1
. خُدا نےسبھنوں پہلاں اَسمان تے دھرتی نوں پیدا کیتا۔
2
. دھرتی اُکا اُجاڑ تے مُکھوں بغیرسی۔ ڈ نگھیائی اْتے ہنیرا سی تے خُدا دی روح پانیاں اُتے ٹُر دی سی۔
3
. تے خداوند نے آکھیا چانن ہوجا تے چانن ہوگیا۔
4
. تے خدا نے وکھیا پئی چانن چنگا اےتے خداوند نے چانن نوں ہنیرے توں وکھ کیتا۔
5
. تے خدا نے چانن نوں دن آکھیا تے ہنیرے نوں رات تے شام ہوئی سویر ہوئی تے پہلا دیہاڑا ہویا۔
6
. تے خدا نے آکھیاپئی پانیاں دے وچکار امبر ہوئے تاں جے پانی پانی توں وکھ ہوئے۔
7
. تا فیر خدا نے امبر نوں بنایا تے امبر دے ہیٹھلے پانی نوں امبر دے اتلے پانی توں وکھ کیتا تے انج ای ہویا۔
8
. تے خدا نے امبر نوں اسمان آکھیا تے شام ہوئی سو یرہوئی۔سو دوجا دیہاڑا ہویا۔
9
. تے خدا نے آکھیا پئی اسمان دے ہیٹھلا پانی اک تھاں تے اکٹھا ہووے تا ں جے سکیائی دسے تے انج ای ہویا۔
10
. تے خدا نے سکی تھاں نوں دھرتی تے پانیاں دے کٹھ نوں سمندرآکھیا۔ تے خدا نے و کھیا پئی چنگا وے۔
11
. تے خدا نے آکھیا پئی دھرتی کاہ تے بی والے بوٹیاں نوں تے پھل دار درختاں نوں جیہڑے اپنی اپنی جنس وانگ ودھن تےجیہڑے دھرتی تے اپنے اندر بی رکھن اگائے تے انج ای ہویا۔
12
. تد دھرتی نے کاہ تے بوٹیاں نوں جیہڑے اپنی اپنی جنس وانگ بی رکھن تے پھل دار درختاں نوں جناں دے بی اوہناں دی جنس وانگ اوہناں وچ ہون اگایا تے خداوند نے وکھیا پئی چنگا وے۔
13
. تے شام ہوئی تے سویرہوئی۔سو تیجا دیہاڑا ہویا۔
14
. تے خدا نے آ کھیا پئی اسمان تے تارے ہون جیہڑے دن نوں رات توں وکھ کرن۔ تے اوہ نشاناں،زمانے،دناں تے وریاں نوں وکھ کرن لئی ہون۔
15
. تے اوہ اسمان اتے چمکن تے دھرتی اتے لوہ کرن تے انج ای ہویا۔
16
. تے فیر خدا نے دو وڈے تارے بنائے ۔وڈا تارا جیہڑا دن دا حاکم ہوئے تے اک نکا جیہڑا رات تے حکم چلائے تے اوہنےہور تاریاں نوں وی بنایا ۔
17
. تے خدا نے اوہناں نوں اسمان تے رکھیا تاں جے دھرتی اتے چانن کرن۔
18
. تے دن ،رات اتے حکم کرن تے چانن نوں ہنیرے توں وکھ کرن تے خدا وند نے وکھیا چنگا وے۔
19
. تے شام ہو ئی تے سویر ہوئی۔ سو چوتھادیہاڑا ہویا۔
20
. تے خداوند نے آکھیا پئی سمندر جان داراں نال بھر جائے تے پرندےدھرتی دے اتے اسمان وچ اڈن۔
21
. تے خداوند نے وڈے وڈے دریائی جانوراں نوں تے ہر طرح دے جیوندیاں نوں جیہڑے پانی توں بتھیرے بن گئے سن اوہناں دی جنس وانگوں تے ہرطرح دے پرندیاں نوں اوہناں دی جنس دے وانگوں بنایا ۔ تے خدا نے و کھیا چنگا وے۔
22
. تے خداوند نے اوہناں نوں اے کہہ کے برکت دتی پئی پھلو تے ودہوتے ایہناں سمندراں دے پانیاں نوں بھر دوہ تے پرندے دھرتی اتے بتھیرے ودہ جان۔
23
. تے شام ہوئی تے سویر ہوئی۔ سو پنجوا دیہاڑا ہویا۔
24
. تے خدانے آ کھیا پئی دھرتی جان داراں نوں اوہناں دی جنس دے وانگوں ،چوپائے تے رہڑن والے جان داراں نوں تے جنگلی جانوراں نوں اوہناں دی جنس وانگوں پیدا کرے تے انج ای ہویا۔
25
. تے خدا نے جنگلی جانوراں ،چوپایاں تے رہڑن والے جانداراں نوں اوہناں دی جنس وانگوں بنایا تے خدا نے وکھیا چنگا وے۔
26
. فیر خدا نے آکھیا پئی اسی انسان نوں اپنی شکل تے اپنے ورگے بنائیے ۔تے اوہ سمندر دیاں مچھیاں تے اسمان دے پرندیاں تے چوپایاں تے دھرتی دے سارے جانداراں تے رہڑن والیاں اتے اختیاررکھے۔
27
. تے خدا نے انسان نوں اپنے ورگا بنایا۔ اپنی صورت وانگر بنایا ۔ اوہنوں نر تے مادہ بنایا۔
28
. تے خداوند نے اوہناں نوں برکت دتی تے آکھیا پئی پھلو ،ودھو تے دھرتی نوں آباد کرو تے سمندر دیاں مچھیاں تے ہوا دے پرندیاں تے سارے جانوراں اتے جیہڑے دھرتی تے ٹر دے نے اختیار رکھو۔
29
. تے خدا نے آکھیا پئی و یکھو میں ساری دھرتی ہر بی والے ساگ پت تے سارے درخت جدے وچ اوہدا بی والاپھل ہوئے تہانوں دینا ہاں۔اے تہاڈے کھان لئی نیں۔
30
. تے دھرتی دے سارے جانوراں دے لئی تے ہوا دے سارے پرندیاں لئی تے اوہناں ساریاں لئی جیہڑے دھرتی اتے رہڑ دے نےجناں وچ زندگی دا دم وے ساریاں جڑی بوٹیاں کھان لئی دینا ہاں تے انج ای ہویا۔
31
. تے خدا نے ہر شے تے جیہڑی اوہنے بنائی سی نظر کیتی تے ویکھیا بتھرا چنگا وے تے شام ہوئی تے سویر ہوئی۔ تےچھینواں دیہاڑا ہویا۔