داؤدوَلوں ¹ ۱۔ رَب میرا چانن تے میری نجات اے مینوں کاہدا ڈر اے رَب میری حیاتی لئی بَنّ اے مینوں کیہدی دہشت اے ² ۲۔ جد شریر جیہڑے میرے ویری تے مُخالف نیں مینوں کھان پیندے نیں تے اوہ ٹھیڈا کھا کے ڈِگ پیندے نیں ³ ۳۔ جے جتھا وی میرے سامنے کھلو جاوے تاں وی میرا دِل نہ ڈرے گا بھانویں میرے خلاف جنگ چھیڑ جاوے تاں ویں میں دِل نہ چھڈاں گا ⁴ ۴۔ میری رَب تَوں اِک ای مِنت تے ایہو فریاد اے پئی میں اپنی حیاتی دے سارے دیہاڑے رَب دے گھر وچ رہواں تاں جو میں رَب دے حُسن دا احساس کر سکاں تے اوہدی ہیکل نوں تکدا رہواں ⁵ ۵۔ کیوں جو مُصیبت دے دیہاڑے اوہ مینوں اپنے تنبو وچ لُکا لَوے گا اوہ اپنے ڈیرے دے پڑدیاں وچ مینوں لُکائی رکھے گا اوہ مینوں چٹان تے کھلارے گا۔ ⁶ ۶۔ لو ہُن مینوں اپنے آلے دوالے دے ویریاں توں اُچا کیتا جا رہیا اے میں اوہدے خیمے وچ خُوشی دے چڑھاوے چڑھاواں گا۔ گاوا ں گا تے میں رَب دی وڈیائی کراں ۔ ⁷ ۷۔ یا رَبا میری اوواج سُن جہدے نال میں پُکارناں واں میرے تے رحم کر تے میری سُن ⁸ ۸۔ میرا دِل تیرے نال گلاں کر داے میرا مُکھ تینوں لبھ دا پھیر دا اے یا رَبا میں تیرے درشن دا ترہایا واں ⁹ ۹۔ میتھوں اپنا مُنہ نہ لُکا اپنے بندے نُوں غُصے وچ دفعہ نہ کر تُوں میر امدد کرن والا ایں مینوں نا چھڈ تے نہ میتھوں پراں ہو یا میرے سچے رَب ۔ ¹⁰ ۱۰۔ بھانویں میرے ماں پیو مینوں چھڈ دین تاں ویں رَب مینوں سنبھالے گا ¹¹ ۱۱۔ یا رَبا مینوں اپنی راہ دَس تے میرے ویریاں دےسببوں مینوں پدھرے راہ تے ٹور ¹² ۱۲۔ مینوں میرے ویریاں دی مرضی تے نہ چھڈیں کیوں جو جھوٹے گواہ تے ظلم شُکن والے میرے خلاف اُٹھ کھلوتے نیں ¹³ ۱۳۔ مینوں پَک اے پئی میں جیوندیاں دے دیس وچ رَب دا فیض ویکھا ں گا ¹⁴ ۱۴۔ رَب دا اُڈیکن ہار رہ تگڑا ہو تیرا دل ہمت والا ہووے۔ رَب دی اُڈیک رکھ۔