¹ ۱۔ اے خدا جہدی میں عبادت کرنا ہاں چُپ نہ رہ۔ ² ۲۔ کیوں جو بے دین تے دھوکے باز دا منہ میرے تے کھُل گیا اے۔اوہناں نے جھوٹی جیبھ تَوں میرے نال گل کیتی ۔ ³ ۳۔ تے حسد دیاں گلاں نال مینوں گھیریا۔تے نا حق میرے نال لڑائی کیتی ۔ ⁴ ۴۔ اوہناں میری محبت دے بدلے میرے تے الزام لگایا ۔پر میں دُعاکر دا رہیا ۔ ⁵ ۵۔ اوہناں مینوں نیکی دا بدی تَوں ۔تے میری محبت دا نفرت تَوں بدلہ دِتا ۔ ⁶ ۶۔ تُوں اوہدے خلاف شریر نُوں گھل ۔تے کوئی مخالف اوہدے سجے ہتھ کھلوتا اے ⁷ ۷۔ جدوں اوہدا نیاں کیتا جائے تے اوہ مُجرم نکلے ۔تے اوہدی فریاد رد کر دِتی جائے۔ ⁸ ۸۔ اوہدے دیہارے گھٹ ہو جان اوہد ا عہدہ کوئی دوجا لے لے۔ ⁹ ۹۔ اوہدے بچے یتیم ہو جان ۔اوہدی بیوی بیوہ بنے۔ ¹⁰ ۱۰۔ اوہدے بچے آوارہ پھرن تے بھیک منگیا کرن ۔اوہ اُجاڑ تھاواں تے کڈھ دِتے جان ۔ ¹¹ ۱۱۔ سُود خور اوہدی ساری گروی رکھن ۔تے اوہدی محنت دا پھل اوپرے لُٹ لین۔ ¹² ۱۲۔ کوئی اوہدے تے رحم نہ کرے ۔تے کوئی اوہدے یتیماں تے ترس کھائے ۔ ¹³ ۱۳۔ اوہدی نسل کری جاوے ۔تے اگلی پیڑھی وچ اوہدا ناں نشان مِٹ جائے ۔ ¹⁴ ۱۴۔ اوہدے پیو دادے دے پاپ خُدا دے حضور یاد رہن ۔اوہدی مان دی بھُل مِٹائی نہ جائے۔ ¹⁵ ۱۵۔ سگوں ایہہ ہر ویلے خداوند دے سامنے رہن ۔اوہ اوہناں دا ذکر دھرتی تَوں برباد کرے۔ ¹⁶ ۱۶۔ کیوں جو اوہنے رحم کرن وچ سُستی ورتی اے ۔سگوں غریب تے کنگال بندہ تے اوہدے ٹُٹے دل نُوں ستایا ۔تاں جو اوہنوں قتل کرے۔ ¹⁷ ۱۷۔ اوہ لعنت چاہندی سی۔سو ایہہ اوہد ے تے آپئے ۔برکت دی اوہنوںچاہت نئیں سی۔سو ایہہ اوہدے تَوں دور سی۔ ¹⁸ ۱۸۔ اوہ کپڑیاں وانگر لعنت نُوں پاوے ۔ایہہ پانی وانگر اوہدیاں آندراں وچ تے تیل وانگر اوہدیاں ہڈیاں وچ وڑے ۔ ¹⁹ ۱۹۔ اے اوہدے لئی ایس طراں جس طراں پوشاک ہووے جیہڑا اوہنوں ڈھکے ۔تے پٹکے وانگر ہووے۔جہدے تے اوہ ہر ویلے کمر کَس رکھے/ ²⁰ ۲۰۔ جیہڑے میرے تے الزام لگاؤندے نیں ۔تے اوہ جیہڑے میرے خلاف بُریائی نال گل کر دے نیں۔اوہناں لئی خداوند وَلوں ایہہ اجر اے ۔ ²¹ ۲۱۔ پَر تُوں اے مالک خداوند اپنے ناں دے لئی میرے وَل ہو ۔کیوں جو تیری رحمت مہربان اے مینوں رہائی دے۔ ²² ۲۲۔ کیوں جو میں غریب تے کنگال آں ۔تے میرا دل میرے اند ر زخمی اے ۔ ²³ ۲۳۔ میں ڈھلدے ہوئے پر چھاویں وانگر غائب ہُنا آں۔تے ٹڈی وانگر اُڈایا جاناں واں۔ ²⁴ ۲۴۔ بھُکیاں رہن دے سببوں میرے گوڈیاں تے بھار نئیں پے رہیا ۔میرا گوشت موٹا پے تَوں خالی رہ گیا اے۔ ²⁵ ۲۵۔ میں اوہناں دے نیڑے شرم دا سبب بنیاںآں۔اوپرے وَل ویکھ سِر ہلاؤندے نیں۔ ²⁶ ۲۶۔ اے خداوند میری مدد کر ۔اپنی رحمت دے مطابق مینوں رہائی دے۔ ²⁷ ۲۷۔ تے اوہ جان لین پئی اے تیرا ای ہتھ اے ۔تے پئی تُوں ای اے خداوند ایہہ کیتا ۔ ²⁸ ۲۸۔ اوہ میرے خلاف اُٹھ کے شرمندہ ہون ۔پر تیرا بندہ خوشی کرے۔ ²⁹ ۲۹۔ جیہڑے میرے تے الزام لگاؤندے نے اوہ رسوائی نال مُلبس ہون ۔تے اپنی شرمندگی نُوں چوغے وانگر پہنن۔ ³⁰ ۳۰۔ تے میں اپنے مونہہ تَوں خداوند دا بے حد شکر کراں گا ۔تے بہتیاں لوکاں دے وچکار اوہدی تعریف کراں گا۔ ³¹ ۳۱۔ کیوں جو اوہ غریب دے سجےّ پاسے کھلوتا اے تاں جو اوہنوں الزام دین والیاں تَوں بچائے ۔