¹ ۱۔ تے بنو کد نضر دی بادشاہی دے دوجے ورھے وچ بنو کد نضر نے اجیہے سفنے ویکھے پئی اوہدا دل گھبرا گیا اتے اوہدی نیند روی اڈ گئی ۔ ² ۲۔ فیر بادشاہ نے حکم دتا کہ جادوگراں تے جو تیشاں تے منتریاں تے کسدیاں نوں سدھاجائے تاں جو اوہ بادشاہ دے سفنے دا مطلب دسن ۔اوہ آئے تے بادشاہ دے آگے آکھلوتے مطلب سنن لئی میری جان تاولی اے ۔ ³ ۳۔ بادشاہ اوہناں نوں آکھیا ۔میں اک سفنہ ویکھیا اے ۔اتے اوہدا مطلب سنن لئی میری جان تاولی اے ۔ ⁴ ۴۔ اتے کسدیاں نے بادشاہ نوں ارامی بولی وچ آکھیا پئی اے بادشاہ تو ہمیش جیوندا رہویں توں اپنے بندیاں نوں اپنا سفنا دس ۔اسی اوہدا مطلب دساں گے ۔ ⁵ ۵۔ بادشاہ نے کسدیاں نوں جواب دتا ۔میں اپنی گل داپکا آں ۔جے تاں تساں میرا سفنا تے اوہدا مطلب ناں دسیا تاں تہاڈے ٹوٹے ٹوٹے کر دتے جان گے نالے تہاڈے گھرکوڑے دیاں ڈھیریاں بن جان گے ۔ ⁶ ۶۔ پر جےتساں سفناتے اوس دا مطلب دس دتا تاں میں تہانوں تحفے ،انعام تے مان دواں گا ۔سومیرا سفنا تے اوس دا مطلب دسو ۔ ⁷ ۷۔ اوہناں فیر بادشاہ دی منت کردے ہوئے آکھیا جیکر بادشاہ اپنے خادماں نوں اپنے سفنے دی دس پاوے تے فیر ایسی اوس دا مطلب دس دیاں گے ۔ ⁸ ۸۔ پر بادشاہ نے جواب دتا کہ تسی ٹالنا چاہندے او کیوں جوتہانوں پتہ اے کہ میری گل پتھر تے لیک اے ۔ ⁹ ۹۔ جے تساں میرے سفنے دی دس نہ پائی تے تہاڈےلئی بس اک ای حکم وےپئی تساں سارے کوڑ مارن اتے حیلے بہانے دیاں گلاں تے اک مِک ہو گے او ۔اوتاں جوایہہ ویلا لنگ جاوے اتے ہن جے تسیں سفنے دی دس پاؤگے تے فیر میں سمجھ جانواں گا کہ تسی ایس دا مطلب وی دس سکدے او ۔ ¹⁰ ۱۰۔ کسدیاں نے بنتی کیتی پئی ساری دھرتی اتے اجیہا کوئی وی آدمی ناں اے جیہڑا بادشاہ نوں ایہہ گل دس سکے ۔اتے کوئی بادشاہ وی بھانویں اوہ بڑا مہان تے سور ما وی کیوں نہ ہوے تیرے وانگ ہویا اے ۔جیہنےجادوگریا ں جوتیشیاں اتے کسدی کولوں اجیہی گل پچھی ہووے ۔ ¹¹ ۱۱۔ جس گل دی بادشاہ نوں ریجھ اے اوہ کم ڈاہڈا مشکل اے تے کوئی وی بادشاہ دے حضور کوئی وی اوہدا سفنا نئیں دس سکدا۔بس اوہ دیوتا ایہہ بھید دس سکدے نیں جنہاں دی وسیب بندیاں وچ نئیں ۔ ¹² ۱۲۔ ایس گل تے بادشاہ نوں غصہ آ گیا تے اوہ بھڑک اٹھیا ،نالے حکم دتا پئی بابل دے سارے گیانیاں نوں تھاں مار دتا جاوے ۔ ¹³ ۱۳۔ فیر گیانیاں نو ں تھاں مار دین دا حکم دے دتا گیا تے دانی ایل تے اوہدے ساتھیاںنوں وی قتل کرن لئی ڈھونڈن لگ پئے ۔ ¹⁴ ۱۴۔ اوس ویلے تد دانی ایل نے بڑی دنائی تے ہوشیاری توں کم لیندے ہویاں بادشاہ دے درباریاں دے سردار اریوک نال گل کیتی ۔جیہڑا بابل دے گیانیاں نوں تھاں مارن لئی ٹر پیا سی ۔ ¹⁵ ۱۵۔ اوہنے بادشاہ دے درباریاں دے سردار توں پچھیا بادشاہ نے اجیہا ڈاہڈا حکم کیوں دتا اے ؟ اتے اریوک نے دانی ایل نوں اوہدی سچائی دس دتی ۔ ¹⁶ ۱۶۔ دانی ایل نے بادشاہ کول یہ بینتی پھیجی کہ مینوں وقت دتا جاوے ،فیرمیں بادشاہ اگے سفنے دا مطلب دساں گا ۔ ¹⁷ ۱۷۔ فیر دانی ایل گھر گیا تے اپنے ساتھیاں حننیاہ تے میساایل ت ےعزریاہ نوں قصہ دسیا ۔ ¹⁸ ۱۸ ۔ تاں جے اوہ آسمان دے خدا توں ایس بھید پاروں اوہدے رحم دی بینتی کرن ۔ تاں ناں ہووے کدرے دانی ایل تے اوہدے ساتھی وی بابل دے دوجے گیانیاں سنے قتل کردتے جاون۔ ¹⁹ ۱۹۔ فیر اینج ہویا کہ رات دے ویلے رویا وچ دانی ایل اُتے اوہ بھید کھل گیا تے دانی ایل نے آسمان دے خدا نوں مبارک آکھیا ( دا شکر کیتا)۔ ²⁰ ۲۰۔ دانی ایل آکھن گلا خدا دا ناں شروع توں لے کر اخیر تیک مبارک اے گیان تے اختیار اوس دا اے ²¹ ۲۱۔ اوہیو ،ویلیاں تے زمانیان نوں بدل دیندا اے اوہ ہی بادشاہواں نوں ڈگا نداتے کھڑاکر دیندا اے اوہ ہی گیانیاں گیان تے دانیاں نوں دنائی بخشدا اے ²² ۲۲۔ اوہ ہی ڈونگیاں تے ڈھکیاں گلاں نوں سامنے لے آندا اے تے جو کجھ ہنریاں وچ اے اوہنوں وی اوہ جاندا اے کیوں جو چانن اوہدے نال رہندا ا ے ²³ ۲۳۔ اے میر ے باپ دادا دے خدا میں تیرا شکر تے تیری تعریف کرداہاں کیوں جو توں مینوںگیان تے اختیار بخشیا اے تے ایس تیرے کولوں جیہڑی گل پچھی توں سانوں دس دتی نالے بادشاہ دی گل (سفنا) ساڈے اتے ظاہر کر دتی۔ ²⁴ ۲۴۔ تد دانی ایل اریوک کول گیا جینہوں بادشاہ نے بابل دےگیانیاں نوں قتل کرن لئی ٹھہرایا سی ۔تے جا کے اوہنوں آکھیا ،بابل دےگیانیاں نوں قتل ناں کر ۔مینوں بادشاہ دے سامنے لے چل میں بادشاہ دے سفنے دا مطلب دساں گا ۔ ²⁵ ۲۵۔ تد اریوک تُرت اوسی ویلے دانی ایل نوں بادشاہ دے سامنے لے گیا تےاوہنوں آکھیا ،مینوں یہودا ہ دے قیدیاں وچوں اک آدمی ملیا اے اوہ بادشاہ دے سفنے دا مطلب دسے گا ۔ ²⁶ ۲۶۔ بادشاہ نے دانی ایل نوں جیہڑا بیلشضر اخواندا سی پچھیا توں میرے اوس سفنے دا جیہڑا میں ویکھیا اے اوہدا مطلب دس سکنا ایں ؟ ²⁷ ۲۷۔ دانی ایل نے بادشاہ اگے عرض کیتی کہ جیہڑا بھید بادشاہ نے پچھیا اے اوہ بھید گیانی تے جوتشی تے جادوگر تے فالگیر نئیں دس سکدے ۔ ²⁸ ۲۸۔ پرآسمان اتے اک خدا اے جیہڑا بھید کھول دیندا اے ۔اوہنے بنو کد نضر بادشاہ نوں ایہہ وکھایا اے پئی اخیر دے دناں وچ کیہ کجھ ہوون والا اے ۔جیہڑے سفنے تے رویا توں اپنے بسترے اتے ویکھے ۔ ²⁹ ۲۹۔ اوہ سفنے ایہہ نیں ۔اے بادشاہ جدوں توں اپنے بستر اتے اپنے آون والے ویلے دے پاروں پر یشانسی ادوں بھید کھولن والے نے تینوں دس دتا اے پئی اگے کیہ کیہ ہووے گا ۔ ³⁰ ۳۰ ۔ ایہہ بھید میرے اتے کھلیا اے ،ایہدا مطلب ایہہ نئیں پئی میں دوجے جیوندیاں کولوں بہتا گیان والا آں ،پر ایس لئی پئی بادشاہ نوں سفنے دا مطلب دسیا جاوے تے تینوں اپنیاں سوچاں دی پچھان ہوجاوے ۔ ³¹ ۳۱۔ اے بادشاہ جدتوں اکھاں چکیاں تے توں اک وڈی ساری مورت نوں اپنے اگے کھلوتیاں ویکھیا۔او مورت اوچی تے چندھیا دین والی سی ۔اتے اوہدی شکل ہبیتناک سی ۔ ³² ۳۲۔ اوس مورت دا سر سچے سونے دا سی ۔اوہدی چھاتی تے بانہواں چاندی دیاں تے اوس دا ڈھڈ تے پَٹ تابنے دے سن۔ ³³ ۳۳۔ اوہدیاں لتاں لوہے دیاں اتے اوہدے پیر کجھ لوئے دے تے کجھ مٹی دے سن ۔ ³⁴ ۳۴۔ جد توں ویکھ رہا سی تے اک پتھرہتھ لائے بغیر ای پہاڑ توں کٹ گیا تے مورت دے پیراں تے آ وجیا جیہڑے لوہے تے مٹی دے سن ،تے اوہناں نوں ٹوٹے ٹو ٹے کر دتا ۔ ³⁵ ۳۵۔ فیر لوہاتے مٹی تے تانبا تے چاندی تے سونا ساریاں نوں ٹو ٹے ٹو تے کر دتا گیا ۔تاں اوہ اینج جا پرے سن جیکر گرمی دی رت دے اناج دے ڈھیر دی توڑی ہوون ۔فیر وآ اوہناں نوں اڈا کے لے گئی تے اوہناں دا نشان وی باقی ناں رہیا ۔پر جس پتھر نیں اوس مورت نوں ماریا سی اوہ پتھربڑا وڈا پہاڑ بن گیا تے اوس نے ساری بھوئیں نوں بھر دتا ۔ ³⁶ ۳۶۔ تیرا سفنا ایہوں سی ۔ہن اسی بادشاہ دے اگے ایس سفنے دا مطلب دساں گے ۔ ³⁷ ۳۷۔اے بادشاہ توں ہی بادشاہواں دا بادشاہ ایں۔جس نوں اسمان دے خدا نے دیس تے زور تے راج تے شان بخشی اے ۔ ³⁸ ۳۸۔ نالے تھاں تھاں جتھے ویلوکی وسدے پئے نیں خدا نے میدان دے جانورتے ہوادے پنچھی تیرے ہتھ وچ دت دتے ہین ۔تے تینوں اوہناں سباں دا سرداربنایا اے ۔سونے دا اوہ سر توں ای ایں ۔ ³⁹ ۳۹۔تیرے پچھوں اک ہور راج ہووے گا جیہڑا تیرے راج تھوں چھوٹا ہووے گا ۔