیئں آیا ،پَر جیویں توُں آدھا ہیں میں جال سٹیندا ہاں۔
6
۶۔ جیہڑے ویلے اُنہاں نے جال سٹیا تاں اُنہاں نے بہوں زیادہ مچھیاں پکڑیاں اِتھوں تایئں کہ اُنہاں دے جال پھٹن لگ پئے۔
7
۷۔وَل اُنہاں نے اپنے سنگتیاں کوُ سڈیا جیہڑے ڈوجھی کشتی تے ہَن تاں جو اُنہاں دی مدد کیتے آون۔اوہ آئے اَتے اُنہاں نے ڈویں کشتیاں مچھیاں نال بھر گیاں اَتے کشتیاں پانی اِچ ڈُبن لگ گیئاں۔
8
۸۔ پَر شمعون پطرس نے جیہڑے ویلے ایہہ ڈِٹھا تاں اوہ یسوع دے اَگے جُھک گیا تے آکھن لگا۔"اے خداوند توُں اِتھوں لگا ونج کیونکہ میں ہک گنہگار بندہ ہاں۔
9
۹۔کیونکہ اوہ تے اوندے سنگتی اوُں شکار تھوں جیہڑا اُنہاں نے پکڑیا ہا بہوں حیران تھئے۔
10
۱۰۔اِنہاں وِچ زبدی دے پُتر یعقوب تے یوحنا وی جیہڑے شمعون دے سنگتی ہا۔اَتے یسوع نے شمعون کوُ آکھیا ، گھبرا نہ،کیونکہ ہُن توُں بندیاں کوُ پکڑا کریسیں۔
11
۱۱۔جیہڑے ویلے اوہ اپنی کشتیاں کوُ کنڈے تے گھِن آئے تاں سارا کجھ چھوڑ کے اوندے پچھوں ٹُر پئے.
12
۱۲۔ اُنہاں شاہراں وِچوں ہک شاہر اِچ جڈاں یسوع آیا تاں اُتھاں ہک بندہ ہا جیندے سارے جسم تے کوڑھ ہا۔جیہڑے ویلے اوُں نے یسوع کوُ ڈِٹھا تاں اوں منہ دے بھار ڈِھے کو مِنت کرن لگا۔"اے خداوند اگر تیکوُ پسند ہے تاں میکوں معاف کر سگدیں۔
13
۱۳۔ یسوع نے اوُں دے پاسے اپنا ہتھ ودھایا اَتے اوُں کوُ ہتھ لایا تے آکھیا۔" میں چاہندا ہاں کہ توُں صاف تھی ونج ۔"تاں اوُں ویلے ای اوندا کوڑھ ختم تھی گیا۔
14
۱۴۔یسوع نے اوُں کوُ حُکم ڈِتا کہ اوہ ایہہ کیئں کوُ نہ ڈساوے ،اوُں کوُ آکھیا۔"ونج اپنے آپ کوُ کاہن کوُ ڈکھا جیویں موسیٰ نے حکم ڈِتا ہے۔اوُں دے مطابق پاک و صاف تھیون دی قربانی چڑھا تاں جو اُنہاں کیتے گواہی تھیوے۔
15
۱۵۔ پَر ایہہ خبر دُور دُور تک پھیل گئی۔اَتے لوگاں دی وڈی بھیڑ بیماریاں تھوں چنگے تھیون کیتے تے اوندی تعلیم سُنن کیتے کٹھی تھی گئی۔
16
۱۶۔یسوع بہوں واری ویران جاہ تے دُعا کرن کیتے ویندا ہا۔
17
۱۷۔اُنہاں ڈیواراں اِچ جڈاں اوہ تعلیم ڈیندا ہا تاں اُتھاں فریسی تے شریعت دے اُستاد وی بیٹھے ہَن جیہڑے گلیل تے یہودیہ دے آسے پاسے دے علاقیاں وِچوں آئے ہَن۔اَتے خداوند دی چنگا کرن آلی قدرت اُنہاں دے نال ہا۔
18
۱۸۔ وَل کجھ بندے ہِک مفلوگ کوُ کَھٹ تے چاہ کے گھِن آئے۔اوہ اوُں مفلوج کوُ گھِن کے اندر ونجن دی کوشش کریندے ہَن تے راہ گولیندے پئے ہَن تاں جو اوُں کوُ یسوع سے سامنے گھِن آون۔
19
۱۹۔بندیاں دی بھیڑ دی وجہ تھوں اُنہاں کوُ راہ نہ مِلا۔وَل اوہ پوڑیاں تھوں چڑھدے ہوئے چھت تے گئے اَتے چھت اکھیڑ کے کھَٹ کوُ بندیاں دے وِچ یسوع دے بالکل سامنے رکھ ڈِتا۔
20
۲۰۔ اُنہاں دا ایمان ڈِیدھیاں ہویاں یسوع نے اوُں بندیاں کوُ آکھیا۔"تیڈے گناہ معاف تھئے
21
۲۱۔صدوقی تے فریسی آپس اِچ ایہہ سوال کرن لگے کہ،"ایہہ کون ہے جو کُفر آدھا ہے؟کیونکہ خدا دے سوا کوئی گناہ معاف نیئں کر سگدا۔"
