¹ ۱۔ ساڈی اسیری دے پنجیویں سال دے شروع چ ، پہلے مہینہ دے دسویں دن ، جدوں شہر دی گرفتاری چودھواں سال سی۔ اوسے دن خداوند دا ہتھ میرے تے سی تے اوہ مینوں اوتھے لے گیا۔ ² ۲۔ خدا دیاں رویاوں چ اوہ مینوں اسرائیل دے دیس چ لے آیا ۔ تے اک اچے پہاڑ تے کھلا ردتا۔ جہدے جنوب ول اک شہر جاپدا سی۔ ³ ۳۔ اوہ مینوں اوتھے لے گیا تے ویکھومیں اک بندہ ویکھیا جہدا روپ پتل ورگا سی تے اوہ سن دی رسی تے ناپن والا کانا لے کے پھاٹک وچ کھلوتا سی۔ ⁴ ۴۔ تے اوس بندے مینوں آکھیا، اے آدمی دے پتر اپنیاں اکھاں نال ویکھ تے اپنے کناں نال سن تے جو کچھ میں تینوں وکھاواں اوس سارے تے دل لا۔ کیونجو توں ایس سارے نوں ویکھن لئی لیاندا گیا ایں۔ تے جو کچھ توں ویکھنا ایں جا کے اسرائیل دے گھرانے نوں دس۔ ⁵ ۵۔ تے ویکھو ہیکل دے حاطے دے چار چوفیرے اک کند سی۔ تےاوس بندے دے ہتھ وچ ناپن والا اک کانا سی۔ جیہڑا چھ ہتھ لما، تے اک ہتھ تے چار انگلاں وڈاسی۔ سو اوس نے اوس گھر دی دیوار من لئی ۔ اوہ اک کانا چوڑی تے اک کانا اچی سی۔ ⁶ ۶۔ تد اوہ مشرقی پھاتک ول آیا تے اوہدی پوڑی تے چڑھ گیا تے دروازے دی ڈیوڑی نوں ناپیا جہیڑی اک کانا چوڑی سی۔ تے دوجےپھاٹک دی ڈیوڑی اک کانا سی۔ ⁷ ۷۔ تے ہر اک کوٹھڑی اک کانا لمی تے اک کانا چوڑی سی۔ تے کوٹھڑیاں دے وچکار پنج پنج ہتھاں دی وتھ سی۔ تے پھاٹک دی ڈیوڑی دے اندر وار پھاٹک دا دروازہ اک کانا سی۔ ⁸ ۸۔ اوہنے پھاٹک دی ڈیوڑی گھر ولوں اک کانا ناپ لئی۔ ⁹ ۹۔ تد اوہنے پھاٹک دی ڈیوڑی اٹھ ہتھ ناپ لئی، تے اوہدے تھم دو ہتھ سن۔ تے اوس پھاٹک دی ڈیوڑی گھر ول سی۔ ¹⁰ ۱۰۔ تے مشرق ول دے پھا ٹک دیاں کوٹھڑیاں تین ایدھر تے تین اودھر سن۔ ایہہ اکو ناپ دیا ں سن تے ایدھر تے اودھر دے تھم اکو جئے سن۔ ¹¹ ۱۱۔ تے ایہدے پھاٹک دا دروازہ دس ہتھ چوڑا تے تیرہ ہتھ لما سی۔ ¹² ۱۲۔ تے کوٹھریاں دے اگے دا تھاں اک ایدھر تے اک ہتھ اودھر سی۔ تے کوٹھڑیاں چھ ہتھ اہدھر تے چھ ہتھ اودھر سن۔ ¹³ ۱۳۔ تد اوہنے پھاٹک دی اک کوٹھڑی دی چھت توں دوسری دی چھت تک پنجی ہتھ ناپیا۔ دروازے دے سامنے دروازہ سی۔ ¹⁴ ۱۴۔ تے اوہنے تھم سٹھ ہتھ ناپے۔ تے ویڑھےدے تھم دروازے دے چار چوفیرے سن۔ ¹⁵ ۱۵۔ تے لنگن والے پھا ٹک دے سامنے توں لے کے اندر والے پھاٹک دی ڈیوڑ ی دے سامنے تک پنجا ہتھ وتھ سی۔ ¹⁶ ۱۶۔ تے پھاٹک دے اندر کوٹھریاں چ تے اوہناں دے تھماں دے چار چوفیرے باریاں سن۔تے ڈیوڑی دے اندر وی چار چوفیرے باریاں سن۔ تے تھماں تے کھجور دیاں تصویراں سن۔ ¹⁷ ۱۷۔ تے اوہ مینوں باہرلے ویڑے چ لے گیا۔ تے ویکھو کوٹھڑیاں سن تے چارے پاسےوہیڑے چہ فرش لگا ہویا سی۔ تے اوس فرش تے کوٹھڑیاں سن۔ ¹⁸ ۱۸۔ تے اوہ فرش جہیڑا تھلے فرش سی پھاٹکاں دے نال نال اکوجیہا لگا ہویا سی۔ ¹⁹ ۱۹۔ تد اوس نے اوہدی چوڑائی نوں تھلے دے پھاٹک دے سامنے اندر دے ویڑے دے اگے مشرق تے شمال دے پاسے باہر باہر سو ہتھ ناپیا۔ ²⁰ ۲۰۔ پھیر اوہنے باہر آلے پھاٹک جہدا منہ شمال ول سی اوہدی لمبائی تے چوڑائی ناپی۔ ²¹ ۲۱۔ تے اوہدیاں کوٹھڑیاں تن ایس پاسے تے تن اوس پاسے سن ۔ تے اوہدے تھم تے اوہدیاں ڈیوڑیاں پہلے پھاٹک دے ناپ دے برابر سن۔ اوہدی لمبائی پنجا ہتھ تے چوڑائی پنجی ہتھ سی۔ ²² ۲۲۔ تے اوہدیاں باریاں تے اوہدیاں ڈیوڑیاں تے کھجور دے درخت مشرقی پھاٹک دے ناپ دے برابر سن۔ تے اُتے جان لئی ست پوڈے سن تے اوہدی ڈیوڑی اندر وار سی۔ ²³ ۲۳۔ تے اندر دے ویڑے دا پھاٹک شمال ولے تے مشرق دے پاسے والے پھاٹکاں دے سامنے سی۔ تے اوہنے پھاٹک توں پھاٹک سو ہتھ ناپیا۔ ²⁴ ۲۴۔ تے اوہ مینوں جنوب دی راہ تے لے گیا تے کیہ ویہناں واں پئی جنوب ول اک پھاٹک اے۔ تے اوہنے اوہدے تھماں نوں تے اوہدی ڈیوڑی نوں اوہدے ناپاں دے حساب نال ناپیا۔ ²⁵ ۲۵۔ تے اوہدیاں باریاں تے اوہدیاں ڈیوڑیاں دے چار چوفیرے اینج دیاں ای باریاں سن۔ تے اوہدی لمبائی پنجا ہ ہتھ تے اوہدی چاڑائی پنجی ہتھ سی۔ ²⁶ ۲۶۔ تے اوہدے اُتے جان لئی ست پوڈے سن۔ تے اوہدیاں ڈیوڑیاں اندر لے پاسے سن۔ تے اوہدے تھماں تے کھجور دے رُکھاں دیاں تصویراں سن۔ اک ایس پاسے تے اک اوس پاسے۔ ²⁷ ۲۷۔ تے اندرونی ویڑے چہ جنوب والے پاسے اک پھاٹک سی۔ تے اوہنے پھاٹک توں پھاٹک تک سو ہتھ ناپیا۔ ²⁸ ۲۸۔تے اوہ مینوں جنوبی پھاٹک ولوں اندرونی ویڑے دے ول لے آیا۔ تے اوہناں پیمائیشاں نال اوہنے جنوبی پھاٹک نوں ناپیا۔ ²⁹ ۲۹۔ تے اوہدیاں ڈیوڑیاں ، تے اوہدے تھم تے اوہدیاں پیمایشاں اوہناں پیمایشاں دے حساب نال سن۔ تے اوہدے وچ باریاں سن ۔ لمبائی پنجا ہتھ تے چوڑائی پنجی ہتھ سی۔ ³⁰ ۳۰۔ تے ڈیوڑی چار چوفیریوں پنجی ہتھ لمی تے پنج ہتھ چوڑی سی۔ ³¹ ۳۱۔ تے اوہدی ڈیوڑی باہردے ویڑے ول سی تے اوہدے تھماں تے کھجور دیاں تصویراں سن تے اُتے جان لئی اٹھ پوڈے سن۔ ³² ۳۲۔ تے اوہ مینوں مشرقی راہ والے پاسے اند والے ویڑے چہ لے آیا۔تے پھاٹک نوں اوسے پیمایش دے حساب نال ناپیا۔ ³³ ۳۳۔ تے اوہدیاں کوٹھریاں تے اوہدے تھماں تے اوہدی ڈیوڑی نوں اوہناں پیمایشاں دے حساب نال پایا۔تے اوہدے چہ تے اوہدی ڈیوڑیاں چہ چار چوفیرے باریاں سن: اوہدی لمبائی پنجاہ ہتھ تے چوڑائی پنجی ہتھ سی۔ ³⁴ ۳۴۔ تے اوہدیاں ڈیوڑیاں باہرلے ویڑے دے سامنے سن تے اوہدے تھماں تے ایس پاسے تے اوس پاسے کھجور دے رُکھاں دیاں تصویراں سن۔ تے اُتے جان لئی اٹھ پوڈے سن۔ ³⁵ ۳۵۔ تے مینوں شمالی پھاٹک ول لے گیا۔ تے اوہناں ای پیمایشاں دے حساب نال ناپیا۔ ³⁶ ۳۶۔ اوہدیاں کوٹھریاں تے اوہدے تھماں تے اوہدی ڈیوڑی نوں ایہناں ای میچیاں دے حساب نال ویکھیا: تے اوہدی لمبائی پنجا ہ ہتھ تے چوڑائی پنجی ہتھ سی۔ ³⁷ ۳۷۔ تے اوہدے تھم باہر دے ویڑے ول سن۔ تے اوہدے تھماں اتے ایس پاسے تے اوس پاسے کھجور دے رکھاں دیاں تصویراں سن۔ تے اتے جان لئی اٹھ پوڈے سن۔ ³⁸ ۳۸۔ تے پھاٹکاں دے تھماں دے کول دروازہ دار کوٹھری سی جتھے سوختنی قربانیاں دھوندے سن۔ ³⁹ ۳۹۔ تے پھاٹک دی ڈیوڑی چہ دو میزاں ایس پاسے تے دو اوس پاسے سن۔ تانجو سوختنی قربانی تے خطا دی قربانی تے جرم دی قربانی ذبح کیتی جاوئے۔ ⁴⁰ ۴۰۔ تے باہر دے ولے شمالی پھاٹک دے اندلے پاسے دو میزاں سن۔پھاٹک دی ڈیوڑی دے دوجے پاسے دو میزاں۔ ⁴¹ ۴۱۔ پھاٹک دے کول چار میزاں ایس پاسے تے چار اوس پاسے سن۔ اٹھ میزاں جہناں تے ذبح کیتا جاندا سی۔ ⁴² ۴۲۔ تے سوختنی قربانی دے لئی تراشے ہوئے پتھراں دیاں چار میزاں سن جہیڑیاں ڈیڈھ ہتھ لمیاں تے ڈیڈھ ہتھ چوڑیاں تے اک ہتھ اچیاں سن۔ جہناں تے اوہ ساختنی قربانی دے ذبیحے نوں ذبح کرن لئی ہتھیار رکھدے سن۔ ⁴³ ۴۳۔ تے اوہدے چار چوفیرے چار انگل لمے کنڈے لگے ہوئے سن تے قربانی دا گوشت میزاں تے سی۔ ⁴⁴ ۴۴۔ تے اوہ مینوں اندرونی صحن چ لے آیا تے کیہ ویہناں ہاں پئی اوتھے گان والیاں دیاں کوٹھڑیاں سن ۔ اک شمال دے پھاٹک ول جہدا منہ جنوب ول سی۔ تے دوسرا جنوبی پھاٹک ول سی جہدا منہ شمال ول سی۔ ⁴⁵ ۴۵۔ تے اوہنے مینوں کہیا پئی اے کوٹھری جہدا منہ جنوب ول اے اوہناں کاہناں لئی ا ے جہیڑے مسکن دی حفاظت کردے نیں۔ ⁴⁶ ۴۶۔ تے اوہ کمرا جہدا منہ شمال ول اے، اوہناں کاہناں لئی اے جہیڑے مذبحے دی حفاظت لئی حاضر نیں ۔ ایہہ بنی صدوق نیں جہڑے بنی لاوی چوں خداوند دے حضور اوندے نیں تاں اوہدی خدمت کرن۔ ⁴⁷ ۴۷۔ تے اوہنے وہڑے نوں سو ہتھ لما تے سو ہتھ چوڑا مربع ناپیا تے مذبح مسکن دے سامنے سی۔ ⁴⁸ ۴۸۔ فیر اوہ مینوں مسکن دی ڈیوڑی چہ لے آیا تے ڈیوڑی نوں ناپیا۔ پنج ہتھ ایدھر تے پنج ہتھ اودھر۔ تے پھاتک دی چوڑائی تن ہتھ ایدھر تے تن ہتھ اودھر سی۔ ⁴⁹ ۴۹۔ ڈیوڑی دی لمبائی وی(۲۰) ہتھ تے چوڑائی یاراں ہتھ سی ،تے پوڑی دے پوڈیاں کول جتھوں اوہ اُتے جاندے سن تے تھماں دے کول پیل پائے سن۔ اک ایس پاسے تے اک اوس پاسے۔