1
-جدوں رَب نے داؤد نُوں اوہدے سارے دُشمناں تے ساؤل دے ہتھوں بچا لیا۔تد اوس نیں ایس گیت دے اکھر رَب دے حضور آکھے۔
2
-تد اوس نیں اوہنوں آکھیا۔اے رَبا ۔میری چٹان ۔میرے قعلے۔میرے چُھڈان والے۔
3
-رَب ۔میری چٹان ۔جیتھے میں پناہ لئیناںواں۔ میری ڈھال ۔میری نجات دا قرن۔میرے اُچے بُرج۔میری پناہ۔میراچھُڈان والے۔جیہڑا ظلم تَوں مینوں بچا لیندا اے۔
4
-رَب حمد دے قابل اے ،میں سد دا ہاں۔ تے میں اپنے دُشمناں تَوں رہائی پاواں گا۔
5
-موت دیاں چھلاں نیں میں گھیر لیا اے۔ تے بھیڑے ہڑھاں نیں مینوں ڈرایا اے۔
6
-پاتا ل دے رَسے میرے چار چفیرے سَن۔ موت دے پھندے میرے اُتے آ پئے ۔
7
-میں اپنی مصیبت وچ رَب نُوں واج دِتی۔ تے اپنے رَب کول میں چِکیا۔ تے اوس نیں اپنی ہیکل وچوں میری واج سُنی۔ تے میرے چیکن دی واج اوہدے کَنا ں تیک پہنچی۔
8
-تد زمین ہِلی تے کانبھ گئی۔ اَسمان دیاں نِیاں تھرتھرائیاں۔
9
-اوہدے نتھنیاںوچوں دُھواں اُٹھیا تےاوہدے مُنہ وچوں ساڑ دین والی اَگ۔ انگارے جنہاں نُوں اوس نے جَلایا۔
10
-اوہنے عرشاں نُوں نِیواں کیتا تے اُتریا۔ اوہدے پیراں ہیٹھاں کالے بدل سَن۔
11
-کروبی اُتے سوار ہو کے اوہ اُڈیا سی۔ ہوا دیاں باہاں اُتے پرواز کیتی۔
12
-اوہنے ہنیرا گھُنڈ وانگ لیا۔ بارش دا کالا بدل اوہدا لباس سی۔
13
-اوہدی حضوری دی جھلک نال اَگ دے انگارے جَل گئے۔
14
-تے اَسمان تَوں خُداوند گرجیا۔ حق تعالی ٰ نیں اپنی واج سُنائی۔
15
-اوہنے اپنے تیر چلا کے اوہناں نوں پریشان کیتا۔ لگا تار بجلی نال اوہناں ہرایا۔
16
-سمندر دِیاں ڈنگھیائیاں ظاہر ہوئیاں ۔ رَب دی دھمکی دے سببوں۔ اوہدے قہر دے دم دے جھونکے نال۔
17
-اوہنے اُچیائی تَوں ہتھ ودھا کے مینوں پھڑ لیا۔ تے بوہتےپانی وچوں کھیچ کے مینوں کڈیا
18
-میرے بوہت ای ڈاھڈے دُشمن تَوں اوس نیں مینوں چھُڈایا۔ میرے دُشمناں تَوں جیہڑے میرے تَوں زیادہ طاقتور سَن۔
19
-میرے سوگ دے دن اوہ میرے اُتے چڑھ آئے۔ رَب میرا آسرا بنیا۔
20
-اوہ مینوں کھُلے میدان وچ کڈ لیایا۔ اوہنے مینوں چھُڈایا۔ کیوں جو اوہ مینوں پیار کر دا اے۔
21
-میری سچائی دے حساب نال رَب نیں مینوں جزا دِتی ۔ میرے ہتھاں دی پاکیزگی دے حساب نال مینوں بدلہ دِتا
22
-کیوں جو میں رَب دیاں راہواں تے چلدا رہیا۔ تے خطاکر کے اپنے رَب کولوں دُور نہ ہویا۔
23
-کیوں جو میں اوہدیاں کُل گلاں اپنے سامنے رکھیاں تے اوہدے قوانین اپنے کولوں نہ ہٹائے۔
24
-میں اوہدے حضور کامل رہیا۔ تے اپنے آپ نُوں باز رکھیا۔
25
-میری سچائی دے حساب نال خداوند نیں مینوں اجر دِتا۔ میری اوس پاکیزگی دے حساب نال جیہڑی اوہدے سامنے سی۔
