¹ ۱۔ محبت دے طالب تھیوو تے روحانی تعمتاں دی وی آرزو رکھو۔ خاص کر ایندی کہ نبوت کرو۔ ² ۲۔ کیونکہ جیہڑا بیگانہ زبان اِچ گالہیں کریندے اوہ بندیاں نال گالہیں نئیں کریندا بلکہ خدا نالگالہیں کریندے ایں کیتے اوندی کوُئی نئیں سمجھدا حالانکہ اوہ اپنی روح دے نال بھید دیاں گالہیں آدھے۔ ³ ۳۔ پر جیہڑا نبوت کریندا ہِے اوہ بندیاں نال ترقی تے نصیحت تے تسلی دیاں گالہیں آدھا ہِے۔ ⁴ ۴۔ جیہڑا بیگانہ زبان وچ گالہیں کریندا ہِے اوہ اپنی ترقی کریندے اَتے جیہڑا نبوت کریندے اوہ کلیسیا دی ترقی کریندے۔ ⁵ ۵۔ اگرچہ میں ایہہ چاہندا ہاں جو تساں سارے بیگانہ زباناں اِچ گالہیں کرو پر زیادہ تر ایہو چاہندا ہاں کہ نبوت کرو اَتے اگر بیگانہ زباناں بولن آلا کلیسیا دی ترقی کیتے ترجمہ نہ کرے تاں نبوت کرن آلا اوندے کولوں وڈا ہِے۔ ⁶ ۶۔ پس اے بھراؤ! اگر میں تہاڈے کول آ کے بیگانہ زبان اِچ گالہیں کراں اَتے مکاشفہ یا علم یا نبوت یا تعلیم دیاں گالہیں تہاڈے نال نہ کراں تاں تُہاکوں میڈے کولوں کیا فائدہ تھیسی؟ ⁷ ۷۔ ڈیکھو بے جان شئیاں وچوں وی آواز نکلدی ہِے مثلاً بانسری یا بربط اگر اِنہاں دی آوازاں اِچ فرق نہ تھیوے تاں جو کجھ وجایا ویندے اوہ کیویں سنجھان سگدے ہئیں؟۔ ⁸ ۸۔ اَتے اگر تُرہی دی آواز ای صاف نہ ہوئے تاں کون لڑائی کیتے تیاری کریسی؟۔ ⁹ ۹۔ ایویں ای تُساں وی اگر اپنی زبان تھوں صاف صاف گالہیں نہ کرو تاں جو کجھ آکھا ویندے کیویں سمجھا ویسی؟ وَل تُساں ہوا نال گالہیں کرن آلے ٹھہرسو۔ ¹⁰ ۱۰۔ دُنیا اِچ خواہ ڈھیر الگ الگ زباناں ہوون اُنہاں وچوں کوئی وی ایہو جئی کوُئی نہ ہوسی جیہڑی سمجھ نہ آوے۔ ¹¹ ۱۱۔ پس اگر میں کوُئی زبان دے معنی نہ سمجھاں تاں بولن آلے دے نیڑے میں اجنبی ٹھہرساں ¹² ۱۲۔ جڈاں تُساں روحانی پاونا چاہندے او تاں ایہو جئی کوشش کرو کہ تُہاکو نعمتاں ملن تاں مان نہ کرو بلکہ کلیسیا دی ترقی تھیوے۔ ¹³ ۱۳۔ ایں دے پاروں جیہڑا بیگانہ زبان اِچ گالہیں کریندا ہِے اوہ دعا کرے کہ ترجمہ وی کر سگے۔ ¹⁴ ۱۴۔ ایں کیتے کہ میں اگر کوئی بئی غیر زبان اِچ دعا کراں تاں میڈی روح تاں دعا کریندی ہِے پر میڈی عقل بیکار ہِے۔ ¹⁵ ۱۵۔ پس کیا کروں؟ میں روح اِچ وی دعا کریساں تے عقل نال وی دعا کریساں۔ روح نال وی گیت گاساں تے عقل نال وی گاساں۔ ¹⁶ ۱۶۔ ورنہ اگر توُ صرف روح نال ہی حمد کریسیں تاں اوہ بندہ جیہڑا کجھ نئیں جان دا اوہ تیڈی شکرگزاری تے کیویں آمین آکھسی؟ایں کیتے کہ اوہ نئیں جان دا کہ تُوں کیا آدھیں۔ ¹⁷ ۱۷۔ تُو تاں بیشک چنگی طرح شکرگزاری کیتی ہِے پر ڈوجھے دی ترقی نئیں تھئی۔ ¹⁸ ۱۸۔ میں خدا دا شکر کریندا ہاں کہ تُساں ساریاں کولوں زیادہ زباناں بولیندا ہاں۔ ¹⁹ ۱۹۔ لیکن کلیسیا اِچ غیر زبان اِچ ڈاہزار گالہیں آکھن کولوں میکوُ اے زیادہ پسند ہِے جو ڈوجھیاں دی تعلیم کیتے پنج ہی گالہیں عقل نال آکھاں۔ ²⁰ ۲۰۔ اے بھراؤ! تُساں سمجھ اِچ بچے نہ بنو۔ گناہ اِچ تاں بچے راہو پر سمجھ اِچ جوان بنو۔ ²¹ ۲۱۔ توریت اِچ لکھا لاتھے کہ خداوند نے فرمائے میں بیگانہ زبان اَتے بیگانہ بُلہیاں دے نال ایں اُمت نال گالہیں کریساں تاں وی اوہ میڈی ناں سنسن۔ ²² ۲۲۔ پس بیگانہ زباناں ایمانداراں کیتے نئیں بلکہ غیر ایمانداراں کیتے نشان ہن اَتے نبوت بےایماناں کیتے نئیں بلکہ ایماندارں کیتے نشان ہن۔ ²³ ۲۳۔ اگر ساری کلیسیا ہک جاہ تے جمع تھیوے اَتے سارے غیر زباناں لگ پوون تاں ہک بندہ جیہڑا ایں گال تھوں فاقف نئیں یا بے ایمان بندے اندر آ ونجن تاں کیا اوہ تُہاکو چریا نہ آکھسن۔ ²⁴ ۲۴۔ پر اگر سارے نبوت کرن اَتے کوُئی بے ایمان یا جیہڑا ایں بارے نئیں جان دا بندہ اندر آ ونجے تاں سارے اوُں کوُ منا گھنسن اَتے سارے اوُں کوُ پرکھ گھنسن۔ ²⁵ ۲۵۔ اَتے اوُں دے دِل دے بھید کھل ویسن۔ تاں اوہ منہ دے بھار ڈھے کے خدا کُو سجدہ کریسی اَتے اقرار کریسی کہ ایندے وچ کوُئی شک نئیں کہ خدا تُہاڈے وچ ہِے۔ ²⁶ ۲۶۔ پس اے بھراؤ! کیا کروں؟ جیہڑے ویلے تُساں جمع تھیندے ہو تاں ہر ہک دے دل وچ مزمور یا تعلیم یا مکاشفہ یا ڈوجھی زبان دا ترجمہ تھیندا ہِے۔ سارا کجھ روحانی ترقی کیتے ہوونا چاہیدے۔ ²⁷ ۲۷۔ اگر ڈوجھی زبان اِچ گالہیں کرنا ہوئے تاں ڈو ڈو یا زیادہ تھوں زیادہ ترئے ترئے بندے واری واری نال بولن اَتے ہک بندہ ترجمہ کرے۔ ²⁸ ۲۸۔ اَتے اگر کوُئی ترجمہ کرن آلا نہ ہووے تا ڈوجھی زبان بولن آلا کلیسیا اِچ چُپ راہوے اَتے اپنے دِل وچ خدا نال گالہیں کرے۔ ²⁹ ۲۹۔ نبیاں وچوں ڈو یا ترئے بولن اَتے باقی اوندے کلام کوُ پرکھن۔ ³⁰ ۳۰۔ پر اگر ڈوجھے کول بیٹھن آلے تے وحی اُترے تاں پہلا چُپ تھی ونجے۔ ³¹ ۳۱۔ کیوں جو تُساں سارے دے سارے ہک ہک کر کے نبوت کر سگدے ہو تاں جو سارے سکھن اَتے ساریاں کوُ نصیحت تھیوے۔ ³² ۳۲۔ اَتے نبیاں دی روحاں نبیاں دے تابع ہن۔ ³³ ۳۳۔ کیوں جو خدا بے ترتیبی دا نئیں بلکہ امن دا بانی ہِے۔ جیویں پاک بندیاں دی ساری کلیسیاواں وچ ہِے۔ ³⁴ ۳۴۔ عورت کلیسیا دےکٹھ وچ چُپ راہوے۔ کیوں جو اُنہاں کوُں بولن دا حکم کئے نئیں بلکہ تابع راہون جیویں توریت اِچ وی لکھا لاتھے۔ ³⁵ ۳۵۔ اَتے اگر کجھ سکھنا وی چاہندین تاں اپنے گھر وچ اپنے اپنے پئے کولوں پوچھِن کیونکہ عورت دا کلیسیا دے کٹھ وچ بولنا شرم دی گال ہِے۔ ³⁶ ۳۶۔ کیا خدا دا کلام تہاڈے وچوں نکلے؟ یا صرف تُہاڈے تک ہی پُجا ہِے؟ ³⁷ ۳۷۔ اگر کوُئی اپنے آپ کوُ نبی یا روحانی سمجھے تاں اے جان گھنے کہ جیہڑیاں گالہیں میں تُہاکوں لکھدا ہاں اوہ خداوند دے حکم ہن۔ ³⁸ ۳۸۔ اگر کوُئی نہ سمجھے تاں نہ سمجھے۔ ³⁹ ۳۹ پس اے بھراؤ! نبوت کرن دی خواہش رکھو اَتے زباناں بولن توں منع نہ کرو۔ ⁴⁰ ۴۰۔ پر ساریاں گالہیں اخلاق تے ترتیب نال عمل اِچ آون۔