¹ ۱۔ ایس لئی بڑا دھیان رکھو تاں جو تہاڈے وچوں کوئی وی خدادے آرام چہ داخل ہون دے وعدے توں پچھے نہ رہ جاوے۔ ² ۲۔تے اے خوشی دی خبر (دا پیغام) سانوں اوسے طرح سنائی گئی جیویں اوہناں نوں۔ پر ایہہ پیغام ایناں لئی جیڑے اعتقاد (تعبیاداری کرن) ایمان لیان والیا نال اک نہ ہوئے، بے فائدہ ای ریا۔ نوٹ: دوجیاں کاپیا ں چہ لکھیا اے؛ پر ایہہ پیغام اُہناں لئی بے فائدہ ای رہیا جناں نے بے اعتقادی نال سُنیا۔ ³ ۳۔تے اسی جیڑے ایمان لیاے، آرام چہ داخل ہوواں گے۔ جیویں اُہنے کیا اے کے ’’جیویں میں اپنے قہر چہ قسم کھادی ، کہ اے میرے اَرام چہ داخل نہ ہون گے۔‘‘ تے فیر وی ایس جہاں دی نیو رکھدے ویلے اوہدا کم مکمل ہوگیا سی۔ ⁴ ۴۔تے اوہنے کِتے ستویں دن دے بارے وچ وی کہیا اے؛ ’’ تے خدا نے ستویں دن اپنے سارے کمّاں توں فارغ ہو کے آرام کیتا۔‘‘ ⁵ ۵۔تے فیر اوسے حصّے چہ اوہنے اے کہیا کہ اوہ میرے آرام چہ کدی وی داخل نہ ہون گے۔‘‘ ⁶ ۶۔ایس لئی فیر وی تھوڑیاں لئی اوہدے آرام چہ داخل ہونا مخصوص کیتا گیا اے۔ پر بھیرے اسرائیلی جناں نے ایہہ خُوشی دی خبر سُنی داخل نہ ہوسکے کیوں جے اوہناں نے نافرمانی کیتی۔ ⁷ ۷۔خُدا نے ’اج‘ کہہ کے اِک خاص دِن مقرر کیتا، کافی دِناں بعد داؤد دے وسیلے اُہنے کلام کیتا، جیویں پہلاں کہیا سی، ’’اج جے تُسی اوہدی آواز سُندے او تے اپنے دل سخت نہ کرو۔‘‘ ⁸ ۸۔تے جے یشوع نے اوہناں نوں آرام دِتا ہوندا فیر خُدا کِسے دوسرے دن دے بارے وچ نہ کہندا۔ ⁹ ۹۔ایس لئی اِک اَرام دا سبت خُدا دے لوکاں لئی مقرر اے۔ ¹⁰ ۱۰۔تے جیڑا خُدا دے آرام چہ داخل ہوندا اے، اوہ اپنے کمّاں توں وی آرام پاندا اے، اوسے طرح جیویں خُدا نے اپنے کمّاں توں آرام کیتا۔ ¹¹ ۱۱۔ایس لئی اسی وی آرام چہ داخل ہون دا چاہ رکھیے تاں جو (ساڈے چوں) کوئی وی اُس طرح دی نافرمانی نہ کرے جیویں اُنہاں کیتی سی ۔ ¹² ۱۲۔کیوں جے خُدا دا کلام زندہ، موثر تے ہر ایک دو دھاری تلوار توں بوہتا تِکھا اے۔ تے اے روح تے جان تے بند بند (جوڑاں) تے گودے وچوں چیر کے لنگھ جاندا ے۔ تے اے دل دے خیال تے سوچاں نو جان لیندا اے۔ ¹³ ۱۳۔جو کُجھ وی تخلیق کیتا گیا اے اوہ خُدا توں لُکیا نئیں۔ اہدی اکھاں اگے جنوں اسی حساب دینا اے، ساریاں شیواں بے نقاب تے کھُلیاں نیں۔ ¹⁴ ۱۴۔تاں جو ساڈے کول اک عظیم کاہنِ اعظم اے جیڑا آسماناں چوں لنگھ گیا، خُدا دا پُتر یسوع، آؤ اپنے ایمان نون مضبوطی نال پھڑ کے رکھیے۔ ¹⁵ ۱۵۔تے ساڈے کول اوہ کاہنِ اعظم نئیں جیڑا ساڈی کمزوریاں چہ ہمدرد نہ ہوئے۔ پر ساڈے کول اوہ اے جیڑا ہر طرح دی آزمائش وچ ساڈے وانگوں پیا پر فرق ایہ وے کے اوہ بے گناہ سی۔ ¹⁶ ۱۶۔ایس لئی آؤ اسی فضل دے تخت ول بھروسے نال چلیئے، تاں جو ساڈے تے رحم ہووے تے ضرورت دے وقت مدد لئی فضل ہوندا روے۔