¹ ۱۔ فارس دا بادشاہ اخسویرس ( جیندی بادشاھت وِچ ہندوستان توں کوش تیک دے اِک سو ستا ئی صوبے شامل سن ² ۲۔ جِدوں قصِر سُوسن وِچ شاہی تخت اوتے بیٹھا ³ ۳۔ تے آودی بادشاھت دے تیجے ورے اونے اک بوہت دڈا خوشی دا جشن منایا جہندے وِچ مادی توں لے کے فارِس تیک دے سارےاختیار رکھن آلے ، حُکماں ، اُمرا تے امیر ذادے صدے گئے ۔ ⁴ ۴۔ ایسس جشن دے موقعے تے بادشاہ نے پورے اک سو اِسی دن آودی بوہت ساری دولت تے شان وشوکت نوں وکھایا ۔ ⁵ ۵۔ ایسس جشن توں بعد بادشاہ نے آودے محل دے چھوٹے دڈے سارے نوکراں ، حاکماں تے سرداراں لئی اک خاص دعوت دا انتظام کیتا تے اے جشن قصر ِشاہی دے باغ دے نال لگویں وہڑے وچ سَِت دن جاری ریا ۔ ⁶ ۶۔ سجاون لئی ہرے ، چٹے تے آسمانی رنگ دے پردے کتانی تے آرغوانی رنگ د یاں ڈوریاں نال چاندی دے حلقاں وچ پرو کے سنگ ِمرمر دے سےستوناں نال لٹکائے گئے سن تے لال تے چٹے تے کھٹے تے کالےسنگ مرمر دے فرش اوتے سونے تے چاندی دے تخت رکھے سن ۔ ⁷ ۷۔ شراب بوہت ساری موجود سی تے و کھری شکل دے سونے دِے پیا لیاں وچ بھر کے پیش کیتی جا رہی سی کیو ں جے بادشاہ بوہت خوش سی تے پرونیاں دی سیوا وِچ کوئی کمی نیں چھڈناں چاھندا سی ۔ ⁸ ۸۔ بادشاہ نے آودے عہدہ داراں نوں دِس رکھیا سی کہ کسے نوں زبردستی شراب پین تے مجبور نہ کیتا جاوے پر طریقے نال ہر کوئی آودی پسند دے مطابق جیس قدر چاوے پی لوے۔ ⁹ ۹۔ اوس ویلے ملکہ وَشتی نے وی اخسویرس دے شاہی محل وچ عورتاں دی دعوت دا نتظام کیتا ۔ ¹⁰ ۱۰۔ جشن دے آخری دن جدوں بادشاہ نشے وچ سی تے اونے آودی خدمت وچ رہن والے ستاں خواجہ سراواں، مہوبان ، بزتا خربُوماہ ، بگتا ابگتا ، زتار تے کرکس نوں حکم دتا کہ او ۔ ¹¹ ۱۱۔ ملکہ وَشتی نوں چنگی طرح بنا سنوار کے تے شاہی تاج پوا کے شاہی محل وچ پیش کیتا جاوے تا ں جے سارے دربار آلے اوہدے بے پناہ حسن نوں ویکھ سکن ۔ ¹² ۱۲۔ پر جدوں بادشاہ دا حکم ملکہ وَشتی نوں دِتا گیا تے اونے دربار وچ آن تون صاف منع کر دِتا ۔جدوں بادشاہ نوں ایسس گل دی خبر دِتی گئی تے او بوہت ای غصے وچ آگیا ۔ ¹³ ۱۳۔ بادشاہ دا اصول سی کے انصاف کرن دے معاملے وچ آودے مشیراں کولوں صلاح لیندا سی کیو ں جے او نہ صرف اہناں معاملایاں توں بلکہ فارس دے سارے حالات تے ماحول توں چنگی طراں واقف سن۔ ¹⁴ ۱۴۔ فارس تے مادی دے اے سِت امیر کارشینا،ستار ،ادماتا ،ترسیس،مَرس،مرسِنا تے تے معوکان شاہی دربار ن نال جُڑے سن تے بادشاہ دے مقرر کیتے ہوئے سن تے ایہہ بادشاہ وِلو ں دڈے رُتبیاں اوتے لگے سن ۔ ¹⁵ ۱۵۔ جدوں اوناں نوں پُچھیا گیا کہ ایویں دے موقع تے کی کرنا چائیدا اے تے قانون دے مطابق ملکہ دی ایسس حکم نوں نہ منن دی مناسب سزا کی ہو سکدی اے کیو ں جے جدوں خواجہ سراواں دی زبانی اونوں دربار وِچ آن دا حکم دِتا گیا تے اونے حکم نیں منیا ۔ ¹⁶ ۱۶۔ معوکان نے بادشاہ تے امرا دے حضور منت کیتی کہ ملکہ وَشتی نے نہ صرف بادشاہ دی بلکہ دربار دے سارے امرا تے وڈی بادشاہت دے ہر بندے دی بے عزتی کیتی اے۔ ¹⁷ ۱۷۔ کیوں جے ملکہ وَشتی دی ایسس حرکت نوں ونھدیاں ہویاں بادشاہت دیاں ساریاں عورتاں آودے بندیاں دی نافرمانی کرن گیاں تے آکھن گیاں کہ جدوں بادشاہ اخسویرس نے آودی ملکہ نوں آودے حضور آن دا حکم گھلیا تے او نہ آئی۔ ¹⁸ ۱۸۔ تے اِج ای جدوں ایسس واقعے دی خبر فارس تے مادی دیاں سب بیگماں نوں ہووے گی تے او وی ایویں دا سلوک کرن لگن گیا ں تے بادشاہت دے چاراں پاسے غم تے غصے نال لوکی بھر جاون گے ۔ ¹⁹ ۱۹۔ بس جے بادشاہ سلامت نوں منظور ہو وے تے اسیں چاہنے آں اِک شاہی حکم جاری کیتا جاوے جیہڑا فارس تے مادی دے قانون وچ وی لکھیا جاوے تا ں جے آئندہ کسے نوں ایویں دی جرات نہ ہہو سکے تے ملکہ وَشتی نوں شاہی محل توں کڈ دِتا جاوے تے اوہدی جگہ کسے ہور مناسب ملکہ نوں چُنیا جاوے۔ ²⁰ ۲۰۔ بس جدوں بادشاہ دی وڈی بادشاہت وِچ ایسس حکم دا علان کیتا جاوے گا تے ہر عورت نوں آودے شوہر دی تابعداری کرنا فرض ہووے گا بھاویں او کسے وی وڈے یا چھوٹے عہد اوتے لگا ہووے۔ ²¹ ۲۱۔ بادشاہ تے اوہدے سارے امرا نوں معوکان دی ایہہ گل پسند آئی تے بادشاہ نے معوکان دے آکھن دے مطابق کیتا۔ ²² ۲۲۔ اوس نے ساری بادشاہت دے صوبیاں وِچ اوناں دی ماں بولی تے اوناں دی لکھائی وِچ خط گھل کے علان کروا د تا کہ ہر بندہ آودے گھر دا مالک اے تے او آودی ماں بولی بول سکدا اے۔