26
-رحم دل دے نال تُوں رحم دل ہوندا یں۔ کامل بندے نال تُوں کامل ہوندا ایں۔
27
-تُوں پاکزہ دے نال پاکیزہ ایں۔ تے چلاک دے سامنے ہوشیار۔
28
- کیوں جو فروتن قوم نُوں تُوں بچایا۔ پر مغروراں دیاں اَکھاں نُوں پست کیتا۔
29
-کیوں جو اے رَب تُوں میرا چراغ ایں۔ اے میرے رَبا تُوں میرے ہنیرے وچ نُور ایں۔
30
-کیوں جو میں تیری سبب فوج اُتے چڑھ جاندا ہاں۔ تے اپنے رَب دے سبب کندھ ٹپ جاندا ہاں۔
31
-رَب دی راہ کامل اے۔ رَب دا قول اَگ وچ تایا ہویا اے۔
32
-رَب دے سَوا ہور کون رَب اے۔ ساڈے خُدا دے علاوہ ہور کون چٹان اے۔
33
-رَب جیہڑا میری طاقت تے دلاوری اے۔ جیہڑا کامل نُوں اپنی راہ وچ چلاندا اے۔
34
-جس نے میرے پیراں نُوں ہرنیاں وانگ کیتے۔ تے اُچے مقاماں تے مینوں قائم کیتا۔
35
-جس نے میرے ہتھاں نُوں جنگ کرناسکھایا۔ تے میریاں باہاں نُوں پیتل دی کمان چڑھانا سکھایا۔
36
-تُوں مینوں اپنی نجات دی دھال دِتی۔ تیری خاطر داری نے مینوں اُچا کیتا۔
37
-تُوں میرے پیراں نُوں کھُلے راہ تے چلایا۔ تے میرے پیر نئیں تِلکے۔
38
-میں اپنے دُشمناں دا پیچھا کر کے اوہناں نُوں ماردیندا سی۔ تے جدؤں تیک اوہناں نُوں فنا نہ کر دیواں باز نئیں آؤندا سی۔
39
-میں اوہناں نُوں چکناچور کر دِتا پئی اوہ اُٹھ نہ سکے۔ میرے پیراں تھلے اوہ ڈِگ پئے۔
40
- تے تُوں جنگ کرن لئی میری کمر نُوں میرے اَگے میرے مُخالفاں نُوں جھُکا دِتا
41
-میرے دُشمناں نُوں تُوں پَجا دِتا۔ تے میرے نال عداوت رکھن والیاں نُوں فنا کیتا۔
42
-اوہناں نیں سدیا ۔پر کوئی نئیں جیہڑا چُھڈائے۔ رَب نُوں سدیا ۔پراوہنے اوہناں دی ناں سُنی۔
43
-میں اوہناں نُوں پِیس پِیس کے ہوا دی خاک وانگ بنایا۔ کُوچیاں دے چیکڑ وانگ روندیا۔
44
-تُوں مینوں لوکاں دے جھگڑیاں تَوں رہائی دِتی ۔ تُوں مینوں قوماں دا سردار بنایا۔ جس قوم نُوں میں نئیں جاندا سی اوہ میری خدمت کرن لگی۔
45
-پردیسیاں نیں میری خوشامد کیتی۔
46
-پردیسی اَدھ موئے ہو ئے۔ کانبھ دے کانبھ دے اپنے قعلیاں وچوں نکل آئے۔
47
-رَب زندہ رہوے۔۔میری چٹا ن مُبارک ہووے۔ وڈیائی ہووے میری نجات دی چٹان دی۔
48
-رَب جنہے مینوں بدلہ لینا دسیا۔ تے قوماں نُوں میرے ہتھاں چہ کر دِتا۔
49
-تُوں جس نے میرے دُشمناں تَوں مینوں چھُڈایا۔ میرے ویریاں اُتے مینوں اختیار دِتا ۔ تے ظالم بندے تَوں مینوں بچایا۔
50
-ایس لئی اے رَبا میں قوماں وچ تیری وڈیائی کراں گا۔ میں تیرے نام دی مدح سرائی کراں گا۔
51
-تُوں جنہے بادشاہ نُوں وڈی جیت دِتی ۔ تے اپنے مُمسوح نوں رحمت وکھائی۔ داؤد تے اوہدی نسل نُوں ہمیشہ تیک ۔