¹ ۱۔ جتنے وی نوکر ہِن جُوئے دے تھلے ہِن اپنے مالکاں کوُ بہوُں عزت دے لائق جانن تاں جو خدا دا ناں تے تعلیم بدنام نہ تھیوے۔ ² ۲۔ اَتے جنہاں دے مالک ایماندار ہِن اوہ اُنہاں کوُ بھرا ہوون دے پاروُں حقیر نہ جانن بلکہ اِیں کیتے زیادہ تر اُنہاں دی خدمت کرن کہ فائدہ چاون آلے ایماندار تے عزیز ہِن۔ تُو اِنہاں گالہیں دی تعلیم ڈے تے نصیحت کر۔ ³ ۳۔ اگر کوُئی بندہ بئی طرح دی تعلیم ڈیندا ہِے تے صحیح گالہیں کوُ یعنی ساڈے خداوند یسوع مسیح دیاں گالہیں تے اوُں تعلیم کوُ نئیں منیندا جیہڑیاں دینداری دے مطابق ہِن۔ ⁴ ۴۔ اوہ مغرور ہِے اَتے کجھ نئیں جان دا بلکہ اوُں کوُ بحث تے لفظی تکرار کرن دی بیماری ہِے۔ جئیں دے نال حسد تے جھگڑے تے بدگوئیاں تے بدگمانیاں۔ ⁵ ۵۔ اَتے اُنہاں بندیاں وِچ ردّوبدل پیدا تھیندا ہِے جنہاں دی عقل وگڑ گئی ہِے اَتے اوہ حق توں محروم ہِن تے دینداری کوُ نفع ہی دا ذریعہ سمجھدے ہِن۔ ⁶ ۶۔ہاں دینداری تھوڑی شئے تے رضا مندی دے نال وڈے نفع دا ذریعہ ہِے۔ ⁷ ۷۔ کیونکہ نہ تاں اساں دُنیا وِچ کجھ گھِن کے آئے تے نہ کجھ اوُں دے وِچوں کجھ لے جا سگدے ہئیں۔ ⁸ ۸۔ پس اگر ساڈے کول کھاون پاون کوُ ہِے تاں اوُں دے تے گزارا کروں۔ ⁹ ۹۔ پر جو امیر تھیونا چاہندِن اوہ ایہو جئی آزمائش تے بہوُں ساری بےہودہ تے نقصان پہنچاون آلی خواہشاں اِچ پھسے ہِن جو بندیاں کوُ تباہی تے ہلاکت دے دریا وِچ ڈَبو ڈیندیاں ہِن۔ ¹⁰ ۱۰۔ کیونکہ زر دی دوستی ہر قسم دی بُرائی دی جڑ ہِے جئیں دی آرزو وِچ بعض نے ایمان توں گمراہ تھی کے اپنے دِلاں کوُ طرح طرح دے غماں نال زخمی کر گِدے۔ ¹¹ ۱۱۔ پر اَے خدا دے بندے! تُو اِنہاں گالہیں توں بھج تے راستبازی۔ دینداری۔ایمان۔ محبت۔ صبر تے حلم دا طالب تھی۔ ¹² ۱۲۔ ایمان دی چنگی کُشتی لڑ۔ اوُں ہمیشہ دی زندگی تے قبضہ کر گھِن جیندے کیتے تُو سڈیا گیا ہا اَتے بہوُں سارے گواہاں دے سامنے چنگا اقرار کیتا ہا۔ ¹³ ۱۳۔ میں اوُں خدا کوُ جیہڑا ساریاں شئیاں کوُ زندہ کریندا ہِے اَتے مسیح یسوع کوُ جئیں نے پُنطیس پیلاطُس دے سامنے چنگا اقرار کیتا ہاگواہ کر کے تیکوُ تاکید کریندا ہاں۔ ¹⁴ ۱۴۔ کہ ساڈے خداوند یسوع مسیح دے اوُں آون تائیں حکم کوُ بےداغ تے بےالزام رکھ۔ ¹⁵ ۱۵۔ جینکوُ اوہ مُناسب ویلے تے ظاہر کریسی جو مُبارک تے واحد حاکم۔ بادشاہواں دا بادشاہ تے خداونداں دا خداوند ہِے۔ ¹⁶ ۱۶۔ بقا صرف اوُں کوُ ای ہِے اَتے اوہ اوُں نور وِچ راہندے جئیں تک کوُئی نئیں پہنچ سگدا نہ اوُں کو کئیں انسان نے ڈِٹھے اَتے نہ ڈیکھ سگدے۔ اوُں دی عزت تے سلطنت ہمیشہ تک راہوے۔ آمین۔ ¹⁷ ۱۷۔اِیں موجودہ جہان دے دولت منداں کوُ حُکم ڈے کہ مغرور نہ تھیون تے کمزور دولت تے نئیں بلکہ خدا تے اُمید رکھن جو ساکوُ لُطف چاون کیتے ساریاں شئیاں بہوُں زیادہ ڈیندا ہِے۔ ¹⁸ ۱۸۔ اَتے نیکی کروں تے چنگے کماں وِچ دولت مند بنوں تے سخاوت تے تیار تے مدد تے تیار راہوں۔ ¹⁹ ۱۹۔ اَتے آیندہ کیتے اپنے واسطے ہک چنگی بنیاد قائم کر رکھوں تاں جو حقیقی زندگی تے قبضہ کروں۔ ²⁰ ۲۰۔ اَے تیمتھیس اِیں امانت کوُ حفاظت نال رکھ تے جئیں علم کوُ علم آکھنا ہی غلط ہِے اوُں دی بےہودہ بکواس تے مخالفت تے توجہ نہ کر۔ ²¹ ۲۱۔ بعض اِیں دا اقرار کر کے ایمان توں پھِر گئے ہِن۔ تُہاڈے تے فضل تھیندا راہوے۔