1
.تد خُداوند نے مُوسیٰؔ نُوں آکھیا پئی "ہُن تُوں ویکھیں گا پئی مَیں فِرعونؔ نال کیِہ کرنا۔ تد اوہ ڈاڈے ہتھ دے سببوں اوہناں نُوں جان دیوے گا اَتے ڈاڈے ہتھ دے سببوں ہی اوہناں نُوں اپنے دیسوں کَڈھ دیوے گا۔"
2
. فیر ربّ نے مُوسیٰؔ نُوں آکھیا، "مَیں خُداوند آں۔
3
.اَتے مَیں ابرہامؔ اَتے اِضحاقؔ اَتے یعقُوبؔ نُوں خُدائے قادر دے طور تے وکھالی دِتا پر اپنے یہواوہؔ ناں توں اوہناں تے ظاہر نیئں ہویا۔
4
.اَتے مَیں اوہناں نال اپنا عہد وی بَنھیا اے پئی کنعانؔ دا دیس جیہڑا اوہناں دے پَندھ دا دیس سی اَتے جِہدے وِچ اوہ پردیسی سَن، دیاں گا۔
5
. اَتے مَیں اِسرائیلیاں جِنہاں نُوں مِصریاںؔ نیں غُلامی وِچ رکھیا ہویا اے دا ورلاپ وی سُن کے اپنے بَنھے ہوئے عہد نُوں یاد کِیتا اے۔
6
. سو تُوں بنی اِسرائیلؔ نُوں آکھ پئی ’ مَیں خُداوند ہاں اَتے مَیں تُہانوں مِصریاںؔ دی غُلامی توں کڈھ لیاواں گا۔ اَتے مَیں تُہانوں اوہناں دی غلامی توں چُھڑاواں گا اَتے مَیں اپنا ہتھ ودھا کے اَتے اوہناں نُوں ڈاڈِیاں ڈاڈِیاں سزائِیں دے کے تُہانوں رہیائی دیواں گا۔
7
. اَتے مَیں تُہانوں لَے لوا گا پئی میری قوم بن جاوواَتے مَیں تہاڈا ربّ ہوواں گا اَتے تُہانوں پتا لگ جاوے گا پئی مَیں خُداوند تُہاڈا ربّ ہاں جیہڑا تُہانوں مِصریِاںؔ دے بھاراں ہیٹھوں کڈھ لواں گا۔
8
. اَتے جیہڑا دیس مَیں ابرہامؔ ،اِضحاقؔ اَتے یعقُوبؔ نُوں دین دی سونہہ چُکی سی تُہانوں اوہدے وِچ اَپڑا کےاوہنوں تہاڈی مِیراث کر دیاں گا۔مَیں خُداوند ہاں۔‘"
9
. اَتے مُوسیٰؔ نے بنی اِسرائیلؔ نُوں ایہہ گلاں دَس دِتیاں پَر اوہناں نیں مَن دی کُڑھن اَتے غُلامی دی ڈاڈھ دے سببوں مُوسیٰؔ دی گل نہ سُنی۔
10
. فیر خُداوند نے مُوسیٰؔ نُوں آکھیا پئی،
11
. "جا اَتے مِصرؔ دے بادشاہ فِرعونؔ نُوں آکھ پئی بنی اِسرائیلؔ نُوں اپنے دیس وِچوں جان دے۔"
12
. مُوسیٰؔ نے خُداوند نُوں آکھیا پئی "ویکھ بنی اِسرائیلؔ نے تے میری گَل گَوُلی نئیں۔ سو مَیں جِہدے بُل نا مختون نیں اوہدی گَل فِرعونؔ کیِہ کر سُنے گا؟"
13
. تد خُداوند نے مُوسیٰؔ اَتے ہارُونؔ نُوں بنی اِسرائیلؔ اَتے مِصرؔ دے بادشاہ فِرعونؔ دے حق وِچ ایس مضمُون دا حُکم دِتا پئی اوہ بنی اِسرائیلؔ نُوں مِصرؔ دے دیس وِچوں کَڈھ لَیجان۔
14
