1
۱۔ بھراواں آلی محبت قائم راہوے۔
2
۲۔ مسافراں دی خدمت کرن توں انجان نہ بنو کیونکہ اِیندی وجہ توں بہوُں سارے لوگاں نے بے خبری اِچ فرشتیاں دی خدمت کیتی ہِے۔
3
۳۔ قیدیاں کوُ ایویں یاد رکھو کہ جیویں تُساں اُنہاں دے نال قید ہیوے اَتے جنہاں دے نال بدسلوکی کیتی ویندی ہِے اُنہاں کوُ وی ایہہ جان کے یاد رکھائے کہ اساں وی جسم رکھیندے ہئیں ۔
4
۴۔ ویاہ کرنا ساریاں وِچ عزّت دی گالھ سمجھی ونجے اَتے بسترے تے کوُئی داغ نہ راہوے کیونکہ خدا حرامکاراں تے زِناکاراں دی عدالت کریسی۔
5
۵۔ دولت دی دوستی توں دوُر راہو اَتے جو کجھ تُہاڈے کول ہِے اوُندے تے ای گزارہ کرو کیونکہ اوُں نے آپ فرمائے کہ میں تیڈے کولوں ہر گز علیحدہ نہ راہساں اَتے تیکوُ کڈائیں وی نہ چھوڑیساں۔
6
۶۔ اِیں کیتے اساں دلیری نال آدھے ہئیں کہ خداوند میڈا مدد گار ہِے۔ میں خوف نہ کریساں۔ انسان میڈا کیا کر گھنسی؟۔
7
۷۔ جیہڑے تُہاڈی راہنمائی کرن آلے ہَن اَتے جنہاں نے تُہاکوُ کلام سُنائے اُنہاں کوُ یاد رکھو اَتے اُنہاں دی زندگی دے انجام تے غور کر کے اُنہاں جئے ایماندار تھی ونجو۔
8
۸۔ یسوع مسیح کل تے اَج بلکہ ہمیشہ کیتے ہِکو جیہا ہِۓ۔
9
۹۔ طرح طرح دی تے اجنبی تعلیم دے پاروُں رُلدے نہ پھرو کیونکہ فضل دے نال دِل دا مضبوط راہونا بہوُں بہتر ہِے نہ کہ اُنہاں کھاونیاں کولوں جیندے استعمال کرن آلیاں نے ککجھ وی فائدہ نہ چاتے۔
10
۱۰۔ ساڈی ہِک ایہو جئی قربان گاہ ہِے جیندے وِچوں خیمے دی خدمت کرن آلیاں کوُ کھاون دا اختیار نئیں۔
11
۱۱۔ کیونکہ جنہاں جانوراں د خون سردار کاہن پاک مکان اِچ گناہ دے کفارے کیتے گھن ویندا ہِے اُنہاں دے جسم خیمہ گاہ دے باہر ساڑے ویندے ہِن
12
۱۲۔ اِیں کیتے یسوع نے وی اُمّت کوُ آپ اپنے خون نال پاک کرن کیتے بوہے دے باہر ڈُکھ چاتے۔
13
۱۳۔ پس آؤ اوُں دی ذلّت کوُ اپنے اُتے گھن کے خیمہ گاہ دے باہر اوُں دے کول جُلوُں۔
14
۱۴۔ کیونکہ اِتھاں ساڈا کوُئی قائم راہون آلا شاہر نئیں بلکہ اساں آون آلے شاہر کو گولیندے پئے ہئیں۔
15
۱۵۔ پس اساں اوُں دے وسیلے نال حمد دی قربانی یعنی اوُں مُنہ دا پھل جیہڑے اوُں دے ناں دا اقرار کریندِن خدا کیتے ہر ویلے چڑھایا کروُں۔
16
۱۶۔ اَتے بھلائی تے سخاوت کرنا نہ بھُلوُں اِیں کیتے کہ خدا ایہو جئی قربانیاں توں خوش تھیندے۔
17
۱۷۔ جیہڑے تُہاڈے پیشوا ہِن اُنہاں دے تابعدار راہو کیونکہ اوہ تُہاڈی روحاں دے فائدے کیتے اُنہاں دی کار جاگدے راہندِن جنہاں کوُ حساب ڈیونا پوسی تاں جو اوہ خوشی دے نال ایہہ کم کرن نہ کہ غم نال کیونکہ اِیں صورت اِچ تُہاکوُ کجھ فائدہ نئیں۔
18
۱۸۔ ساڈے واسطے دعا کیتا کرو کیوں جو ساکوُ یقین ہِے کہ ساڈا دِل صاف ہِے اَتے اساں ہر ہِک گالھ اِچ نیکی دے نال زندگی گزارنا چاہندے ہئیں۔
19
۱۹۔ میں تُہاکوُ ایہہ کم کرن دی بئی وی نصیحت کریندا ہاں کہ میں جلدی تُہاڈے کول وَل آساں۔
20
۲۰۔ ہُن خدا جو اطمینان دا چشمہ ہِے جیہڑا بھیڈاں دے وڈے آجڑی یعنی ساڈے خداوند یسوع کوُ ہمیشہ دے عہد دے خون دے پاروُں مُردیاں وِچوں زندہ کر کے چا کے گھن آئے۔
21
۲۱۔ تُہاکوُ ہر نیک گالھ اِچ کامل کرے تاں جو تُساں اوُندی مرضی پوری کرواَتے جو کجھ اوُندے نیڑے پسند ہِے یسوع مسیح دے وسیلے نال ساڈے وِچ پیدا کرے۔ جیں دی تمجید ہمیشہ تائیں تھیندی راہوے۔ آمین۔
22
۲۲۔ اَے بھراؤ! میں تُہاڈے اگے منّت کریندا ہاں جو اِیں نصیحت دے کلام دی برداشت کرو کیونکہ میں تُہاکوُ مختصر طور تے لکھیا ہِے۔
23
۲۳۔ تُہاکوُ واضح تھی ونجے جو ساڈا بھرا تیمتھیس رہا تھی گیا ہِے۔ اگر اوہ جلدی آگئے تاں میں اوُندے نال تُہاکوُ مِلساں۔
24
۲۴۔ اپنے سارے پیشواواں تے سارے پاک لوگاں کوُ سلام آکھو۔ اِطالیہ آلے تُہاکوُ سلام آدھِن۔
25
۲۵۔ تُہاڈے ساریاں تے فضل تھیندا راہوے۔ آمین۔