1
۱۔ایناں توں بعد مینوں اینج لگیا جیویں آسمان توں بتھیرے لوک اُونچی آواز وچ کہہ رہیے ہون، ہیلیلویاہ، نجات، جلال، طاقت صرف ساڈے رب دی ہی اے۔
2
۲۔اوہدے فیصلے سچے تے صحیح نے، کیوں جو اوہنے وڈی کنجری دا انصاف کیتا جِنّے زمین نوں اپنی حرامکاری توں ناپاک کیتا۔ اوہنے اپنے خادماں دے بدلہ اوہدے کولوں لیا جنہاں دا خون اُوہنے آپیں وگایا سی۔
3
۳۔اوہ دوجی دفعہ بولے، ’’ہیلیلویاہ‘‘ اور اوہدے وچوں ہمیشہ تک اُٹھن والا دھواں نکلیا۔
4
۴۔اوہ چّوی بزّرگ تے چاروں زندہ جاندار ڈِگ پئے تے زندہ خدا دی جیڑا تخت تے بیٹھا اے پرشتش شروع کر دِتی، اوہ کہندے سے آمین! ہیلیلویاہ!
5
۵۔فیر تخت وچوں آواز آئی، جیڑی کہندی سی کہ ’’ ساڈے خُدا دی تمجید‘‘ اوہدے سارے خادمو تے اوہدے ڈرن والیو، سارے کمزورو تے طاقتورو۔
6
۶۔فیر میں آواز سنی جیویں بتھیرے لوک بول دے ہون، جیویں بہت سارے پانیاں دا شور، جیویں بہت ساری بجلیاں کڑکدیاں ہویاں تےکہن، ’ہیلیلویاہ‘ کیوں جو خدا ہمیشہ حکومت کرے تے ساریاں تے راج کرے۔
7
۷۔چلو سارے خوش ہویے تے خوشیاں منائیے تے خدا دے ناں نوں جلال دئیے کیوں جو بّرے دے ویاہ مناون دا ویلا آ گیا تے اودھی ووہٹی نے وی اپنی تیاری کر لئی اے۔
8
۸۔اوہنوں نکھرے تے صاف کپڑے پاون دی اجازت مِل گئی اے۔ (صاف کپڑے مقدسین دے راستبازی دے کماں نوں ظاہر کردے نے)۔
9
۹۔فرشتے نے مینوں کیہا، ’’ایہہ لِکھ‘‘ مُبارک نے اوہ جیہڑے برّے دے ویاہ دے موقع تے بلائے گئے نے اوہنے مینوں اے وی آکھیا کہ ایہہ خدا دے سچے بول نے۔
10
۱۰۔میں اوہدی پرشتش کرن لئی اوہدے قدماں وچ ڈگ پیا، پر اوہنے مینوں کیہا، ایس طرح نہ کر، میں تیرے تے تیرے بھراوان ورگا یسوع دی گواہی رکھن والا خادم ہاں۔ رب دی بندگی کرو اُوس گواہی دی بدولت جیڑی کہندی اے پئی یسوع ہی نبوت دی روح اے۔
11
۱۱۔فیر میں آسمان نوں کُھلیا ویکھیا، اوہدے وچ اِک چِٹا گھوڑا نظر آیا۔ اوہدا سوار ایماندار تے سچا سی، اوہ انصاف نال فیصلے تے جنگ کرے گا۔
12
۱۲۔اوہدی اکھیاں اینج نے جیویں بلّدے ہوئے شعلے تے اوہدے سر تے بتھیرے تاج دھرے نے۔ اوہدے اُتے ناں لکھیا ہویا اے جیہڑا اوہدے علاوہ کسے نوں نئیں پتا۔
13
۱۳۔اوہنے خون وچ ڈوبویا ہویا چوغہ پایا اے تے اوہنوں ’’خدا دا کلمہ‘‘ کہندے نے۔
14
۱۴۔آسمانی فوجاں چِٹے گھوڑیاں تے کے کے اوہدے پیچھے آوندیاں نے چِٹے صاف تے نفیس کپڑے پا کے۔
15
۱۵۔اوہدے منہ وچوں تیر دھار تلوار نکلدی اے جدے نال اوہ قوماں نوں مارے گا تے لوہے دے عصا نال حکومت کرے گا۔ اوہ قادرِ مطلق دے غضب نوں اوہدے غُصے دے (دی) چکی (حوض) وچ کچلے گا۔
16
۱۶۔اوہدا ناں وی اے ’’ بادشاہاں دا بادشاہ‘‘، ’’خداونداں دا خدا‘‘ جیہڑا اوہدے چوغے تے اوہدی ران تے لکھیا ہویا اے۔
17
۱۷۔میں سورج وچ کھلّوتا اِک فرشتہ ویکھیا۔ اوہنے اُوچی آواز اِچ اُڈن والے پرندیاں نوں سدیا سارے رب دی ضیافت وچ اکٹھے ہو کے آؤ۔
18
۱۸۔آؤ تے بادشاہاں دا گوشت کھاؤ، سپہ سالاراں دا گوشت کھاؤ، گھوڑیاں دا تے اوہناں دے سواراں دا گوشت کھاؤ، سارے بندیاں دا گوشت کھاؤ، زور آوراں دا گوشت کھاؤ، غلام تے آزاد دونواں دا، ماڑے تے طاقتور دا۔
19
۱۹۔میں حیوان نوں زمین دے بادشاہاں تے اوہناں دی جوجاں نال ویکھیا، اوہ اوتھے اکٹھے ہوئے تاں جو اوہدے نال جیڑا گھوڑے دا سوار اے اور اوہدی فوجاں نال جنگ کرن۔
20
۲۰۔حیوان پھڑیا گیا اور اوہدے نال اوہ جھوٹا نبی وی جیڑا اوہدے ہوندیاہ معجزے وکھاندا سی تے جیڑے حیوان دی شبیہ نوں پوجدے نے اوہدی مہر رکھدے سن دھوکا دیندا سی۔ اوہناں وچوں دو نوں گندھک نال بلدی ہوئی اَگ دی جھیل وچ زندہ سٹیا گیا۔
21
۲۱۔باقی سارے اُوس تلوار نال مارے گئے جیڑی گھوڑے تے سواری کرن والے دے منہ چوں باہر آوندی سی۔ سارے پرندیاں نے اوہناں دا مردہ گوشت کھادا۔