¹ ۱۔ ہن اے بھراؤ! میں تُہاکو اوُہو خوشخبری ڈیندا ہاں جیہڑی پہلے ڈے چکا ہاں جیکوں تُساں قبول وی کیتے اَتے جیندے تے قائم وی ہو۔ ² ۲۔ اوُں دے وسیلے تُہاکوں نجات وی ملدی ہِے پر شرط اے ہِے کہ اوہ خوشخبری جیہڑی میں تُہاکوں ڈِتی ہائی یاد رکھیندے ہو ورنہ تُہاڈا ایمان گھن آونا فضول ہائی۔ ³ ۳۔ چنانچہ میں تُہاکوں ساریاں تھوں پہلاں اوُہو گال پہنچا ڈِتی ہِے جیہڑی میکوں ملی ہائی کہ مسیح کتاب مقدس دے مطابق ساڈے گناہواں کیتے مرے۔ ⁴ ۴۔ اَتے دفن تھئے تے تریجھے ڈیں کتاب مقدس دے مطابق زندہ تھی گئے۔ ⁵ ۵۔ اَتے کیفا کوُ تے اوندے بعد اُنہاں باراں کوُ ڈکھائی ڈِتے۔ ⁶ ۶۔ وَل پنج سو تھوں زیادہ بھراواں کوُ ہکو واری ڈکھائی ڈِتے۔ جنہاں وچوں بہوں سارے ہن تائیں موجود ہن تے بعض سو وی گئے۔ ⁷ ۷۔ وَل یعقوب کوُ ڈکھائی ڈِتے۔ وَل ساریاں رسولاں کوُ۔ ⁸ ۸۔ اَتے ساریاں کولوں بعد اِچ میکو جیہڑا گویا ویلے کولوں پہلے پیدا تھی گیا ہاں ڈکھائی ڈِتے۔ ⁹ ۹۔ کیونکہ میں رسولاں وچوں ساریاں کولوں چھوٹا ہاں بلکہ رسول اکھواون دے وی لائق نئیں ایں کیتے کہ میں خدا دی کلیسیا کوُ ستاندا ہامی۔ ¹⁰ ۱۰۔ پر جو کجھ وی ہاں خدا دے فضل دے نال ہاں اَتے اوندا فضل جیہڑا میڈے تے تھئے اوہ فضول نئیں تھیا بلکہ اُنہاں ساریاں کولوں ڈھیر محنت کیتی ہِے اَتے میڈی طرفوں نئیں تھئی بلکہ خدا دے فضل نال جیہڑا میڈے تے ہائی۔ ¹¹ ۱۱۔ پس خواہ میں ہاں یا اوہ ہن اساں ایہو مُنادی کریندے ہاں اَتے ایندے تے ای تُساں ایمان وی گھن آئے وے۔ ¹² ۱۲۔ پس جڈاں مسیح دی اے مُنادی کیتی ویندی اے کہ اوہ مردیاں وچوں زندہ تھی گئے تاں تہاڈے وچوں کجھ بندے کیویں آدھین کہ مردیاں دی قیامت ہِے ای کئے ناں؟ ¹³ ۱۳۔ اگر مردیاں دی قیامت نئیں تا مسیح وی زندہ نئیں تھیا۔ ¹⁴ ۱۴۔ اگر مسیح زندہ نئیں تھیا تاں ساڈی مُنادی دا کوُئی فائدہ نئیں اَتے تُہاڈے ایمان گھن آون دا وی کوُئی فائدہ نئیں۔ ¹⁵ ۱۵۔ بلکہ اساں خدا دے جھوٹے گواہی ڈیون آلے ٹھہرےکیونکہ اساں خدا دے بارے وچ ایہہ گواہی ڈِتی کہ اوُں نے مسیح کوُ زندہ کیتے حالانکہ زندہ کئے نئیں کیتا بالفرض مردے زندہ نئیں تھیندے۔ ¹⁶ ۱۶۔ اَتے اگر مردے زندہ نئیں تھیندے تاں مسیح وی زندہ نئیں تھیا۔ ¹⁷ ۱۷۔ اگر مسیح زندہ نئیں تھیا تاں تہاڈا ایمان کئیں کم دا نئیں تے تُساں ہن تائیں اپنے گناہاں اِچ پھسے ہوئے ہیوے۔ ¹⁸ ۱۸۔ بلکہ جیہڑے مسیح وچ سو گئے ہن اوہ وی ہلاک تھئے۔ ¹⁹ ۱۹۔ اگر اساں صرف ایں زندگی اِچ مسیح اِچ اُمید رکھنیدے ہیں تاں سارے بندیاں کولوں زیادہ بدنصیب ہئیں۔ ²⁰ ۲۰۔ پر مسیح واقع ہی مردیاں وچوں زندہ تھی گئے اَتے جیہڑے سُم گئے ہن اُنہاں وچوں اوہ پہلا پھل تھئے۔ ²¹ ۲۱۔ کیونکہ جڈاں بندے دے پاروں موت آئی ہِے تاں بندے دے ہی پاروں قیامت وی آئی۔ ²² ۲۲۔ اَتے جیویں آدم اِچ سارے مر ویندین اوُویں ای مسیح وچ سارے زندہ کیتے ویسن۔ ²³ ۲۳۔ پر ہر ہک اپنی اپنی واری تے۔ پہلا پھل مسیح ہِے۔ وَل مسیح دے آون تے اوندے بندے۔ ²⁴ ۲۴۔ ایندے بعد آخرت ہوسی۔ اوُں ویلے او ساری حکومت تے سارا اختیار تے قدرت ختم کر کے بادشاہی کوُ خدا یعنی پیوُ دے حوالے کر ڈیسی۔ ²⁵ ۲۵۔ کیونکہ جڈاں تائیں کہ او اپنے سارے دشمناں کوُں اپنے پیراں تھلے نہ کر گھنے اوُں کوُ بادشاہی کرنا ضرور ہِے۔ ²⁶ ۲۶۔ ساراں کولوں پچھلا دشمن جیہڑا ختم کیتا ویسی اوہ موت ہِے۔ ²⁷ ۲۷۔ کیونکہ خدا نے سارا کجھ اوُں دے پیراں دے تھلے کر ڈِتے پر جڈاں او آکھدے کہ سارا کجھ اوندے پیراں تھلے کر ڈِتے تاں ظاہر ہِے کہ جئیں نے سارا کجھ اوُں دے تابع کر ڈِتے اوہ الگ ریہے۔ ²⁸ ۲۸۔ اَتے جڈا سارا کجھ اوُں دے تابع تھی ویسی تاں پُتر آپ اوُں دے تابع تھی ویسی جئیں نے ساریاں شئیاں اوُں دے تابع کر ڈِتین تاں جو ساریاں وچ خدا ہی سارا کجھ ہوئے۔ ²⁹ ۲۹۔ ورنہ جیہڑے بندے مردیاں کیتے بپتسمہ گھندین اوہ کیا کریسن؟ اگر موئے ہوئے زندہ نئیں تھیندے تاں وَل کیوں اُنہاں کیتے بپتسمہ گھندین؟۔ ³⁰ ۳۰۔ اَتے اساں کیوں ہر ویلے خطرے وچ پئے راہوں؟۔ ³¹ ۳۱۔ اے بھراؤ! میکوں اوُں فخر دی قسم جیہڑی ساڈے خداوند یسوع مسیح وچ تہادے تے ہِے ہر ڈیں مردا ہاں۔ ³² ۳۲۔ اگر میں بندیاں دی طرح افسس اِچ وحشی جانوراں نال لڑ پوواں تاں میکوں کیا فائدہ؟ اگر مردے زندہ نہ کیتے ویسن تاں آؤ کھاؤں پیوں کیونکہ کل تاں مر ہی ونجنا ہِے۔ ³³ ۳۳۔ فریب نہ کھاؤ۔ بُری سنگت چنگیاں عادتاں کوُ وگاڑ ڈیندی ہِے۔ ³⁴ ۳۴۔ راستباز تھیون کیتے ہوش وچ آؤ اَتے گناہ نہ کرو کیونکہ بہوں سارے بندے خدا کوُ نئیں جان دے۔ میں تہاکوں شرمسار کرن کیتے اے آدھا ہاں۔ ³⁵ ۳۵۔ ہن کوُئی اے آکھسی کہ مردے کیویں زندہ تھیندین اَتے کیویں جسم دے نال آسن؟۔ ³⁶ ۳۶۔ اے بے عقل! توں جیہڑے بیج دی بوائی کریندے جڈاں تائیں اوہ بیج مرے ناں زندہ نئیں کیتا ویندا۔ ³⁷ ۳۷۔ اَتے جیہڑی شئے دی توں بوائی کیتی ہِے اوہ ایہہ جسم نئیں جیہڑا پیدا تھیون آلا ہِے بلکہ صرف دانہ ہِے۔ خواہ کنک دا خواہ کئیں بئی شئے دا ہووے۔ ³⁸ ۳۸۔ پر خدا نے جیہوں جیا ارادہ کر گِدے اوہُو جیا ہی اوُں کوُ جسم ڈیندا ہِے اَتے ہر ہک بیج کوُ اوندا خاص جسم۔ ³⁹ ۳۹۔ سارے گوشت ہکو جئے گوشت نئیں بلکہ بندیاں دا گوشت بیہا ہِے۔ ڈنگراں دا گوشت بیہا ہِے۔ پکھواں دا گوشت بیہا ہِے۔ مچھیاں دا گوشت بیہا ہِے۔ ⁴⁰ ۴۰۔ آسمانی وی جسم ہن اَتے زمینی وی پر آسمانیاں دا جلال بیہا ہِے زمینیاں دا بیہا۔ ⁴¹ ۴۱۔ آفتاب دا جلال بیہا ہِے۔ مہتاب دا جلال بیہا ہِے۔ ستاریاں دا جلال بیہا ہِے کیونکہ ستارے ستارے دے جلال وچ فرق ہِے۔ ⁴² ۴۲۔ مردیاں دی قیامت وی ایہو جئی ہِے۔ جسم فنا دی حالت اِچ بویا ویندا ہِے اَتے زندگی دی ھالت اِچ جی اُٹھدے۔ ⁴³ ۴۳۔ بے عزتی دی حالت اِچ بویا ویندے اَتے جلال دی حالت اِچ جی اُٹھدے۔ کمزوری دی حالت اِچ بویا ویندے اَتے طاقت دی حالت اِچ جی اُٹھدے۔ ⁴⁴ ۴۴۔نفس آلا جسم بویا ویندے اَتے روحانی جسم زندہ تھی ویندے۔ جڈاں نفس آلا جسم ہِے تاں روحانی جسم وی ہِے۔ ⁴⁵ ۴۵۔ چنانچہ لکھا لاتھے کہ پہلا بندہ یعنی آدم زندہ نفس بنے۔ تے پچھلا آدم حیاتی ڈیون آلی روح بنے۔ ⁴⁶ ۴۶۔ لیکن روحانی پہلے نہ ہائی بلکہ نفسانی ہائی۔ ایندے بعد روحانی تھیا۔ ⁴⁷ ۴۷۔ پہلا بندہ زمین تھوں یعنی مٹی تھوں بنا ہائی۔ ڈوجھا بندہ آسمانی ہِے۔ ⁴⁸ ۴۸۔ جیویں اوہ مٹی تھوں بنا ہائی اوُویں ڈوجھے وی مٹی تھوں بنے ہن اَتے جیویں او آسمانی ہِے اوُویں ڈوجھے وی آسمانی ہن۔ ⁴⁹ ۴۹۔ جیویں اساں ایں مٹی دے دے بنے ہوئے دی صورت تے ہاں اوُں ویں ای اوُں آسمانی دی صورت تے ہوسوں۔ ⁵⁰ ۵۰۔ اے بھراؤ! میڈا اکھاون اے ہِے کہ گوشت تے رَت خدا دی بادشاہی دے وارث نئیں تھے سگدے اَتے جو کجھ ختم تھیون آلا ہِے اوہ ہمیشہ کیتے نہ راہسی۔ ⁵¹ ۵۱۔ ڈیکھو میں تہاکوں بھید دیاں گالہیں آدھا ہاں اساں سارے تاں نہ سُمسُوں پر بدل ضرور ویسوں۔ ⁵² ۵۲۔ اَتے اے ہک دم تھیسی۔ ہک پل وچ۔ پچھلا نرسنگا پھوکیندے ای تھیسی کیونکہ نرسنگا پھونکا ویسی تاں مردے ہمیشہ راہون آلی حالت اِچ زندہ تھی ویسن اَتے اساں بدل ویسوں۔ ⁵³ ۵۳۔ کیوں جو ضرور ہِے کہ اے ختم تھیون آلا جسم نہ ختم تھیون آلے کپڑے پا گھنے اَتے ایہہ مرن آلا جسم ہمیشہ دی حیاتی دے کپڑے پا گھنے۔ ⁵⁴ ۵۴۔ اَتے جڈاں اے ختم تھیون آلا جسم نہ ختم تھیون آلے کپڑے پا گھنسی اَتے اے مرن آلا جسم ہمیشہ دی حیاتی دے کپڑے پا گھنسی تاں اوہ آکھا ہویا پورا تھیسی جو لکھا لاتھے کہ موت فتح دا گِراں بن گئی۔ ⁵⁵ ۵۵۔ اے موت تیڈی فتح کِتھاں گئی؟ اے موت تیڈا ڈنگ کِتھاں گئیے؟۔ ⁵⁶ ۵۶۔ موت دا ڈنگ گناہ ہِے اَتے گناہ دا زور شریعت ہِے۔ ⁵⁷ ۵۷۔ پر خدا دا شکر ہِے جو ساڈے خداوند یسوع مسیح دے وسیلے نال ساکوُ فتح ڈیندے۔ ⁵⁸ ۵۸۔ پس اے میڈے پیارے بھراؤ! مضبوط بنے راہو کوُئی شئے تُہاکوں ڈانواں ڈول نہ کر ڈیوے اَتے ہمیشہ خداوند دی خدمت اِچ ودھدے راہو کیوں جو جان دے ہو کہ تُہاڈی محنت خداوند اِچ فضول نئیں۔