¹ . عامُوس دا کلام جہڑا تقوع دا اِک اڑیالی سی۔اونے زلزلے توں دو سال پہلاں جد یہوداہ عزیاہ دا بادشاہ سی تے یوآس دا پُتر یروبعام اِسرائیل دا؛ اِسرائیل لئی ویکھیاکہ ² . خداوند صیون نال گجدا اے تے یروشلیم توں للکاردا اے اڑیالیاں دِیاں چراو ن والیاں تھاواں سُکھ دِیاں پیاں نے تے کرمل دی چوٹی مرجھا ریی اے اِسرائیل دے لوکاں لئی فیصلہ ³ . خداوند ایویں فرماند اےکہدِمشق دے تَن بلکہ چار گناواں دے سببوں میں آودے قہر توں باز نہیں آواں گا چونکہ اونے جلعاد نوں دندا ں آلے لوہے دے داترے نال روند دِتا ⁴ . میں حزائیل دے گھرانے اُتے اِگ گھلاں گا جہڑے بن ہدد دےقعلیاں نوں ساڑ دیوے گی ⁵ . میں دِمشق دے پھاٹکاں نوں توڑ دیاں گا مین آون دی وادی دے بادشاہ نوں برباد کر دیواں گا تے اونوں جہڑا عدن اُتے حکمرانی کر دا اے تے ارام دے لوک قیدی ہو کے قیر نوں جاون گے خداوند فرماندا اے ⁶ . خداوند ایویں فرماند اے غزہ دے تِن بلکہ چار گناواں دے سببوں میں آودے غضہ توں باز نہیں آواں گا چونکہ اونے سارے فرقیاں نوں قید کر لیا تے اوناں نوں ادوم دے ہتھ ویچ دِتا ⁷ . میں غزہ دے پناہ دے شہر اُتے اِگ گھلاں گا جہڑی اوھدے قعلیاں نوں کھا جاوے گی ⁸ . میں اشدود دے بادشاہ نوں برباد کر دیواں گا تے اونوں جہڑا اسقلون وِچ حکمرانی کر دا اے میں عقرون دے خلاف آودا ہتھ ودھاواں گا جد تیک کہ فلستیاں دا آخری بندہ نہ مر جاوے خداوند فرماندا اے ⁹ . خداوند ایویں فرماندا اے کہ میں صور دے تِن بلکہ چار گناواں دے سببوں اونوں بے سزا نہ چھڈاں گا چونکہ اونے قیدیاں دے سارے فرقیاں نوں ادوم نوں ویچ دِتا تے بھراواں آلے وعدے دا لحاظ نہ کیتا ¹⁰ . ایس لئی میں صور دی شہر پناہ اُتے اِگ گھلاں گا جہڑی اوھدے قعلیاں نوں کھا جاوے گی ¹¹ . خداوند ایویں فرماندا اے ادوم دے تِن بلکہ چار گناواں دے سببوں میں اونوں بے سزا نہ چھڈاں گا اونے ساری رحمدلی نوں ختم کر کے آودے بھراواں نوں تلوار لے کے ماریا اوھدا قہر ہمیشہ بلدا ریا تے ختم نہیں ہویا ¹² . میں تیمان اُتے اِگ گھلا ں گا او بصرہ دے قعلیاں نوں کھا جاوے گی ¹³ . خداوند فرماندا اےکہ عمون دے تِن بلکہ چار گناواں دے سببوں میں اونوں بے سزا نہ چھڈاں گا چونکہ اونے آودی سرحداں لئی جلعاد دی حاملہ عورتاں دے پیٹ پاڑ دِتے ¹⁴ . میں ربہ دی شہر پناہ اُتے اِگ گھلاں گا جہڑی اوھدے قعلیاں نوں جنگ دے دِناں تے لڑائی تے طوفان دے دِن ھنیری وِچ کھا جاوے گی ¹⁵ . اوھدا بادشاہ آودے حاکماں دے نال قید وِچ جاوے گا خداوند فرماندا اے