¹ ۱۔ تے جد سلیمان نے خُدا دا گھر تے شاہی محل بنا لیا تے اوہ سارا کُجھ جو کرنا ضروری سی، کر لیا۔ ² ۲۔ تے خُداوند اوہنے دُجی وار وکھالی دِتا جِویں اوہ اوہنوں جِبعون وِچ وکھالی دِتا سی۔ ³ ۳۔ تے خُداوند نے اوہنوں آکھیا: تُوں میرے اَگے جیہڑی دُعا تے فریاد کِیتی اےاوہ میں سُن لئی اے تے میں تیرے بنائے ہوے گھر نوں پاک کیتا اے تاں جو میرا ناں اوہدے وِچّ سدا رہوے۔ میریاں آنکھاں تے میرا دِل سَدا اوتھے لگا رہے گا۔ ⁴ ۴۔ تے رہی تیر ی گل ، جے تُوں سچے دَل تے راستی نال میرے حضور ٹُریں جویں تیرا پئو داود ٹُر دا سی تے اوہ سبھ کریں جہدا میں حُکم دیاں تے میرے فرماناں تے قانوناں تے عمل کریں ⁵ ۵۔ تے میں تیرا شاہی تخت اِسرائیل اُتے سَدا قائم رکھاں گا جیہا میں تیرے پئو داود نال وعدہ کیِتا سی تے آکھیا پئی تیرے ٹبّر وَچّ تیرے تخت تے بہن لئی بندے دا کھاٹا نہ ہوئے گا۔ ⁶ ۶۔ پَر جے تُسی یاں تہاڈی اَل میرے توں منہ موڑ لوو تے میرے دِتے ہوئے فرماناں تےآئین عمل نہ کرو تے ہور معبوداں دی عبادت تے اوہناں اَگے سِجدے پین لگ پوو ⁷ ۷۔ تے میں اسرائیل نوں اوس دیس وِچوں جیہڑا میں اوہناں نُوں دِتا اے، کڈھ دیاں گا تے ایس گھر نُوں جیہڑا میں اپنے ناں لئی پاک کیتا ا ے اَکھاں توں دُور کر دیاں گا۔ فیر اَسرائیل تمام قوماں وِچّ اِک مثال تے مخول بن کے رہ جائےگا ۔ ⁸ ۸۔ تے پاویں ہن تے ایہہ گھر ودِھیا وکھالی دیندا اےپَر بعد وِچّ جیہڑا اوہدے کولوں لنگے گا حیران ہووے گا تے نِند کے آکھے گاپئی خُدا نے ایس دیس تے ایس گھر دے نال اجیہا ورتاو کیوں کیِتا؟ ⁹ ۹۔ تد لوک کہن گے کیوں جو اوہناں خُداوند اپنے رب نوں ، جیہڑا اوہناں دے پئو دادے نوں مُصروں کڈھ لیا اے، چھڈ دِتّا اے تے دُجّے معبوداں نوں مَن لیاتے اوہناں اَگے سجدہ تے اوہناں بندگی کرن لگے۔ ایس لئے خُداوند اوہنا ں تے ایہہ ساری مصیبت گھلی ایہہ۔ ¹⁰ ۱۰۔ تے وِیّاں وریاں بعد جنہاں دے وِچ سلیمان ایہہ دو عمارتاں یعنی خُداوند دا گھر تے شاہی محل بنا لیا ¹¹ ۱۱۔ تے اوہنے گلیل دے ویہ قصبے صُور دے بادشاہ حیرام نوں دے دِتے کیوں جو حِیرا م نےاوہنوں دیودار تے صنوبر دی لکڑ تے سونا جنھاں دی اوہناں فرمائیش کیتی سی، اَپڑیا سی۔ ¹² ۱۲۔ پر جدحِیرام صُور توں اوہنا قصبیا ں توں جیہڑے سلیمان نے اوہنوں دِتے سَن ، ویکھن گیا تے اوہ اوہنوں پسند نہ آئے۔ ¹³ ۱۳۔ سو اوہنے اوہنوں پُوچھیا پئی، میرے ویر ایہہ کیہو جئے قصبے نیں جیہڑے تُو ں مینوں دِتے نیں؟ تے اوہنے اوہنا ں دا ناں کبُول دا دیس رکھیا تے اَج تک اوہناں دا اوہو ناں ایں۔ ¹⁴ ۱۴۔ تے حِرام نے بادشاہ لئی اِک سو ویہ قنطار سونا کھلیا۔ ¹⁵ ۱۵۔ تے سلیمان نے رب دا گھر ، اپنا محل ، مَلو (سہارا دین والیاں کنداں )، یروشلیم دی کند تے حُصور ، مجِدّو تے جزر نوں بنان لئی جیہڑے بیگاری بھرتی کیتے سَن اوہناں دی تفصیل ایہہ وے۔ ¹⁶ ۱۶۔ (مصر دے بادشاہ فرعون جزر تے حملہ کرکے قبضے چہ لے لیا تے اوہنوں ساڑ دِتّا ۔ اوہنے ایہدے کنعانی وسنیکاں نوں مار مُکایا تے فیر اوہنوں داج وِچّ اپنی اوس دھی نوں جیہڑی سلیمان دی بیوی سی ، دے دِتّا۔ ¹⁷ ۱۷۔ تے سلیمان نے جزر نوں فیر توں بنایا سی ) تے اوہنے ہیٹھلے بَیت حورُون ، ¹⁸ ۱۸۔ بعلات تے بیابان دے علاقے وِچّ تمر جیہے شہر بنوائے۔ ¹⁹ ۱۹۔ تے نالے اوہنے ذخیرہ کرن لئی کُل شہر، اپنے رتھاں تے گھوڑیاں لئی قصبے تے یروشلیم وِچّ ، لُبنان وِچّ تے کُل علاقے وِچّ جِدے تے اوہ راج کردا سی جو کُجھ وی بنوانا چاہیا، بنوا لیا۔ ²⁰ ۲۰۔ کُل لوک جیہڑے اموریاں ، حِتّیاں ، فرزّیاں ، حِوّیاں تے یبوسیاں (ایہہ قوماں اسرائیلی نئیں سنَ ) وِچوں باقی رہ گئے سَن۔ ²¹ ۲۱۔ یعنی اوہناں دی بچی ہوئی اولاد جنہاں نوں اسرائیلی نیست تے نابود نہ کرسکے ، اوہناں نوں سلیمان نے غلام بنا کے، وگاریاں چہ دھکے نال بھرتی کیِتا جِویں اَج تک اے۔ ²² ۲۲۔ پَر سلیمان نے کسے اِسرائیلی نوں غلام نہ بنایا۔ سگھوں اوہ اوہدے فوجی سپاہی، سرکاری نوکر، اوہدے امیر، فوجی سردار تے اوہدے رتھاں تے رتھباناں دے سردار سَن۔ ²³ ۲۳۔ اوہ سلیمان دے مُنصوبیاں تے کم کرن والے وڈّے اوہدے دار وی سَن۔ پانج سو پنجاہ اجیہے عہدے دار سَن جیہڑے کم کرنے والے سیوکاں تے راکھے سَن۔ ²⁴ ۲۴۔ تے جد فرعون دی دھی داود دے شہر وِچوں اوس محل وِچّ جیہڑا سلیمان نے اوہدے لئی بنایا سی، آئی تے اوہدے بعد اوہنے محل نوں سہارا دین والے بنیرے بنائے۔ ²⁵ ۲۵۔ ہیکل بنان دا کم مُک جان دے بعد سلیمان ورّے وچّ تِن وَری اوس مذبح تے جیہڑا اوہنے خُداوند لئی بنایاسی، سوختی قُربانیاں تے سلامتی دیاں قُربانیاں چڑھاندا سی تے اوہناں دے نال خُداوند دے سامنے بخور پخاندا سی۔ ²⁶ ۲۶۔ تے سلیمان نےعصیون جابر وِچّ جیہڑا ادوم وِچّ قلزم دے سمندر دے کنڈے ایلوت دے نیڑے وے ، جہازاں بیڑا تیار کیِتا۔ ²⁷ ۲۷۔ تے حِیرام نے اپنے کامے گھلے جنہاں وِچّ ملّاح وی سَن جیہڑے سمندر نوں جان دے سَن تا ں جو اوہ سلیمان دے کامیاں دے نال بحری بیڑے وِچّ سیوا کرن۔ ²⁸ ۲۸۔ تے اوہ بحری سفر تے اوفیر گئے تے اوتھوں سلیمان بادشاہ لئی چار سو ویہ قِنطاراں سونا لے کے آئے۔