. اوہناں دے جَدی ٹبراں دے سردار ایہہ سَن، رُوبِنؔ جیہڑا اِسرائیلؔ دا پہلوٹھا سی۔ اوہدے پُتر حنُوکؔ اَتے فلُّوؔ اَتے حسرونؔ اَتے کَرمیؔ سَن۔ ایہہ رُوبِنؔ دے ٹبر سَن۔
15
. بنی شمعوَنؔ ایہہ سَن۔ یموئیلؔ اَتے یمینؔ اَتے اُہدؔ اَتے یکینؔ اَتے صُحرؔ اَتے ساوُلؔ جیہڑا اِک کنعاننؔ توں جَمیاسی۔ ایہہ شمعونؔ دے ٹبر سَن ۔
16
. اَتے بنی لاویؔ جِنہاں توں اوہناں دی پیڑھی ٹُری اوہناں دے ناں ایہہ نیں۔ جیرسوُنؔ اَتے قہاتؔ اَتے مراریؔ۔ اَتے لاویؔ دی حیاتی اِک سو سینتی ورّھے ہوئی۔
17
. بنی جیرسونؔ لِبنیؔ اَتے سمِعیؔ سَن۔ ایہناں توں ہی ایہناں دے ٹبر ٹُرے۔
18
. اَتے بنی قہاتؔ عَمرامؔ اَتے اِضہارؔ اَتے حبرونؔ اَتے عُزِئیلؔ سَن اَتے قہاتؔ دی حیاتی اِک سو تینتی ورّھے ہوئی۔
19
. اَتے بنی مراریؔ مَحلیؔ اَتے موشیؔ سَن۔ لاوِیاں دے ٹَبر جِنہاں توں اوہناں دی پیڑی ٹُری ایہو ہی سَن۔
20
. اَتے عَمرامؔ نے اپنے پئو دی بہن یوکبدؔ ویاہیئی۔ اوس زنانی توں مُوسیٰؔ اَتے ہارُون جّمے اَتے عَمرامؔ دی حیاتی اِک سو سنیتی ورّھے ہوئی۔
21
. بنی اِضہارؔ قورَحؔ اَتے نفجؔ اَتے زِکریؔ سَن۔
22
. اَتے بنی عُزِئیلؔ میسائیلؔ اَتے الصفنؔ اَتے ستریؔ سن۔
23
. اَتے ہارُونؔ نے نحسونؔ دی بہن عمیندابؔ دی دِھی الیِسبَعؔ وَیاہیئی۔ اوہدے توں ندبؔ تے اَبیِہُوؔ اَتے الیعزرؔ اَتے اِتمرؔ جَمے۔
24
. اَتے بنی قورحؔ اَسّیِرؔ اَتے القنہؔ اَتے اَبیاسفؔ سَن اَتے ایہہ قورِحیاںؔ دے ٹبر سَن۔
25
. اَتے ہارُونؔ دے پُتر الیعزرؔ نے فوطئیلؔ دیِاں دِھیاں وِچوں اِک وَیاہ لئی۔ اوہدے توں فینحاسؔ جَمیا۔ لاوِیاںؔ دے پئو دادے دے ٹبراں دے سردار جِنہاں توں اوہناں دے ٹبر ٹُرے ایہو سَن۔
26
. ایہہ اوہو ہارُون اَتے مُوسیٰ نیں جِنہاں نُوں خُداوند نے آکھیا پئی "بنی اِسرائیلؔ نُوں اوہناں دے جتھیاں دے حِساب نال مِصروںؔ کڈھ لَیجاو۔"
27
. ایہہ اوہ نیں جِنہاں نیں مِصرؔ دے بادشاہ فِرعونؔ نُوں آکھیا پئی اَسیں بنی اِسرائیلؔ نُوں مِصروںؔ کڈھ لَجیاواں گے۔ ایہہ اوہوہی مُوسیٰؔ اَتے ہارُونؔ نیں۔
28
.جَد خُداوند نے مِصرؔ دے دیس وِچ مُوسیٰؔ نال گَلاں کِیتیاں اَتے اینج ہویا۔
29
. پئی خُداوند نے مُوسیٰؔ نوں آکھیا "مَیں خُداوند ہاں اَتے جو کُجھ مَیں تَینوں آکھاں تُوں مِصرؔ دے بادشاہ فِرعونؔ نُوں آکھیں۔"
30
. مُوسیٰؔ نے خُداوند نُوں آکھیا "ویکھ مَیں گَل بات کَرن وِچ بُہت چنگا نئیں آں، سو فِرعونؔ کِیہ کر میری سُنے گا؟"