(گیت ۔مزمُور ۔بنی قورح وَلوں ۔میر مُغنی لئی بطرز "ماحَلَت" گاؤن لئی ۔مَسکِل۔ہیمان ؔ وَلوں راحی ؔ وَلوں ) ¹ ۱۔ یا رَب میرے خُدا میں دِن نُوں بُلاؤناں واں۔ تے رات دے ویلے تیرے اَگے چِکناں واں۔ ² ۲۔ میری دُعا نُوں اپنے حضور وچ اپڑن دے ۔ میرے چِکن تے اپنا کَن دھر ۔ ³ ۳۔ کیوں جو میری جان مصیبتاں نال رجھ گئی اے ۔ تے میری حیاتی پاتالدے نیڑے اپڑ گئی اے۔ ⁴ ۴۔ میں غار وچ جان والیاں وچ شُمار کیتا جاناں واں ۔ میں کمزور بندے وانگ ہو گیا واں ۔ ⁵ ۵۔ میرا بستر مردیاں دے وچکار اے۔ اوہناں قاتلاں وانگ جیہڑے قبروچ پئے ہون ۔ تے جنہاں نُوں تُوں فیر یاد نئیں کردا۔ تے جیہڑے تیری پرورش تَوں کٹ گئے نیں ۔ ⁶ ۶۔ تُوں مینوں غار دی تہہ وچ ۔ یعنی ہنیرے دے گہراؤ وچ سُٹ دِتا اے۔ ⁷ ۷۔ تیرا غضب میرے اُتے بھارا اے۔ تے تُوں مینوں اپنیاں ساریاں موجاں نال تنگ کرناں ایں ۔(سلاہ ⁸ ۸۔ میرے جانن والیاں نُوں تُوں میتھوں دُور کر دِتا اے۔ تُوں مینوں اوہناں دے نیڑے بھیڑا بنایا اے۔ میں قیدی آں۔تے نکل نئیں سکدا ۔ ⁹ ۹۔ میریاں اَکھاں دُکھ دے سبب دُھندلا جاندیاں نیں۔ یا رَب میں ہر دِن تیرے اَگے چِکناں واں ۔ تے تیرے وَل اپنےہتھ چُکناںواں ۔ ¹⁰ ۱۰۔ کیہ تُوں مُردیاں لئی معجزے کریں گا ؟ کیہ روحاں اُٹھ کے تیری وڈیائی کرن گِیاں ؟ ¹¹ ۱۱۔ کیہ قبر وچ تیری مہربانی ۔ تے سڑسڑاہٹ وچ تیرے وفاداری دَسی جاوے گی۔ ¹² ۱۲۔ کیہ ہنیرےوچ تیرے معجزے دِسَن گے ۔ تے بھُل جان د ے دیس وچ تیرا نیاں نظر آوے گا ؟ ¹³ ۱۳۔ پر اے خُداوند میں تیری ہی دُہائی دیناواں ۔ تے سَوی دے ویلے میری دُعا تیرے حضُور اپڑی اے ۔ ¹⁴ ۱۴۔ یا رَب تُوں میری جان نُوں کِس سبب تَوں رَد کرناں ایں ؟ تُوں اپنا مُکھ میتھوں کیوں لُکائی رکھنا ں ایں ؟ ¹⁵ ۱۵۔ میں لڑکپن تَوں ای مصیبت داماریا تے موت دے نیڑےآں۔ تے میں تیرے ڈردے مارے بوندل گیا واں ۔ ¹⁶ ۱۶۔ تیرا غضب میرے اُتے آ پیا اے ۔ تے تیریاں دہشتا ں نیں مینوں مار سُٹیا اے۔ ¹⁷ ۱۷۔ اوہ سارا دِن پانی وانگ میرے آسےپاسے نیں ۔ اوہناں ہر پاسیوں مینوں گھیریا اے ۔ ¹⁸ ۱۸۔ تُوں بیلی تے ساتھی میتھوں دُور کر دِتے نیں ۔ ہنیرا ای میرا بیلی اے۔