¹ ۱۔ نعومی دے شوہر دا اِک رشتہ درا سی جیدا ناں بو عز سی او ا لیمَلک دے گھرانے توں سی تے بڑی دولت آلا سی۔ ² ۲۔موآبی روت نے نعومی نوں آکھیا: مینوں اجازت دے کہ میں کھیتاں وِچ جاواں تے جس کسے دی وی میرے اوتے کرم دی نظر ہووے اوہدےپچھے پچھے سِٹے چُگن لگ پاواں ۔ نعومی نے اونوں آکھیا :جا میری د ھی۔ ³ ۳۔لہذا او ٹُر گئی تے فصل وڈھن والیاں دے پچھے پچھے سِٹے چُگن لگی ۔تفاق نال او کھیت بوعز دا سی جیہڑا ا لیمَلک دے گھرانے توں سی۔ ⁴ ۴۔اوسے ویلے بوعز بَیت لحم توں آگیا۔ اونے فصل وڈھن والیاں نوں آکھیا: خداوند تہاڈے نال ہووے ! اوناں نے جواب دِتا خداوند تینوں برکت دیوے! ⁵ ۵۔بوعز نے آودے نوکر نوں جیہڑا وڈھن والیاں دا راکھا سی پتا کیتا کہ اے جوان عورت کون اے؟ ⁶ ۶۔نوکر نے جواب دتا کہ اے موآبیؔ عورت اے جیہڑی نعومی دے نال موآب دے ملک توں آ ئی اے۔ ⁷ ۷۔اونے میرے اگے منت کیتی سی کہ میں اونوں وڈھن والیاں دے پچھے بھریاں دے وِچ ڈگے ہوئے سِٹے چُگ کے کٹھے کرن دیواں ۔ لہذا او کھیت وچ گئی تے سویر توں ہون تیک لگا تار کم کر ر ہی اے۔ ہاں کجھ وقفے لئی اونے ڈیرے وچ ضرور آرام کیتا سی۔ ⁸ ۸۔ایدے تے بوعز نے روت نوں آکھیا: میری دھی میری گِل سن ! ہون کسے دوجے کھیت وچ سِٹے چگن لئی نہ جاویں۔ میریاں خدمت کرن والیاں دے نال اتھے ای رویں ۔ ⁹ ۹۔اوس کھیت وچ جیتھے فصل وڈی جا ری اے نظر رکھیں تے کڑیاں دے پچھے پچھے رویں ۔ میں لوکاں نوں دس دِتا اے کہ تینوں کوئی نہ چھیڑے ۔ تے جدوں تینوں تِرے لگے تُو جا کے او ناں پانڈیاں وچوں پی لئییں جیہڑے میرے نوکراں نے بھر کے رکھے نے ۔ ¹⁰ ۱۰۔تد رُوت نے سر جُھکا کے سلام کیتا تے آکھن لگی کہ کی وجہ اے کہ تُو میرے پردیسن اوتے ایسس طراں رحم کرنا پیا ایں ؟ ¹¹ ۱۱۔بوعؔز نے آکھیا: تُو آودے خاوند دی موت توں بعد آودی سس دے نال جہڑا سلوک کیتا او مینوں چنگی طرح پتہ اے تے میں ایہہ وی جاندا واں کے توں کس طراں آودے ماں پیو تے آودے ملک نوں چھڈ کے اوناں لوکاں دے وچ رہن آ ئی جہناں نوں توں پہلاں جاندی وی نیں سیں ۔ ¹² ۱۲۔خداوند تینوں تیرے نیک کماں دا بدلہ د یوے تے خداوند اِسرائیل دا خدا جہندے سائے تھلے تُو سہارا لین لئی آئی ایں تینوں آودیاں رحمتاں دے نال دولت مند کرے۔ ¹³ ۱۳۔اونے آکھیا: میرے آقا ! میرے اوتے تیرے کرم دی نظر روے جد کہ میں تیری خدمت کرن آلیاں وِچوں وی کسے دے برابر ی دے لائق نیں فیر وی تُو لونڈی نال پیار والیاں گلاں کرکےاونوں تسلی دِتی ۔ ¹⁴ ۱۴۔کھان دے ویلے بوعز نے اونوں آکھیا: آ ،تے کجھ روٹی کھا لے تے آودی بُرکی سرکے وچ پیو لے۔ او وڈھن والیاں دے کول بہہ گئی تے بوعز نے اونوں کُجھ بھنیے ہوئے سِٹے دِتے ۔ اونے رِج کے کھادے تے کُجھ بچا لے ۔ ¹⁵ ۱۵۔جیویں ای او سِٹے چگن لئی اوٹھی تے بوعز نے آودے لوکاں نوں حکم دِتا کہ جے او بھریاں وِچوں وی سِٹے چگے تے اونوں نہ روکنا۔ ¹⁶ ۱۶۔سگوں اوہدے لئی کُجھ سِٹے توڑ کے چھڈ دِنا تاں جے او چُک لوے تے اونوں کُجھ وی نہ آکھنا ۔ ¹⁷ ۱۷۔لہذا روت شام تیک کھیت وِچ سِٹے چگدی رہی ۔فیر اونے جہڑا کُجھ چگیاسی اونوں چھٹیا تے اوہدے وچوںقربیاً اِک ایفہ دے برابر جَو ںنکلے۔ ¹⁸ ۱۸۔جہڑا کُجھ اونے کٹھا کیتا سی او اونوں چک کے شہر لے گئی تے آودی سس نوں وکھایا ۔ رُوت نے او بھنے ہوئے سِٹے وی جیہڑا اونے پیٹ بھر کے کھان توں بعد بچا لے سی کڈیا تے اونوں دے دتا۔ ¹⁹ ۱۹۔اوہدی سس نے اوھدے توں پُچھیا: اِج تُو کیتھے سِٹے چُگے تے کیتھے کم کیتا ؟ مبارک اے او بندہ جنیے تیرے اوتے مہربانی کیتی اے ۔ تد رُوت نے آودی سس نوں اوس بندے دے بارے دسیا جہدے کول او نے کم کیتا سی۔ او نے آکھیا کہ جس بندے دے کول میں اِج کم کیتا اے اوھدا نان بوعز اے ۔ ²⁰ ۲۰۔نعومی نے آودی نوہ نوں آکھیا :خداوند او نوں برکت دیوے !فیر اے وی آکھیا کہ اونے جیوندِیاں تے مُردیاں دواں اوتے رحم کیتا اے۔ او بندہ ساڈا نیڑے دا رشتہ دار اے تے ساڈے رشتےداراں تے مُربیاں وِچوں اے ۔ ²¹ ۲۱۔تد موآبی رُوت نے آکھیا :اونے مینوں ایہہ وی آکھیا کہ جدوں تیک اوھدے مزدور اوھدی ساری فصل وڈھ نہ لین میں اوناں دے نال رواں ۔ ²² ۲۲۔نعومی نے آودی نو ہ رُوت نوں آکھیا :میری دھی ایہہ تیرے حق لئی چنگا ہووے گا کہ تُو اودھیاں کڑیاں دے نال جاویں کیوں جے ہو سکدا اے کہ کسے ہور دے کھیت توں تینوں نقصان ہووے۔ِ ²³ ۲۳۔لہذا رُوت جَو اں تے کنک دی ساری فصل وڈھن تیک بوعز دِیاں نوکرانیان دے نال رہ کے سِٹے چگدی رہی تے آودی سس دے نال رہندی سی۔