1
۱۔ وَل اساں جیہڑے اوندے نال کم اِچ شامل ہئیں اے وی منت کریندے ہئیں کہ خدا دا فضل جیہڑا تُہاڈے تے تھئے اوہ فضول ناں راہون ڈیوو۔
2
۲۔ کیونکہ اوُں نے فرمائے کہ میں قبولیت دے ویلے تیڈی سُن گِدی اَتے چھٹکارے دے ڈیں تیڈی مدد کیتی۔ ڈیکھو اے قبولیت دا ویلہ ہِے۔ ڈیکھو اے چھٹکارے دا ڈیں ہِے۔
3
۳۔ اساں کئیں گل وچ تھڈا کھاون دا موقع نئیں سے ڈیندے تاں جو ساڈی خدمت تے کوُئی حرف نہ آوے۔
4
۴۔ بلکہ خدا دے خادماں دی طرح ہر گال ےتھوں اپنی خوبی ظاہر کریندے ہئیں۔ وڈے صبر نال۔ مصیبت نال۔ ضرورت نال۔ تنگی نال۔
5
۵۔ کوڑے کھاون نال۔ قید تھیون نال۔ رولے رپیاں نال۔ محنت کرن نال۔ جاگن نال۔ بھوکھے راہون نال۔
6
۶۔ پاکی نال۔ علم نال۔ برداشت کرن نال۔ مہربانی نال۔ روح القدس نال۔ سچی محبت نال۔
7
۷۔ سچائی دے کلام نال۔ خدا دی قدرت نال۔ راستبازی دے ہتھیاراں دے پاروں جیہڑے سجے کھبے ہِن۔
8
۸۔ عزت تے بےعزتی دے وسیلے نال۔ بدنامی تے نیک نامی دے وسیلے نال جیویں گمراہ کرن آلے معلوم تھیندین وَل وی سچے ہن۔
9
۹۔ گمناماں وانگوں ہئیں تاں وی مشہور ہاسے۔ موئے ہویاں دی مانند ہئیں وَل وی جیوندے ہئیں۔ مار کھاون والیاں دی طرح ہئیں پر جان تھوں مارے نئیں سے ویندے۔
10
۱۰۔ اوُں وے ہئیں جیویں ڈوُکھی ہوندین وَل وی خوش راہندے ہاں۔ محتاجاں دی طرح ہئیں پر ڈوجیاں کوُں امیر کر ڈیندے ہئیں۔ ناداراں دی طرح ہئیں پر تاں وی سارا کجھ ساڈے کول ہِے۔
11
۱۱۔ اے کرنتھیو! اساں تُہاڈے نال کھل کے گالہیں کیتین اَتے ساڈا دِل تہاڈی طرفوں کھُلا تھی گئے۔
12
۱۲۔ ساڈے دلاں وچ تہاڈے کیتے تنگی کئے نئین پر تُہاڈے دِلاں وچ تنگی ہِے۔
13
۱۳۔ پس میں پُتر جان کے تُہاکو آدھا ہاں کہ تُساں وی اُوں دے بدلے وچ کھلے دِل والے تھی ونجو۔
14
۱۴۔ بے ایماناں دے نال ڈِنگی پنجالی وچ نہ پھسو کیونکہ راستبازی تے بے دینی وچ کیا میل جول ہِے؟ یا سُجھالے تے اندھارے وچ کیا سانجھ ہِے۔
15
۱۵۔ مسیح کوُ بلیعال دے نال کیا واسطہ ہِے؟ یا ایماندار دا بے ایمان دے نال کیا واسطہ؟۔
16
۱۶۔ اَتے خدا دے گھر کوُ بُتاں دے نال کیا تعلق ہِے؟کیونکہ اساں زندہ خدا دا گھر ہئیں۔ چنانچہ خدا نے فرمائے کہ میں اُنہاں وچ راہساں تے اُنہاں وچ ٹرساں پھرساں اَتے میں اُنہاں دا خدا ہوساں اَتے اوہ میڈی اُمت ہوسن۔
17
۱۷۔ ایں کیتے خداوند نے فرمائے کہ اُنہاں وچوں نکل کے الگ تھی ونجو اَتے پلید شئیاں کوُ ہتھ نہ لاؤ تاں میں تُہاکوُں قبول کر گھنساں۔
18
۱۸۔ اَتے میں تُہاڈا پیوُ تھیساں اَتے تُساں میڈے پُتر تے دھیاں ہوسو۔ اے خداوند قادر مطلق دا قول ہِے۔