22
۲۲۔ پَر یسوع نے اپنی رُوح اِچ ایہہ جان کہ اوہ کیا سوچیندے ہَن جواب اِچ اُنہاں کوُ آکھیا۔"تُساں اپنے دِلاں اِچ کیوں شک کریندے ہیوے؟۔
23
۲۳۔آسان کیا ہے؟کیا تیڈے گناہ معاف تھئے یا ایہہ کہ اُٹھ تے پھر ٹُر۔
24
۲۴۔پَر تہاکوُں ایہہ جان گھننا چاہیدا ہے کہ اِبن آدم کوُ زمین تے گناہ معاف کرن دا اختیار ڈِتا گیا ہے ،میں تہاکوُں آدھا ہاں ،"اُٹھ اپنی کھٹ چا تے اپنے گھر لگا ونج۔
25
۲۵۔اوہ اُنہاں دے سامنے جلدی نال اُٹھ بیٹھا اَتے جیہڑی کھٹ تے اوہ سُتا ہا اوُں کوُ چایا تے اوہ خدا دی تعریف کریندا ہویا اپنے گھر کوُ لگا گیا۔
26
۲۶۔اوہ سارے حیران تھی گئے اَتے خدا دی تمجید کرن لگ پئے تے اوہ سارے خوف نال بھر گئے اَتے آکھن لگے ،کہ"اَج اساں بہوں حیرت آلیاں گالہیں ہوندیاں ہویاں ڈٹھیاں ہِن۔
27
۲۷۔ ایہہ گالہیں تھیون دے بعد یسوع لاوی ناں دے ہک چُنگی گھِنن آلے کوُ مِلا۔جیہڑا چُوکی اُتے چُنگی گھنن بیٹھا ہا۔یسوع نے اوُں کوُ آکھیا۔"میڈے پیچھے آ۔"
28
۲۸۔لاوی نے سب کجھ اُتھایئں چھوڑا تے اُٹھ کے یسوع دے پیچھے ٹُر پیا۔
29
۲۹۔وَل یسوع نے لاوی کیتے اپنے گھر اِچ ہک بہوں وڈی دعوت کیتی۔اُتھاں بہوں سارے چُنگی گھنن آلے اَتے ڈوجھے لوگ وی اوندے نال ٹُکر کھاون کیتے بیٹھے ہَن۔
30
۳۰۔ فریسی نے صدوقی یسوع دے چیلیاں دے اَگے ایہہ شکایت کریندے ہوئے ایہہ آکھن لگے۔"تُساں کیوں چُنگی گھنن آلیاں تے گنہاگار بندیاں دے نال کھاندے پیندے ہو؟"۔
31
۳۱۔ یسوع نے جواب اِچ اُنہاں کوُ آکھیا۔"اوہ بندے جیہڑے چنگے ہَن اُنہاں کوُ حکیم دی ضرورت نیئں بلکہ صرف اُنہاں کوُ ہے جیہڑے بیمار ہِن۔
32
۳۲۔میں نیک لوگاں دی توبہ کیتے نیئں آیا بلکہ گنہگاراں دی توبہ کیتے آیا ہاں۔
33
۳۳۔ اُنہاں نے اوُں کوُ آکھیا۔"یوحنا دے چیلے تو ہمیشہ روزہ رکھیندے ہَن اَتے دُعا وی کریندے ہَن تے فریسیاں دے چیلے وی ایویں ای کریندے ہَن۔پَر تیڈے چیلے کھاندے پیندے ہَن۔
34
۳۴۔یسوع نے اُنہاں کوُ آکھیا۔"کیا بُرائی جڈا تایئں گھوٹ دے نال ہَن روزہ رکھسن؟۔
35
۳۵۔پَر اوہ ڈِیں آسان جڈاں گھوٹ اُنہاں کولوں الگ کیتا ویسی،اُنہاں ڈِیہاں وِچ اوہ روزہ رکھسن۔
36
۳۶۔یسوع نے اُنہاں کوُ ہک تمثیل وی سُنائی،"کوئی بندہ ایہو جیا نیئں جیہڑا نویں کپڑے دا ٹوٹا پُرانے کپڑے وِچ لاوے۔اگر اوہ ایویں کریسی تاں نواں کپڑا پھٹ ویسی۔اَتے پُرانا کپڑا نویں کپڑے اِچ چنگا وی ناں لگسی۔
37
۳۷۔کوُئی بندہ نویں مَے وی پُرانی مشکاں اِچ نیئں بھریندا ۔اگر اوہ ایویں کریسی تاں نویں مَے مشکاں کوُ پھاڑ ڈیسی اَتے ساری مَے وَٹیِ ویسی۔تے مشکاں برباد تھی ویسن۔ایں کیتے ضروری ہے کہ نویں مَے نویاں اِچ ہی بھری ونجے۔
38
۳۸۔ بلکہ نویں مَے نویں مشکاں اِچ ای بھرنا ٹھیک ہے۔
39
۳۹۔کوُئی بندہ پُرانی مَے پی کے نویں مَے دی خواہش نیئں کریندا کیونکہ اوہ آدھا ہے کہ ۔"پُرانی ہی چنگی ہائی"۔