¹ ۱. اُس ویلے خدا نے مینوں آکھیا پئی پہلیاں تختیاں وانگ اپنے لئی پتھر دیا ں دو تختیاں گھڑ کے بنا۔ تے پہاڑ اُتے میرے کول چڑھ آ۔ تے اپنے لئی لکڑ دا اک صندوق بنا ۔ ² ۲. تے میں اوہناں تختیاں اُتے اوہی احکام لکھ دیاں گا۔ جیہڑے اوہناں پہلیاں تختیاں تے سن جنہاں نوں توں تروڑیا۔ توں اوہناں نوں صندوق وچ رکھ لینا۔ ³ ۔ تد میں سظ دی لکڑ دا اک صندوق بنایا تے پہلی تختی وانگ پتھر دیاں دو تختیاں گھڑیاں تے تختیاں نوں لے کے پہاڑ تے چڑھ گیا۔ ⁴ ۴. تد اوہنے اوہناں اُتے پہلی لکھائی وانگ اوہ دس احکام لکھے۔۔ جیہڑے خدا وند نے پہاڑ تے اگ دے وچکاروں اکٹھ دے دن فرمائے سن ۔ تے خدا وند نے اوہ مینوں دتے ۔ ⁵ ۵. تد میں مڑ کے پہاڑ توں لتھا تے جویں خدا وند نے مینوں فرمایا سی تختیاں نوں اُس صندوق وچ رکھیا جیہڑا میں بنایا سی ۔ ایس لئی اوہ اوتھے ای نیں ۔ ⁶ ۶. تے بنی اسرائیل نے بیروت بنی یعقان توں موسیرہ نوں کوچ کیتا ۔ اوتھے ہارون نے وفات پائی تے اوہ اوتھے ای دبیا گیا۔ تے اوہدا پتر الی عاز ار اُس دی تھاں کہانت اُتے متھیا گیا۔ ⁷ ۷. تے اوتھوں اوہناں نے جد جودہ ول کوچ کیتا تے جد جودہ توں یطباتہ نوں ، جیہڑا پانی دیاں ندیاں دا دیس اے ۔ ⁸ ۸. اُس ویلے خدا وند نے لاوی دے قبیلے نوں وکھرا کیتا۔ تاں جو خدا وند دے عہد دا صندوق چکے۔ تے خدا وند دے حضور حاضر ہو کے اوہدی خدمت کرے ۔ تے اوہدے ناں توں برکت دیوے۔ اج دے دن تیکر انج ای ہوندا اے۔ ⁹ ۹. ایسے کارن لاویاں نوں کوئی حصہ یا وراثت اوہناں دے بھراواں نال نہ لبھی۔ کیوں جو خدا وند ای اوہناں دی میراث اے جویں کہ خدا وند تیرے خدا نے اوہناں نوں آکھیا۔ ¹⁰ ۱۰. تے پہلے دناں وانگوں میں پہاڑ تے چالہی دن تے چالہی راتاں ٹھہرا رہیا۔۔ تے ایس وار وی خدا وند نے میری سن لتی۔ تے نہیں چاہیا کہ تینوں ہلاک کرے۔ ¹¹ ۱۱. تد خدا وند نے فرمایا اُٹھ تے لوکاں دے اگے کوچ کردا ہویا تُر تاں جو اوہ اُس دیس وچ جہدے بارے میں اوہناں دے پیو دادے نال قسم کھادی سی ۔ کہ میں اوہناں نوں دیاں گا۔ داخل ہوون تے اوہدے مالک بنن۔ ¹² ۱۲. ہن اے اسرائیل ! خدا وند تیرا خدا میرے کولوں کیہ چاہندا اے ؟ خالی ایہہ کہ توں خدا وند اپنے خدا کولوں ڈریں۔ اوہدیاں ساریاں راہواں تے چلیں ۔ اوہنوں پیار کریں۔ تے اپنے سارے دل تے اپنی ساری جان نال خدا وند اپنے خدا دی عبادت کریں۔ ¹³ ۱۳. تے اوہدے سارے اوہناں احکاماں تے قانوناں نوں منے جنہاں بارے میں اج دے دن تہانوں حکم دینداں تاں جو تیرا بھلا ہووے۔ ¹⁴ ۱۴. کیوں جو فلک تے فلک الافلاک تے زمین تے جو کچھ ایہدے وچ ہے ایہہ سارا خدا وند تیرے خدا دا ہی اے۔ ¹⁵ ۱۵. پر اوہنے تیرے پیو دادے نوں عزیز جانیا تے اوہناں نوں اپنی محبت دا مدعا بنا لتا۔تے اوہناں مگروں اوہناں دی اولاد نوں یعنی تہانوں قوماں وچوں چن لتا۔ جیویں تسیں اج ویکھدے او۔ ¹⁶ ۱۶. ایس لئی اپنے دلاں دے غلاف دا ختنہ کرو ۔ تے دھون نوں اکڑا کے نہ رکھو۔ ¹⁷ ۱۷. کیوں جو خدا وند تہاڈا خدا اوہی خداواں دا خدا تے خدا ونداں دا خدا وند اے یعنی اوہ خدائے عظیم تے جبار مہیب جیہڑا منہ دا لحاظ نہیں کردا تے رشوت قبول نہیں کردا۔ ¹⁸ ۱۸. اوہ یتیماں تے رنڈیاں دا انصاف کرن آلا اے۔ پردیسی نال اوہ محبت کرن والا جیہڑا اوہنوں روٹی تے کپڑا دیندا اے۔ ¹⁹ ۱۹. ایس لئی تسیں پردیسیاں نوں پیار کرو کیوں جو تسیں مصر دے دیس وچ پردیسی سی۔ ²⁰ ۲۰. تو خدا وند اپنے خدا کولوں ڈر۔ تے اوہدی ای عبادت کر۔ اوہدے نال ولیہٹا رہ۔ تے اوہدے ناں دی ای قسم کھا۔ ²¹ ۲۱. اوہی تیرا فخر تے اوہی تیرا خدا اے۔ اوہنے ای تیرے لئی اوہ وڈے وڈے تے ہولناک کم کیتے جیہڑے تیری اکھاں نے ویکھے۔ ²² ۲۲. تیرے پیو دادا جدوں مصر نوں گئے تاں ستر بندے سن پر اُس ویلے تیرے خدا خدا وند نے تینوں وادھے وچ انبر دے تاریاں وانگ کر دتا اے ۔