ایہدے پچھوں اک ہور راج مطلب تیجا راج تابنے دا ہووے گا جیہڑاساری دھرتی اتے راج کرے گا۔ ⁴⁰ ۴۰۔فیر چوتھا راج لوہےوانگ کرڑا ہووے گی ،کیوں جو جیوئیں لوہاسب کجھ بھن چھڈدا تے چور و چور کر دیندا اے تیویں اوہ سب کجھ بھن چھڈے گا نالے چوروچور کر دوے گا ۔ ⁴¹ ۴۱۔جیویں تو ویکھیا اے کہ اوس دے پیر تے انگلیاں کجھ کمہا ر دی مٹی دیا ں تے کجھ لوہے دیاں سن تاں ایس دا مطلب ایہہ وے کہ اوس راج دے حصے ہوجاون گے پر اوس وچ لوہے دی طاقت ہووے گی کیوں جو توں ویکھیا اے کہ چکنی مٹی نال لوہاملیا ہویا سی ۔ ⁴² ۴۲۔ پرتوں ایہہ جیہڑا ویکھیا اے پئی پیراں دیاں انگلیاں کجھ لوہے تے کجھ مٹی دیاں سن۔سو ایہدا دا مطلب ایہہ وے پئی اوہ راج تھوڑا جیہامصبوط تے تھوڑا جیہاںکمزور ہووے گا ۔ ⁴³ ۴۳۔نالے جیہڑا تو ایہہ ویکھیا اے پئی لوہاچکنی مٹی نال ملیا ہویا سی تیویں اس وچ لوہے دی تکڑائی ہووے گی ۔جیویں لویا مٹی نال میل نئیں کھاندا ایویں اوہ وی یک دوجے نال میل نئیں کھان گے ۔ ⁴⁴ ۴۴۔ پر اوہناں بادشاہواں دےدناںوچ اسمان دا خدا اک بادشاہی کھڑی کرے گا جیہڑی ہمیشہ تیک ختم ناں ہوو ے گی تے ناں ای اوس دا راج کسی ہور قوم دے ہتھ دتا جاوے گا ۔سگوں اوہ بادشاہی دوجی بادشاہیاں نوں ڈھا کے ختم کر دےوے گی تے آپ ہمیش تیک سلامت رہووے گی ۔ ⁴⁵ ۴۵۔ تے نالے جیویں توں ویکھیا اے کہ پہاڑتوں بغیر ہتھ لگائے سی اک پتھر کٹ گیا تے اوہنے لوہے تے تانبے تے مٹی تے چاندی تے سونے نوں چور چور کر دتا ۔ایہہ رب نے بادشاہ نوں آون والے دناں وچ ہوون والیاں گلاں وکھائیاں نیں ۔تے ایس سفنے دا مطلب وی اعتبار کرن دے قابل اے ۔ ⁴⁶ ۴۶۔ ایہہ سن کے بنو کدنضر منہ دے بھار ڈگیا تے اوہنے دانی ایل نوں سجدہ کیتا ۔ نالے حکم دتا دانی ایل دے اگے نذر تے بخور چڑھایا جاوے ۔ ⁴⁷ ۴۷۔ بادشاہ دانی ایل نوں آکھن لگا ۔تیرا خدا سچ مچ خداواں دا خدا تے بادشاہواں دا بادشاہ تے بھیداں دا کھولن والا اے کیوں جو توں ایہہ بھید کھول سکیاں ایں ۔ ⁴⁸ ۴۸۔تد بادشاہ نے دانی ایل نوں چوکھی عزت دتی تے نالے اوس نوں ڈھیر انعام بخشے تے اوس نوں بابل دے سارے صوبے دا راج دتا ۔تے اوہ بابل دے گیانیاں دا سب توں وڈا سردار بن گیا ۔ ⁴⁹ ۴۹۔ اوس ویلے دانی ایل نے بادشاہ دی بینتی کیتی پئی سدرک ،میسک ،عبدنجو نوں بابل دے صوبے دا کارپرداز بنادےوے ۔پر دانی ایل آپوں شاہی دربار وچ رہیا ۔