1
۱۔یسُوعؔ مسِیح دے رسُول پطرسؔ ولّوں اوہناں وَکھ کیتے ہوئے پردیسیاں نُوں جیہڑے پُنطُسؔ، گِلتیہؔ ، کَپّدُکیہ، آسِیہؔ اَتے بُتھنیہؔ وِچ نیں۔
2
۲۔رَبّ باپ دے اگتیرے عِلم دے سببّوں رُوح دے پاک کرن نال تابع دار ہون اَتے یسُوع مسِیح دا خُون چِھڑکے جان لئی چُنے ہوئے نیں، فضل تے تسلّی تُہانوں مِل دی رہے۔
3
۳۔ ساڈے خُداوَند یسُوعؔ مسِیح دے رَب تے باپ وڈیائی ہووے جِنہے یسُوع مسِیح دے مویاں وِچوں جی اُٹھن دا سبّب اپنی بڑی رحمت نال ساہنُوں جیوندی آس دین لئی نَویں سِریوں پَیدا کیِتا۔
4
۴۔پئی اِک وِرثہ جیہڑا نہ تے ناس ہون والا نہ کِسے نُقص والا اَتے نہ کُملان والا اے سگوں اَسمان اُتّے تُہاڈے لئی رکھی ہوئی اے۔
5
۵۔جِنہاں دی راکھی خُدا دی قُدرت نال اِیمان دی راہِیں اوس نجات واسطے ہوندی اے جیہڑی چھیکڑلے ویلے ظاہر ہون والی اے۔
6
۶۔ایہدے سببوں تُسی خُوشی کردے او۔جد کے ہُن کُجھ دیہاڑیاں تیِک لوڑاں دے سببوں وَن سَووَنِیاں ازمایشاں توں دُکھی او۔
7
۷۔اَتے ایہ ایس لئی اے پئی تُہاڈا چنڈیا ہویا اِیمان جیہڑا اَگ نال تائے ہوئے فانی سونے توں وی بُہت قیمتی اے یسُوعؔ مسِیح دے آن دے ویلے تعرِیف، جلال اَتے عِزّت دا سبب بنے۔
8
۸۔اوہدے نال تُسی بِنا ویکھیاں مُحبّت کردے او جد کے ہُن تے اوہنوں نئیں ویکھدے تاویں اوہدے تے اِیمان لیا کے اجیہی خُوشی کردے او جیہڑی شبداں وِچ نئیں دسی جا سکدی اَتے جلال نال بھری ہوئی اے۔
9
۹۔اَتے اپنے اِیمان دا مقصد مطلب کے رُوحواں دی نجات حاصِل کردے او۔
10
۱۰۔ایسے نجات لئی اوہناں نبیاں نیں بڑی جان ماری اَتے تحقیق کیتی جِنھاں نیں اوس فضل دے بارے جیہڑا تہاڈے تے ہون والا سی نبُوّت کیتی۔
11
۱۱۔اوہناں نیں ایس گل دی تحقیق کیتی پئی مسِیح دا رُوح جیہڑا اوہناں وِچ سی اَتے پہیلاں توں مسِیح دے دُکھاں اَتے اوہناں دے بعد دے جلال دی گواہی دیندا سی ، اوہ کیہڑے اَتے کینج دے ویلے وَل اِشارہ کردا سی۔
12
۱۲۔اوہناں نُوں ایہ وکھایا گیا پئی اوہ نا اپنی سگوں تُہاڈی سیوا لئی ایہ گلاں کہیندے رہندے سَن جِنھاں دی خبر ہُن تُہانوں اوہناں دے راہیِں مِلی جِنھاں نیں رُوحُ القُدس دے وسیلے جیہڑا اَسمان توں گھلیا گیا تُہانوں خُوشخبری دِتّی اَت فرِشتے وی ایہناں گلاں تے دھیان نال نِگاہ کرن دی اُڈیک وِچ نیں۔
13
۱۳۔ایس لئی اپنی عقل دا لک بنھ کے اَتے چُست ہو کے اوس فضل دی پُوری آس رکھّو جیہڑا یسُوعؔ مسیح دے وکھالی دین دے ویلے تُہاڈے تے ہون والا اے۔
14
۱۴۔اَتے تابع دار اولاد ہو کے اپنی جہالت دے دور دئِیاں پرانیاں خواہشاں دے پِچھے نہ چلو۔
15
۱۵۔سگوں جیویں تُہاڈا سَدّن والا پاک اے اونج ای تُسی وی اپنے سارے چال چَلّن وِچ پاک بنو۔
16
۱۶۔کیوں جو لِکھیا اے پئی پاک بنو ایس لئی پئی مَیں پاک ہاں۔
17
۱۷۔اَتے جد تُسی باپ کرکے اوہدے کولوں دُعا منگ دے او جیہڑا ہر اِک دے سببوں رَئی کیتیاں بِناں عدالت کردا اے تے اپنی مُسافری دا ویلا خوف نال کٹّو۔
18
۱۸۔کیوں جو تُسی جان دے او پئی تُہاڈا بھیڑا چال چلّن جیہڑا پئیو دادیاں توں لگا آؤندا سی اوہدے توں تُہاڈی خلاصی فانی شَیواں مطلب کے سونے چاندی نال نئیں ہوئی۔
19
۱۹۔سگوں اِک بے نُقص تے بے داغے لیلے دے قیمتی لہو نال مطلب کے مسِیح دے لہو نال۔
20
۲۰۔تے خُدا نُوں دُنیا دے بنن توں پہیلاں ای اوہدا عِلم سی پر تُہاڈی لئی چھیکڑے ویلے ظاہر کیِتا گیا۔
21
۲۱۔اَتے تُسیں اوہدے راہیِں خُدا اُتّے اِیمان لیاندا اے۔ جِنھیں اوہنوں مویاں وِچوں جوایا اے اَتے جلال وی دِتّا تاں جو تُہاڈا اِیمان تے آس خُدا اُتّے ہووے۔
22
۲۲۔ایس لئی پئی تُسیں سچیائی نُوں مَن کے بھراواں نال سَچی مُحبت کرن لئی اپنیاں دِلاں نُوں پاک کیتا اے، دِلوں تے جانوں آپو وِچ مُحبت کرو۔
23
۲۳۔کیوں جو تُسی جِسمانی تُخم توں نئیں سگوں رُوحانی توں رَب دے کلام دے رائِیں جیہڑا جِیوندا تے قیم اے نَویں سِریوں جمّے او۔
24
۲۴۔فیر ایہ آیا ے پئی اِنسان گھاہ وانگ اے اَتے اوہدی ساری شان تے وکھاوا گھاہ دے پُھل وانگ اے۔ گھاہ تے کُرما جاندا اے اَتے پُھل ڈِگ پَیندا اے۔
25
۲۵۔پر خداوند دا کلام سدا تیکر قیم رہے گا۔ ایہو ای خوشخبری دا کلام اے جیہڑا تُہانوں سُنایا گیا سی۔