1
. تے خداوند نے ابرام نوں آکھیا توں اپنے ملک تے اپنے خنوا دے وچوں نالے اپنے پیو دے کار چوں ٹر تے اوس زمین تے جا جیہڑی میں تینوں وکھاواں گا۔
2
. تے مین تینوں اک وڈی قوم بناواں گا۔ تینوں برکت دواں گا۔ تے تیرا ناں اچا کراں گا۔ تے توں برکت دا سبب ہووئیں گا۔
3
. جیہڑے تینوں برکت دین میں اوہناں نوں برکت دواں گا۔ جیہڑے تیرے تے لعنت کرن میں اوہنا ں تے لعنت کراں گا۔ جگ دے سارے قبیلے تیرے توں برکت پان گے۔
4
. تے فیر ابرام خداوند دے کہن وانگ ٹریا تے لوط اوہدے نال ٹریا ۔ تے جدوں ابرام حاران توں ٹریا اودوں اوہ پچھتر ورہے دا سی۔
5
. تے ابرام اپنی کاروالی سارا تے اپنے بھتیجے لوط تے جو اوس سارے مال نوں جیہڑا اوہناں اکٹھا کیتا سی تے اوہناں بندیاں نوں جیہڑے حاران وچ اوہناں نوں لبھ گئے سن ،نال لے کے کنعان دے ملک ول ٹر پئے۔ تے اوہ کنعان وچ اپڑے۔
6
. تے ابرام اوس ملک وچوں لنگھدا ہویا شکم دے تھاں وچ مورہ دے بلوط تیکر اپڑیا ۔ اوس ویلے ملک وچ کنعانی وسدے سن۔
7
. تد خداوند ابرام دے ظاہر ہویا تے آکھیا پئی اے دھرتی میں تیری نسل نوں دواں گا۔ تے اوہنے اوتھے خداوند دے لئی جیہڑا اوہدے تے ظاہر ہویا سی اک قربانی دی تھاں بنائی۔
8
. تے اوتھوں ٹر کے اوہ اوس پہاڑ ول نوں گیا جیہڑا بیت ایل دے پورب وچ وے تے اوتھے اپناتمبو انج لایا پئی بیت ایل اوہدے پچھم تے عی اوہدے پورب ول نوں سی۔ تے اوتھے وی اوہنے خداوند دے لئی اک قربانگاہ بنائی تے خداوند توں دعا منگی ۔
9
. فیر ابرام ٹردا ہویا داتر ول نوں ودھ گیا ۔
10
. تے اوس ملک وچ کال پئیا۔ تے ابرام مصر ول نوں گیا پئی اوتھے وسے۔ کیوں جے ملک تے کال بھاری سی۔
11
. جدوں اوہ مصر وچ وڑن لئی نیڑے آیا تے اوہنے اپنی کاروالی ساری نوں آکھیا میں جاندا ہاں پئی توں دسن اچ سونہڑی ویں ۔
12
. تے جدوں مصری تینوں ویکھن گے تے تینوں کہن گے پئی اے اوہدی کار والی وے۔ تے مینوں قتل کرن گے پر تینوں جیوندی رکھ لین گے۔
13
. ایس لئی توں کہیں پئی میں اودہی بہن ہاں۔ تاں جے تیری وجہ توں میرے نال چنگا ورتا کیتا جاوے۔ تے میری جان تیرے لئی بچی روے۔
14
. تے فیر جدوں ابرام مصر وچ اپڑیا تے مصریاں اوس عورت نوں ویکھیا پئی اوہ بہتیری سونہڑی اے۔
15
. تے فرعون دے سرداراں نے اوہنوں ویکھیا تے فرعون دے اگے اوہدی وڈیائی کیتی۔ تے اوس عورت نوں فرعون دے کار لے گئے۔
16
. تے اوہنے اوہدے سبب ابرام دے نال چنگا ورتا کیتا۔ ایتھوں تیکر پئی اوہنوں بھیڈ بکریاں تے گاواں تے بیل تے کھوتے تے غلام تے لونڈیاں تے کھوتیاں تے اونٹ ملے۔
17
. پر خداوند نے ابرام دی کار والی ساری دے سبب فرعون تے اوہدے خنوادے نوں سخت آفتاں وچ پایا۔
18
. تد فرعون نے ابرام نوں سد کے اوہنوں آکھیا پئی توں اے میرے نال کی کیتا؟ توں مینوں کیوں نئی دسیا پئی اے تیری کار والی اے؟
19
. کیہڑی گل توں توں اے آکھیا پئی اے تیری بہن وے ؟ ایس کر کے میں اوہنوں اپنی کار والی بناون لئی لئیا۔ایس لئی تیری کار والی اے وے تے ایہنوں لے تے ٹر جا۔
20
. تے فرعون نے ابرام دے لئی اپنے نوکراں نوں حکم کیتا ۔ تے اوہناں نے اوہنوں تے اودہی کار والی نوں تے اودہیاں ساریاں شیواں سمیت اوتھوں ٹور دتا۔